تجليات #2 : سمكة وحوت

*الرسمة للزميل محمود سنارة 

سارة..

الطريقة اللي اتلغبط فيها ونطق اسمها .. مكانش نطق عادي لمجموعة حروف اتشكلت من هزّة أوتاره الصوتية .. لكن انعتاق لروح مُحتلة جزء من قلبه .. مكان هو نفسه اتفاجئ إنه لسة موجوده عنده

أحمد..

طلبه منها إنها تبقى موجودة في حياته .. بالظبط كإنه بيطلب منها إنها تسلخ جلدها وتنزل تحضن البحر

سارة..

مع إنها مشيت من شهرين بس لسة سايبة روحها في المكان وفي الناس .. ومع إنها مشيت ظلم .. لكن ربنا سايب لها اللي يدافع عنها واللي ييحبها.. واللي ديما بيسأل عليها.. واللي تكتب عنها

أحمد..

لما سابها تمشي كان بيعاقب نفسه على الأرجح ..

 سمع لصوت خايف جبان بيقوله:

-إنت ما تستحقهاش..

 -إنت ما تستحقهاش..

-إنت ماتستحقهاش..

وصوت تاني أحمق مغرور:

-ليه يعني إحسن منك في إيه؟؟

 -ليه يعني أحسن منك في إيه؟؟

 -ليه يعني أحسن منك في إيه؟؟

سارة..

بنفس رقة حد السيف كانت وهي بتقطع آخر خيط رفيع رابط ما بينهم.. بمنتهى الهدوء سابت له مفاتيح الشغل وخدت شنطتها ومشيت

أحمد..

أوّل مرة يشوف باباها فيها .. وبدل ما يقوله:

إزيك يا عمي .. يشرفني إني اطلب منك ايد بنتك

يكون باباها رايح له مخصوص .. عشان يهزأه

سارة..

سمكة صغيرة .. كانت ماشية بخفة وشجاعة وتلقائية..تتمخطر بألوانها قدام حوت.. 

أحمد..

حوت مكانش فاكر إن فيه ألوان غير الرمادي وظلمة أعماق المحيط..فقرر إنه ياكل السمكة اللي فكرته بغير كدة 

تجليات #1

جوايا فراشة

ثانية كدة يا إسراء .. فكريني إنتِ ليه اشتغلتي؟
علشان مش عاوزة اقعد في البيت

طيب واللي مش عاوز يقعد في البيت يروح يشتغل؟
لا مش شرط .. بس لو مفيش قدامه غير الشغل يبقى يشتغل

طيب إنتِ مابتحبيش تقعدي في البيت؟
لا بحب .. بس بكرهه لما بيكون دا الحاجة الوحيدة اللي بعملها

طيب.. إنتِ ما بتحبيش الشغل؟
لا بحبه برضه .. بس المشكلة إني مش حساه كافي.. لسة معندهوش القدرة على إنه يملى الفراغ اللي جوايا

إنتِ بتعملي إيه في الشغل -من باب الفضول- يعني؟
بروح الصيدلية الساعة 9 افتحها .. اشيك ع الفلوس اللي في الدرج والخزنة واظبطها .. بعدين اطلع النواقص واطلبها .. بتكون الساعة بقت 11 كدة .. في الغالب بفتح الموقع دا Mayoclinic واقعد اذاكر منه هو وكتاب Non prescription medicine.. وفي أحيان نادرة ممكن اشغل فيلم ع اليوتيوب .. لحد صلاة الظهر .. ومن بعد الصلاة بيبتدي الشغل .. اوردرات ودليفري وأحيانا روشتات.. وديماً جرد لمخزون الدوا .. وهوب الساعة بتيجي 5 الا ربع .. بقفل الشيفت بتاعي وامشي
بس على فكرة الموضوع مش ممل خالص .. انا مبحسش بالوقت خااااالص اصلا بيجري ودا مؤشر كويس.. وحقيقي بستفاد
دا غير إني هاخد مرتب في آخر الشهر -إن شاء الله- واستقل مادياً بقى  
الحمد لله

ممم طيب وبعدين؟
بعدين يا ستي هو إن في ورشة في مكتبة الاسكندرية .. ورشة لتعليم السيناريو .. ومشروع الورشة رواية الباب المفتوح .. وأنا من يوم ما عرفت وانا حاسة بهيييييح .. عايزة اروح طبعا .. 

قبل ما تسألي ما تروحي .. إيه المشكلة؟
المشكلة إني فاتحت ماما في الموضوع ورفضت .. ثم إني هروح يوم أجازتي .. وماما هتفضل تبهدلني انتي مش بتساعديني ومش بتعملي معايا حاجة طول الاسبوع .. حتى يوم اجازتك كمان هتسيبني وتمشي .. وبصراحة انا في حالة من السكينة والاستقرار النفسي وماعنديش اي استعداد اني اكسرهم بخناقة مع ماما

هروح اصلي العشا .. وافكر شوية وابقى ارجع تاني

يتبع

أن تستيقظ مبكراً

أنا صاحية النهاردة بدري .. صحيت الساعة 6 ونص وبعدين حاولت أنام لحد 7 ومعرفتش فقررت أقوم .. بس اكتشفت إن الصحيان بدري دا شئ عظيم جداً .. يعني أنا غسلت المواعين وعملت الرز عشان الغدا وكويت الهدوم وحضرت الأوراق بتاعتي وكلمت صاحبتي شات ..وسمعت تراك Up مرتين وتاراك ميكانو 10 مرات .. وقريت 6 بوستات ..وبكتب تدوينة.. ولسة هقوم اروق الشقة واحضر الفطار واخد شاور وانزل.. وكل دا الساعة مكملتش 10 اساسا

بس بقى ابقوا اصحوا بدري انتم كمان

لما أليس طلعت من الحفرة

عريس 1 :

الست مالهاش إلا بيتها

عريس 2:

أنا طلعت من ثانوي كانت والدتي اتوفت ..

 فاللي عايزه منك زي ما تكوني حبيبتي وخطيبتي ومراتي وكل حاجة ..

 تبقى كمان أمي 

عريس 3:

1-إيه رأيك في تعدد الزوجات؟

2- امتى تطلبي مني الطلاق؟

3- ههههههههه إنتِ شكلك عصبية أوي على فكرة

:D

دكتور في الجامعة:

إنتِ اشطر من ال 16 ع الدفعة ..

 وعرفتي تجاوبي اسئلة هي معرفتهاش

:p.s 

عطاني 33 من 40 وهي 34 من 40

ابتهال:

أنا أريد أن أحيا يا ابتهال .. لأن النجاة فقط لا تكفيني

لمياء ولمياء:

اوعي تتخلي عن الكتابة

إسراء:

أنا بصيت في الحفرة اللي وقعت فيها أليس .. 
ومن يومها مابقيتش بشوف الدنيا زي الأول

ناس كتيرة:

سيبي لنا اسمك ورقم تليفونك وهنبقى نتصل بيكِ

إسراء تاني:

-ماتفقديش إيمانك بالكتابة..

- والله يا إسراء أنا أصلاً فقدت إيماني بالدنيا كلها مش بالكتابة بس

نفس ذات إسراء الأولانية والتانية:

-خلاص اقعدي في البيت وريحي نفسك

-لا لا لااا أنا عندي انهزم 1000 مرة برا البيت .. على إني انهزم الهزيمة الكبيرة واستسلم واقعد في البيت

إسراء غيرها:

اوعي تحطي كلمة ولاد وكلمة كويسين في نفس الجملة

حسين 

الباب المفتوح:

هي دي السكة اللي لازم تمشيها لوحدك

على كوبري ستانلي وساعات من الضحك :)

 4/4/2013

اليوم دا مميز جداً

أولاً: اتحطيت فيه في اختبار من ربنا وإن شاء الله نجحت فيه

مش بس كدة

ربنا عوضني بأحسن منه

**********

ثانيا: كانت أول مرة ليا امشي فيها على كوبري ستانلي

على طول بشوفه من المشروع 

بجد مش ممكن

عارف يعني إيه تبص على البحر من فوق 

إنك تكون واقف فوق البحر على ارتفاع مناسب

مش شايفه زي ما بتشوفه كل مرة من على الشط 

أنا كنت حاسة اني اتهبلت وعاوزة انط فيه

******

ثالثا: كان معايا إسراء وابتهال المثلث 

مارسنا طقوس سرية

جمّعنا فيها أمنياتنا وأحلامنا ودعواتنا برابط مش ممكن يتكسر 

-إن شاء الله-

********

رابعا بقى:

كمية التفاصيل اللي في الصورة الأخيرة دي

لما ربنا يريد إن روحك تتجلى أقصى تجلي ليها

في لحظة مقصودة بترتيب إلهي مع ضغطة الكاميرا

 ببص بتحدي وأمل وعيني بتدعي

بضحك من قلبي بمنتهى الرضا والتفاؤل

وايدي متشبثة بحبل من الرجاء في الله

وبس كدة :)

عزيزي سكشن 1B

إنتم سكشن أسطوري ..                                                  

                                        

 مفيش بنات في الكلية كلها ممكن تفهم إ يعني إيه سكشن 1B غيرنا احنا .. اللي عاشروه 5 سنين .. مفيش حد ممكن يفهم إحساس 7 بنات  إسراء ..بيتعاملوا مع أكتر من 50 ولد أحمد.. أنا بجد عن نفسي مش قادرة اتخيل كمية الإثارة والأكشن اللي كانت هتفوتني لو ماكنتش معاكم في السكشن .. وقد إيه كانوا هيبقوا 5 سنين مملين .. 

أنا بجد مش ممكن انسى أحمد اللي على طول حران وعمره مالبس البالطو من يوم مادخلنا الكلية .. إنت بجد إزاي كدة ..؟ إنت بجد جبار 

.. وعمري ما هنسى أحمد اللي كان بيخلع البالطو .. بذمة أوي وضمير .. فوشي لبس في دراعه ودوخت وكنت هقع من الخبطة .. ونضارتي طارت :D :D.. وهو عمال يعتذر وأنا عمالة أضحك مش مصدقة وبقوله استنى كدة يمكن مقعش

وعمري ما هنسى أحمد اللي أخد الورق بتاعي اللي كنت بذاكر فيه قبل الكويز وقعد يشرح لصحابه منه وأنا مكسوفة اقوله إني عايزة الورق .. وفضلت مستنياه لما خلص شرح لصحابه بس هو مرجعش الورق وخده ومشى :D واتسحلت وراه جري لأخر السكشن بنده عليه ..

 عمري برضه ما هنسى أحمد اللي سلم علينا في الشروق .. وهو بيقولنا إزيكم يا بنات؟ وأنا ماتنحتش من فكرة إنه سلم علينا .. قد ما تنحت من كلمة يا بنات :D :D أنا اتصدمت من الكلمة أوي .. أنا طول عمري حاسة إني جعفر من يوم ما دخلت السكشن دا

وعمري ما هنسى أحمد اللي في فاينال عملي البابليك .. لما بناخد رقم عشوائي ونوقف عليه .. وهو كان عاوز يوقف مكاني عشان يظبط مع صحابه .. راح بكل براءة اخد الرقم مني وعطاني رقمه وأنا متنحة ومذبهلة .. ومش عارفة إزاي عمل كدة .. وإزاي أنا سكت كدة وروحت وقفت على رقمه.. وأنا بهري وبنكت في نفسي

وكله كوم وأحمدات اللي اشتغلت معاهم في البرزينتيشن كوم تاني وكمية سؤ التفاهم اللي حصل .. وخناقاتنا على اللبس .. وفي الآخر احنا كبنات اللي ملتزمناش باللي اتفقنا عليه :D.. بس بجد نسينا كل اللي كان مضايقنا يوم ما عملنا وظبطنا أحسن برزينتيشن في السكشن كله

وكمان فيه أحمدات كانوا بياخدوا مننا أدوات العملي  .. من غير ما يستأذنوا واحنا نلف ندور عليها

أما بقى البنات .. فهما إخواتي وصحابي وحبيايبي وشركائي في الكفاح وبجد بحب كل إسراءات في الله حتى كمان اللي كانوا معانا فترة واتنقلوا سكشن 2

أنا مش عاوزة حد يفكر إني متضايقة أو بتريق على حد .. أنا بس والله بهذر وحقيقي مش بتخيل نفسي وأنا في سكشن بنات بس والمعيدة تكمل شرح كدة عادي من غير ما نتزهق ولا نتهدد ولا ننقص درجات.. وعارفة إننا كبنات أكيد شلناكم برضه

وبجد أنا بعتبركم كلكم زي أخواتي .. .. ولو حد من سكشني كلامي ضايقه يقول وهمسح البوست على طول .. بس بكرر كلامي إني بعزكم كلكم وكاتبة المواقف دي هزار وضحك مش أكتر :D

وحقيقي اللي محضرش مع سكشن 1 يبقى ولا كإنه دخل صيدلة أصلا

ربنا يوفقنا كلنا في اللي جاي من حياتنا
:)

أن تنساب روحي

د.هشام الششتاوي امباررح في ندوته كيف تكون سعيداً؟

كان بتكلم عشان نبقى سعداء لازم نكتشف مواهبنا ونطوّرها .. وكان بيقول إنك تعرف إنك موهوب في حاجة .. ممكن من خلال حالة اسمها الانسياب.. يعني وإنت بتعمل الحاجة اللي موهوب فيها .. تنسى روحك وتنسى الوقت ومتحسش بأي حاجة غير اللي بتعمله .. الحالة دي مش بدخل فيها غير في حاجتين بس .. أولاً: الكتابة .. وأنا بكتب بنسى كل حاجة في الكون .. وممكن اقعد على البورد لمدة 6 ساعات متواصلة من غير ما اقوم خااالص ولا اشرب ولا أكل ولا أي حاجة .. صدقوني إحساس مش ممكن يتوصف أو يتخيله غير اللي مر بيه ..

 تاني حاجة بقى هي القراءة .. بجد لن أنسى يوم ما قريت لا تطفئ الشمس الجزء التاني.. إني اقرا 700 صفحة في 8 ساعات من الساعة 6 المغرب لحد الساعة 2 بالليل مقومتش غير فقط عشان أصلي المغرب والعشا حاجة مش طبيعية ومتعة ماتتوصفش

وبعدين بقى كنت قبلها بتكلم مع جهاد وقالت لي كلام حلو أوووووي زي:

إن المفروض مثقش في الناس بالسهولة اللي بثق بيهم .. عشان أي حد لازم يتجمّل دي طبيعة بشرية.. وأي حد مهما كان نازل من جهنم حالاً دلوقتي.. مش هيتكلم غير عن قد إيه الجنة جميلة.. وإني كمان مينفعش اتعامل بتلقائية وبصراحة مع كل الناس.. متعاملش كدة غير مع اللي يقدرهم ويفهمهم صح.. مش كل الناس تستحق التلقائية دي .. 

وبس بقى كل دا خلاني ارجع اكتب تاني  وانبسط عشان كتبت .. بعد توقف مريب .. عن الكتابة والانبساط.. صحيح لسة في حاجز بيني وبين الكتابة ومش في مستوايا ..وصحيح مش معنى إني مش مبسوطة ابقى متنكدة .. لكن أنا في حالة من الرضا والصبر وتقبل الأمر الواقع..

 أنا بس كانت أول مرة اكتشف إن الكتابة والسعادة -في نظري- وجهان لعملة واحدة

وإن الكتابة ليست سوى ناتج طبيعي لانسياب روحي فمش ممكن اعرف اكتب وأنا روحي مقبوضة وخايفة ومش متطمنة.. 

إيه في أمل؟؟

تا نرجع لا مش معقول

أنا حاسة إني خايفة أوي من امبارح.. ورجعت روحي تحس بالساقعة زي زمان..  سبحان مقلب القلوب .. في ناس كنت بتحبها في يوم لأسباب مش قادر تحددها.. وتاني يوم كرهتها لأسباب برضه مش قادر تحددها .. غير إن القلوب بين ايدين ربنا بيقلبها كيف ما يشاء..

في أمل إيه في أمل.. أوقات بيطلع من ملل

هو أنا بعافر عشان اللي مؤمنة بيه.. بحارب وNo1 Fighter .. بس الفكرة الدعم النفسي بيفرق معايا أوي.. فرق لما اعمل حاجة مؤمنة بيها.. وباقي الناس مؤمنة بيها وبيا .. وإني اعملها وهم مش مؤمنين بيا .. خصوصاً إني من نوع
give me a little encourage and i''ll give you back a great ideas ..
بس مؤخراً فقدت قدرتي على إني اتخانق .. اتخانق على حاجات هي حقي أصلاً.. معنديش أدنى استعداد أعيط .. 

في أمل إيه في أمل.. أوقات بيرجع من شي حنين .. لحظات ليخفف زعل

المشكلة كمان إني بكره نفسي على وجودي في الصيدلية .. آه بنزل ومش لخمة وبقيت بعرف حاجات اعملها بس مش هو دا اللي عاوزة اقضي حياتي وأنا بعمله .. مش نفس إحساسي لما كنت بروح معسكر أبو قير من أول اليوم لأخره قصص وشعر ومسرح وغنا 3 أيام كدة بس .. كانوا بالنسبة لي جنة ع الأرض ..

المشكلة بقى الأكبر أني مبحبش اقعد اندب وابكي على حظي .. أنا مش من الناس دي .. مش من الناس اللي بتلاقي عزائها في النواح .. مش من الناس اللي بتيأس من رحمة الله .. 

بس مش عارفة أعمل إيه ؟ غير إني اقعد اقرا شوية واسافر بالكتب من هنا

يومياً  ليل وبعده نهار عمري قدامي عم بينقضى

المطر الذي لا اعرفه

طول عمري وأنا بحب الشتا بمووووووووت فيه أسعد أوقاتي وهي بتشتي .. الشتا دا كان ال Saver for my soul

بس أنا كنت غلطانة لما فكرت كدة .. ممممم أصل الموضوع إن النهاردة كنت ماشية في الشارع لوحدي وأنا مروحة من الكلية بعد ما امتحنت شفوي واشتريت ورق المادة التانية  لما بدأت تشتي .. الشنطة مدلدلة من كتف والايد التانية معلقة عليها الجاكيت وماسكة النضارة والموبايل وبرغم كل دا كنت فاردة جناحاتي وببحلق في السما ومبسوطة جداًااااااااا وعمالة أدندن "أنا اتوب عن حبك أنا .. أنا ليا في بعدك هنا .. دا أنا بترجاك الله يجازيك يا شاغلني معاك وشاغلني عليك"..

 ومبسوطة وزي الفل لحد ما طلعت على البحر .. المطر زاد والهوا وكنت ماشية في عكسه والمطر بيخبطني بجد في وشي مش قادرة افتح عيني ..مش لابسة النظارة عشان كدة كدة مش هشوف بالمياه اللي عليها وأنا مش بشوف من غيرها.. المشكلة إني ماكنتش عارفة اوقف المشروع ولبست الجاكيت من كتر الساقعة .. وعمالة اوقف المشاريع فيكتوريا الساعة طب ابو سليمان حجر ..كوبري الناموس .. اي حاجة طب اي حتة ماتكونش بالمطر دا السما بلا مبالغة كانت عاملة زي دوش مفتوح بجبروت عليك .. اتحطيت في مواجهة بيني وبين اكتر حاجة بحبها في الدنيا وفي حياتي كلها ..

ساعتها تلقائياً حصل Switch جوايا على أغنية .. "مطر وعصفور ارتعش وبين ايديكِ الطيبة طلب الأمان أيوة بحبك آه بحبك من زمان".. كنت هبدأ أعيط مش لاقية أي مشروع اركبه والسكة طويلة والمطر بيزيد وأنا كل اللي كنت اعرفه عن المطر قبل النهاردة هو إني بحبه وأنا دفيانة في البيت بشرب كاكاو وتفرج على ال MBC2 .. أو وأنا راكبة المشروع جنب الشباك والمياه مثكثقة على الازاز وعمالة ارسم عليها..مع إن المطر دا قمة المأساة لناس معندهاش بيوت أو ساكنة في عشش..اللي عمري ما كنت بفكر فيهم.. زي بالظبط البحر اللي بحبه وأنا واقفة على الشط اترعب لو دخلت جوا ولا حد من اخواتي دخل وفكرة إني اركب مركب دي بالنسبة لي قلة عقل وتخلف.. لو كنت في 2012 كنت هفكر في  ياتري كام حاجة بحبها طول ما انا بعيدة عنها ومخدوعة في حقيقتها واني هخاف بعد كدة اقرب من حاجة عشان ماشوفش عيوبها .. دا كان هيبقى تفكير إسراء اللي في 2012 اللي كانت بتتصدم وبس بس بما إني في 2013 إسراء اللي معادتش فيه حاجة ممكن تصدمها فكرت في إن الغلط مش إني احب المطر الغلط إني اخليه

 Saver for my soul

because

 rain himself needs to be saved

 sometimes ..

الغلط في فكرة ال Hero اللي لازم يكون بيرفيكت في كل حاجة .. اللي مينفعش يتحط في مواجهة بينا وبين نفسنا .. عشان حد فينا هيخسر.. بالعكس ابسولوتلي هو شتا زي ماهو شتا وأنا إسراء زي ما أنا إسراء وزي مابتقبل حسنات ومتعة وروحانية الشتا لازم كمان اتقبله لما بيكون بنوّه وزعابيب

المهم ركبت في الأخر الحمد لله ووصلت البيت..  بس ساعتها كنت بغني ساعات المطر اسمعوها بنفسكم أحسن :)

إسراء اللي في 2013 تحب تقول إيه لإسراء اللي في 2012

السنة اللي فاتت كانت غريبة أوي فاشلة في المستوى العاطفي وناجحة في الصداقات والمهني 

 دول شوية لينكات لأبرز الموقف اللي حصلت لكل شهر.. في مواقف لسة ماتحكاش عنها ..ممكن يتحكى عنها في يوم .. وفي مواقف لن أجرؤ أن أحكي عنها .. وفي مواقف حكيت عنها بعدين مسحتها عشان بقيت مؤلمة وزي ما قال منير" كل يوم فرحته معاك بيعذبني"

بس السنة نقدر نقول إنها كانت مفيدة جداً وعملت لي تقويم شامل للعوج اللي في شخصيتي.. وبرغم إن الوجع كان مسيطر فيها ومكانش فيه حاجات كبيرة مفرحة .. لكني مفقدتش قدرتي إني أفرح بالتفاصيل الصغيرة .. زي وردة إسراء صوابي.. وحلويات جابتهالي ابتهال وتحضيري لبرنامج وشوشة الإذاعي مع د.هشام.. دخولي بصمة وتعرفي على رضوى ونهال ودكتورة شاهندة .. والتحليل النفسي اللي اتعملي من د.محمد صديق.. قربت من لميا.. ووقوف هبة جنبي طول فترة اكتئابي في الصيف.. اتدربت عند د.عبد الفتاح أكتر إنسان صيدلي بيحترم المهنة وأخلاقها ..طبعاً دا غير صداقاتي بإسراء صالح وجهاد جابر وجهاد يوسف ورغدة

 أهم مكسب نفسي اكتسبته السكينة والصبر وحاليا بتخبط عشان اوصل لليقين الكامل وكمان لا حزن دايم ولا الشباب بيدوم

المهم إن شاء الله 2013 تكون سنة أفضل من اللي قبلها 

يناير:

منيريات (1)

كانت ككًل الأشياء

فيراير:

أمنية .. أمنيتان.. ثلاث أماني

3 حاجات أنا كمان

مارس:

Night&Day: pleasant sleep &Quiet wake up

The last 2 days

صباح الأماني المؤجلة

أبريل:

MANAMANAH

مايو:

راضية الحمد لله

يونيو:

لذا كل سنة وأنا طيّبة

يوليو:

رغي: محرّمة على الـتأخير

أغسطس:

أنا وهبة: الوجه الآخر من الفسحة

سبتمبر:

تجلّيات

عفريت الكتابة

أنا قلبي لما حكى

أكتوبر:

جواب لربنا

عشان نبقى واضحين الموضوع مش بالبساطة دي

نوفمبر:

السمك يأكل الشيبسي أحياناً

أنا حلوة وزي الفل :D

ديسمبر:

أهل الحب

اختبار حب

توازن الروح والجسد"1"

Sweet disposition :)

Sweet disposition :)

Sweet disposition

Never too soon
Oh, reckless abandon
Like no one's watching you
A moment of love
A dream
A laugh
A kiss
A cry
Our rights
Our wrongs

So stay there
'Cause I'll be coming over
While our blood's still young
It's so young, it runs
We won't stop 'til it's over
Won't stop to surrender

كل اللي فات حمادة

ممممممممم ابدأ بإيه؟
ابدأ مثلاً بإني عندي حساسية في الأنف وجعاني وواجعة وداني وواجعة الحنجرة ومصدعاني.. وإن ضغطي امبارح كان 110/90 .. وإن النوم بقى متعب أوي وموجع ومش اوبشن رفاهية.. رجلي بتبقى متلجة ..وبتاخد ساعتين عشان تبدأ تدفى بالرغم من إني بلبس عدد 3 شراب رجالي.. وبعد 4 ساعات بصحى من كتر ما بتسخن عليا ..يعني الأول بفضل صاحية عشان ساقعة وبعد كدة بصحى عشان سخنت ..المشكلة اني بحب الشتا.. بس مش عارفة ليه هو ماباقاش يحبني

حمااااااااادة بجد

واني بمتحن ورا بعض .. وبعك فيهم كلهم .. بس لازم اروح اضحك في البيت واقول انه كان كويس عشان امي ممكن Freak out.. لو عرفت غير كدة

بس هو الحاجة الحلوة إني لما بكون قارية حاجة ومش فاكرة اجابتها بقول يا كريم يا وهاب يا من ترزق بغير حساب.. فبعلم ع الاجابة وبتطلع صح :)

وان النهاردة ضغطي بقى 130/90 .. وكنت هموت وانام في المشروع.. بس ماكنتش  جنب الشباك.. كنت هموت اكتر واقول للبنت اللي جنبي ممكن انام على كتفك لو سمحتي؟هو عادي مافيهاش حاجة مش كدة!! .. 

حلم واحد بس

مشهد "1"
"على ظهر سفينة .. ليلاً .. عصابة مسلحة مكونة من 4 أشخاص يرتدوا الأسود .. وشخص مقيد إلى خشبة رفيعة مائلة بزاوية"
يقترب يحي الفخراني بحذر من الشخص :
هل وصلت بهم هذه الدرجة من الجبن؟
تنكسر الخشبة فيسقط الشخص أرضاً..يأتي صديق له من الخلف
-ماذا تظن إنك فاعل؟
-أنا قادر على أن أقتلهم جميعاً في أقل من دقيقة واحدة
يطير في الهواء ليدور عدة دورات .. وقبل أن ينتهي ..يسقط ال 4 رجال المسلحين مقتولين

يسود الهرج والمرج بين الراكبين يقفز البعض في الماء.. تأتي حبيبة يحي الفخراني.. تخبره أنها بوسعها .. عكس اتجاه السفينة .. بعد أن غيرته العصابة ليعودوا إلى مسارهم الطبيعي

مشهد"2"
مؤخرة السفينة يقف عندها الفخراني واثنان من أصدقائه..
-هل تعلمان ما المشكلة الحقيقية.. المشكلة ليست في العصابة.. المشكلة فيمن استأجروهم ليختطفونا.. هم نفسهم الذين ما زالوا يتتبعونا في الماء
يرفع المنظار ليلي .. ناحية البحر.. بالفعل يجد من يتتبعهم
يقفز أحد أصدقائه لينجو بنفسه.. لكن تلتقطه السفينة الأخرى لتقتله وتلقي بجثته في البحر

مشهد"3"
يضع الفخراني فخ ليستدرج أفراد العصابة إلي حيث يقتلوا
وبالفعل ينجح ..

دا كان حلم واحد بس من اللي بحلم بيه يومياُ.. أكتر حاجة منرفزاني.. التأليف الفظيع والحبكة الدرامية.. اللي مش بيبقوا موجودين فيا وأنا صاحية.. بحر الخيال الواسع.. والحديث في الحلم كان باللغة العربية بجد.. أنا أحلامي وحدها يتعمل لها أفلام

اختبار حب

كنت بتفرج على الخواجة عبد القادر.. وبعدين زينب قالت له
أنا عاوزة عصفور بيتكلم من مصر وفستان خيط فضة وخيط دهب ومياة زمزم
وفعلاً جاب لها اللي قالت عليه.. ساعتها قالت له يتقدم لها عشان يتجوزها
ولما وشه جاب ألوان عشان أخوها مش هيوافق
قالت له أنا هسيب عندك العصفور والفستان بس اعمل حسابك
لو العصفور مات أو الفستان اتشد منه خيط
أنا مش هتجوزك يا عبد القادر حتى لو أخويا وافق
وسابته ومشيت

ساعتها افتكرت بوست كان كاتبه شريف القلاوي في المدونة بتاعته Be ReaDy To Be :- NiGmAwY 3la ToOoL ^&^
بوست قدييييم جداً أنا نفسي مش هعرف أطلعه
كان كاتب يعني إن في الحكايات الخيالية الأميرة هي اللي بتحط اختبارات للي هيتقدم لها 
بس الواقع إن العكس اللي بيحصل والولاد هما اللي بيختبروا البنات

المصيبة بقى إن في ناس كتيرة أوي عندهم التباس بين اختبار الحب واختبار الكرامة

فلو حد ساب حد عشان سقط وهو بيختبر كرامته .. احب أقول للي اتساب إن ربنا بيحبك

وهبة كمان كانت بتقوللي الولاد بقوا مغرورين أوي وبيتعاملوا على إنهم هما اللي لقطة

ومش يتعوضوا

بس أنا في نفس الوقت عجباني زينب أوي ..

مش فكرة اختبار.. لكن كفكرة إنك هتحقق لي اللي بحلم بيه 

زي مثلاً إننا نكتب كتابنا في المسجد النبوي

واحضر حفلة لعلي الحجار وعمر خيرت ومسار اجباري

وماتجيبليش هداية لبس وبيرفيوم وأدوات مطبخ ولا حتى ورد

تجيب لي هدايا متعاملتش لحد ومش ممكن تتهدى لحد لغير إسراء

زي الخواطر الكاملة للشيخ الشعراوي

ومجلد ألف ليلة وليلة 

وأي حاجة تانية على ذوقك 

و ممممم ممممممممممم

مش فاكرة الباقي صراحة 

بس أنا طيب مش كدة ها ؟ ها؟

أصلي لسة قارية البوست دا.. وحاسة بيقين إن كل حاجة ممكنة

:)

تحدث المعجزة عندما يصل الإنسان إلى أعلى مراحل الإيمان واليقين بأن ما يريده سيتحقق . دون أن يشوب ذلك شائبة بسبب أي أحداث من حوله ، مهما كانت تفاصيلها .

الإيمان واليقين العميق ، مع عزل الأحداث منتهى إفراد الله بالعبادة .

إن أثرت عليك الأحداث من الداخل ، فأنت أشركتها مع الله في إدارة الأمور ، وهذا عمق معنى الشرك ، لكنه شرك خفي لا يخرج من الدين ، لكنه يؤثر على حياة الأشخاص سلبا 

.

 أحمد عمارة

تحديث

ابتهال صالحتني ومش جابت لي كيت كات بس ..
جابت لي كيت كات White chocolate & dark
وشيبسي بالجبنة
وفانتا
 :) :)
 وأنا كإسراء فرحت أوي 

خسارة تدفع للفوز وأشياء أخرى

النهاردة كانت مسابقة المكتبة للقصة القصيرة .. ومش فوزت فيها .. أكيد كان نفسي أكسب بس ليا شوية ملاحظات:

1- أنا لسة مبتدأة .. واللي فازوا النهاردة كانوا كبار في السن كان أقل فرق 10 سنين على الأفل ..حسيت إن فوز واحدة مبتدأة ممكن يكون ظلم لناس خبرتها بالسنين .. طبعاً الموهبة مالهاش سن .. لكن تطويع الموهبة دي والوصول بيها لأكبر شكل جمالي ممكن محتاج كتير أوي ..دا غير إن فعلاً القصص الفايزة تستحق أن تفوز بجدارة حتى شوفوا بنفسكم 

2- كان فيه كابل النهاردة ... اللي فازت بالمركز الثالت زوجها كان رااااااااائع صراحة هي مهندسة في اواخر  الاربعينات وقاهرية ..جوزها كان جاي معاها يدعمها وكان فخور بيها أوي .. وتعليقاته كانت في غابة الرقي والاحترام .. مكنتش حاسة بغير .. أنا عاوزة من دا يا حزمبل أنا عاوزة من دا :) :) ... أومال ليه اللي -الله يسامحهم بقى- بيقولوا لي الناس دي مش موجودة وإني المفروض اقبل بأي حد هيعيشني كويس وخلاص .. يارب لا تشمت بي الأعداء

3- في ناس كتير مشيت لما ندهوا ع المركز الأول مكانش اسمهم.. أنا فرحت أوي صراحة إنهم مشوا .. عشان اللي مش بيستني يشوف مين المركز الأول وليه ? عمره ما هيبقى مكانه .. أحسن خلوا المنافسين يقلوا :) :))

4- أنا واخدة مركز تاني جامعة السنة اللي فاتت .. ودا مش معناه أبداً أني كدة وصلت أو ابقى حاجة .. صحيح هو أنا كدة تفوقت بس على شريحة واحدة صغيرة في السن .. كبداية كويس لكن مش كفاية ومش حاجة

ملاحظات مالهاش علاقة بالمسابقة:

1- فرحانة بدعم إسراء صوابي ليا.. أول مرة من خمس سنين تهتم كدة وتشجعني

2- لو ابتهال مجابتش الكيت كات اللي هتصالحيني بيها يوم السبت هزعل أوي بجد ..ولو زعلت بجد كدة مفيش حاجة ممكن تصالحني

3-بقالي فترة الكوابيس ضيفة عليا .. واكتشفت إن نومي مش طبيعي .. أنا مش بنام متواصل من ساعة ما دخلت الكلية.. لازم اصحى بعد 4 أو 5 ساعات من النوم ومحتاجة ساعتين تلاتة عشان أرجع أنام تاني ..مكتشفتش كدة غير لما كنت بتكلم مع صاحبتي وقالت لي ازاي وكانت مذبهلة اوي  من إني كدة من 5 سنين .. كمان لما خدت فارماكولوجي وسيوتيكال ولاقيت في علاج بيتاخد لل Intermittent sleep.. مع إني والله ممكن اكتفي بهدهدة زي دي عشان أنام على طول

أحلامي

النهاردة لاقيت فولدر بتاعي بعنوان أحلامي .. بتاريخ 24/4/2011

بقتحه لاقيت الصور دي فيه

حاسة بإحساس مين دول أصلاً :d

عشان أحلامي دلوقتي اختلفت كتييييييييييييييير

مع انهم 7 شهور بس فرق :))

أنا حلوة وزي الفل :D

أنا عارفة إني مش بكتب هنا غير على الوجع والاستياء.. واللي هياخد المدونة دي ك Source

عن كل شخصيتي يبقى هو ميعرفشي حاجة عني .. أنا إنسانة مش مهزومة ولا منكسرة ..

بس هو الحظ بقى إني مش بعرف اكتب غير في الحالتين دول

أنا الحمد لله ليا انتصارات برضه في الحياة ..

 يعني مثلاً واخدة مركز تاني قصة قصيرة على الجامعة :D

.. عملت مجلة فارما بظ لشباب صح من وأنا في سنة أولى :d

نظمت يوم ثقافي مع ابتهال في سنة تانية

كنت عضوة في مويك في سنة تالتة وانضميت حالياً لبصمة 

حافظةعدة أجزاء من القرآن الكريم :)

بعد برنامج في اذاعة صوت صيدلة وانا في بكالوريوس دلوقتي

السنة اللي فاتت كانت أول سنة أجيب فيها جيد جداً وأول سنة ابطل تزويغ من المحاضرات
وبألف رواية اسمها لذلك أحببتها يوماً

ليا صحاب كتير جداً غير اسراء صالح وابتهال واسراء فرماوي وهبة عادل .. اللي مش بتكلم غير عنهم .. زي اسراء صوابي أول صديقة ليا في الكلية واسراء السيد أقدم صديقة ليا من اولى ثانوي واسراء شرقاوي واسراء صبري واسراء ابو زيد ورغدة وجهاد يوسف وجهاد جابر وطبعاً سلمى ومي ولميا وحنان

انطباع الناس عني ديماً ايجابي الحمد لله وبيستغربوا لما بيلاقوني زعلانة .. يا سلام لو كان معايا الاوتجراف بتاعي كنتوا صدقتوا على طول والله 

مش معايا منه ع الجهاز غير الصفحة دي

دي صورتي بقى مع دكتور منير :)

طب مش بالذمة مش ابقى حلوة اهو وزي الفل

:) :) :)

رسايل من ربنا : الرسالة رقم 7

ربنا على طول بيبعت لنا رسايل .. لحاجات كتيرة بنفكر فيها سواء كنت أفكار كويسة بيساعدنا إننا نكمل فيها .. أو أفكار سيئة بيساعدنا إننا منمشيش فيها .. بقالي 3 اسابيع الرسايل مكثفة من ربنا ليا بالصدفة كنت بعدهم .. ولما وصلت النهاردة للرسالة رقم 7 .. قررت اكتب عنهم

امبارح كنت اعلنت اعلان عظيم  وبرغم من إنه يبدو إنه موجع بس بالعكس ابسولوتلي دا بيوحي بقمة معاني السكينة والرضا.. المهم نمت وصحيت بالليل وأنا عمالة أردد " مَنْ كَانَتْ هِجْرَتُهُ إِلَى اللَّهِ وَرَسُولِهِ فَهِجْرَتُهُ إِلَى اللَّهِ وَرَسُولِهِ .. 

واكتشفت إن كل اللي فات دا مكانتش هجرتي لله ورسوله .. كنت مثلاً لما بتكلم عن الارتباط  كنت شايفاه إنه الحل السحري لمشاكلي وعقدي النفسية.. شكايتي من إني دخلت صيدلة غلطة وإن كان هيحصل إيه لو دخلت كلية بحبها موهوبة فيها .. كنت برضه بفكر إن كدة كل مشاكلي هتتحل .. لكني للأسف مكنتش حاجة في دماغي إني بعمل كدة لربنا وبس .. أنا كان نفسي في كدة عشان ابقى مبسوطة.. صحيت امبارح وأنا بقكر في إن كل خطوة في حياتي هي هتبقى هجرة لله ورسوله.. وكل طلب وأمنية بتمناها للغرض دا .. هجرة من السجن اللي سجنت نفسي جوا نفسي .. لحاجة أكبر وأعظم وأبقى وزي ما الصوفيين بيقولوا إن الهلاك إنك تعشق وتحب وتتمنى هالكين زيك ..

المهم دلوقتي بقى لاقيت المقال دا ودي كانت الرسالة رقم 7 اللي ربنا بيقولي فيها صح اثبتي بقى على اللي وصلتي له

 هو أنا لسة مش عارفة هستغل دا إزاي ؟ بس أكيد ربنا هيبعت لي حاجة ترشدني .. أنا واثقة إني في يوم من الايام هعمل حاجة عظيمة جداً هتخدم البشرية .. وربنا بيؤهلني وبيربيني من دلوقتي ليها :)

الحديث الكامل

 وعن أمير المؤمنين أبي حفص عمر بن الخطاب -رضي الله عنه- قال: سمعت رسول الله -صلى الله عليه وسلم- يقول: إنما الأعمال بالنيات، وإنما لكل امرئ ما نوى، فمن كانت هجرته إلى الله ورسوله فهجرته إلى الله ورسوله، ومن كانت هجرته لدنيا يصيبها أو امرأة ينكحها فهجرته إلى ما هاجر إليه . 

تصوير هبة عادل

إعلان

أعلن أنا إسراء يوسف وأنا في قمة شعوري بوجع فقدان الأمل .. والإحباط والمرارة من القوالب والعقليات الجامدة..واكتشافي أن اللي كنت بصبر بيه نفسي عشان أوصل لبكالوريوس صيدلة من غير ما انتحر ولا أنشل ولا اتنقط ولا اتجن تقريبا طلع وهم.. وبعد 6 ساعات عياط.. ساعتين منهم كانوا على كتف ابتهال .. وبعد ما بوظت فرحة إسراء صالح.. وحصلت على تعاطف إسراء صبري لدرجة إنها كانت هتشتري لي فانتا .. وقلشت رضوى وهي جاية تكلمني وسيبتها ومشيت بمنتهى قلة الذوق.. بأعلن أنا في هذه اللحظة الحرجة أني مش زعلانة وراضية وصابرة ومش هتنازل عن هدفي أنا بس هغير الخطة.. ودي آخر مرة هوجع الناس معايا بوجعي -إن شاء الله-