هي مش فكرة إني ارتبط وأقعد أحب في الفون بالعكس أبسولوتلي
*جربت مرة وفشلت
هي بس فكرة إني الاقي حد يفهمني
هل في حد ممكن يفهمني؟
هي دي أصل المشكلة
حد لما يعرف إن أبعد مكان روحته في حياتي
كان الكلية.. يلففني في كل الدنيا مش لازم سفر برا وبتاع
كفاية عليا اوي ألف جوا
وإني بحب القراية عشان بتاخدني هناك مش هنا
فأول حاجة يفكر يشتريها في شقتنا هي المكتبة
وإن تاني يوم من الخطوبة
يعملي مفاجأة ويكون عازمني على حفلة
لعمر خيرت أو مسار إجباري
ممكن كمان يشتري لي شوكولاتة وحاجات حلوة
كل ما يقابلني
ويعرف أوي إن مش بملك من الدنيا غير أحلامي
وإنه لو أقنعني في يوم إني ممكن أتخلى عنها
يبقى هو بيقنعي إني أتخلى عنه هو كمان
ولو ضروري اوي.. فلو أخد مني أحلام
يبقى يديني أحلام جديدة مكانها
يعني قبل ما يفكر يقولي "الست مالهاش غير بيتها"
يبقى فاهم كويس هو عاوز ياخد مني إيه
وإن مافيهاش حاجة لو اتخانقت معاه وزعقت فيه
وعليت صوتي كمان
مادام بينا وبين بعض ومش قدام حد خالص
وان مكانش هو يستحملني ..مين يعني ممكن يستحملني
بس مننامش زعلانين من بعض
ويصحيني وهو عامل لي ساندوتش جبنة تركي
ويقولي وهو مقموص إنتِ ماكلتيش حاجة من الصبح
وأنا اتكسف من نفسي أوووي أني زعلته
الحاجة الوحيدة اللي يكفي نتفق عليها
إننا بنحترم اختلافنا ونقدره
ومنعتبرهوش دي مسألة كرامة
وإني لو ماسمعتش كلامه
يبقى أنا كدة بجرح كرامته!!
مش عاوزة أخاف إني أوري له المدونة دي
أو أخاف من إنه يحكم وينتقد
مشاعري وأفكاري..وصورة شباب صح
اللي كاتبة عليها أغلى الناس.. وفي منهم شباب زمايلي في الأسرة
عشان هو عارف إنه حاجة تانية خالص
مالهاش أي مُسمّى
أو أخاف حتى من إني أحكي عنه
وأحكي عن حاجة ضايقتني منه
وشافها كل الناس اللي ع النت
زي ما عندي حق إني أكتب عنه لما يفرحني..ومايزعلش
يبقى عندي نفس الحق إني أكتب عنه لما يزعلني.. ومايزعلش
مش عايزة كياني ينصهر جوا كيان حد
عايزة أفضل أنا زي ما أنا
وهو زي ما هو.. عشان اتنين أقوى من واحد
عارفين أنا فشلت فوق ليه؟
بغض النظر عن الحوارات والأسباب اللي قلتها له
اللي كان ممكن أعديها وأتغاضى عنها في أي ظروف تانية
فشلت عشان مكنتش أنا
كنت بنت صوتها واطي .. وبتسمع الكلام
ومش بتعرف تقاوح ولا تعاند
وبدأت تتنازل وتغير من أحلامها عشان تناسب
وتتكسف من اللي كانت بتكتبه في مدونتها
وعشان كنت محتاجة حد إنه يشد ضهري
قبل ما يفكر يتسند عليه
لإني مش مستحملة تكّة
واللي بتداوي في كل جروح الناس
مش عاوزة غيره يداوي جرح قلبها
عشان بقى سقف طموحي في الحياة
حد كويس مش هيبهدلها
وهيكفي بيته
فاكتشفت إن أبويا بيعمل كدة كويس أوي
طب يبقى هتجوز ليه؟!
هو أنا كاتبة كل دا عشان بس نفسي حد يقولي
هو اللي بطلبه دا كتير أوي
أو خيالي أوي زي مابيقولوا
ع العموم لو دا كتير وأنا متطلبة
أنا أعرف واحدة صاحبتي
منفسهاش غير إنه يركّبها على حصان عربي أصيل
ومش مشكلة أي حاجة تانية
وواحدة تانية نفسها ميخيبش أملها في يوم من الأبام
ويثبت لها إن في حاجة ممكن تتمناها ولما تتحقق
متتغيرش وتجرحها وتطلع إنها كانت بتتمنّى غلط
هل دا كتير وصعب
هو احنا ليه غلبانين أوي كدة
أنا هقوم عشان أصلي الفجر وألحق أعيط لي شوية.. قبل ما أنام
*الموضوع كان رسمي .. وكان قريبي أصلاً..اتكلمنا فترة بعد كدة محصلش نصيب
ليست هناك تعليقات:
إرسال تعليق