لذا كل سنة وأنا طيّبة

بكرة عيد ميلادي .. 21 سنة إن شاء الله

بس حقيقة مش حابة أحتفل بيه بكرة خالص

وسط الكآبة اللي أنا عايشة فيها

 قفلت أكاونت الفيس عشان عارفة إن الناس مش هتفتكر عيد ميلادي من غيره

بقالي اسبوع بعيّط يوميا 

أنا عمري ما كنت كدة وكنت بستغرب الناس اللي كانت بتبقى كدة

وعمري ما استوعبت إيه المشاكل اللي ممكن تخلي حد  يبقى عامل كدة

بحمد ربنا طبعاً إني أول مرة اتحط في الموقف دا .. 

وإن ربنا أخره لي لما كبرت شوية عشان أعرف أتعامل معاه

بحمد ربنا وعارفة إن الدرس دا مش هيعدّي عليا بالساهل من غير ما اتعلّم منه حاجة

أضعف الإيمان هبقى أنشف شوية وأقوى من بعده في الحياة

جلال الدين الرومي كان بيقول 

وأنا حاسة إني بتنخل وبتغربل

مش هقول إني هبقى Pure 100%

ومش هقول إن ال Contamination  بس 

هو اللي هينزل من غير ما ياخد حاجات كويسة معاه

لكنني لن أفقد يوماً قدرتي على الابتسام .. والإيمان بغدٍ أفضل
إن شاء الله

:)

Coldplay

AND dreamed of
.

 para

para

 paradise

 every time she close her eyes

نبي بلا أتباع

بقالي فترة حزينة وحاسة إن حياتي بقيت خارجة عن سيطرتي

بستهلك تفكيري في مشاكل بتستنزفني

وبقالي اكتر من شهرين من يوم مسابقة ابداع وأنا معملتش حاجة ايجابية جديدة لحياتي

أنا دلوقتي بذاكر ومش ناقمة على كدة بالعكس مستمتعة بغض النظر عن الإمتحان
صوابي بتقولي إني فرقت معاها آخر امتحان في المذاكرة وفي التشجيع
ودا فرق  معايا جداً
بقرأ في ديوان نبي بلا أتباع لِـ خالد الصاوي
كنت قريته من سنة ومافهمتهوش بس فيه حاجة لمستني
رجعت أقرأه تاني الفترة دي ولاقيتني فاهماه

فاهمته لإني حاسة نفس إحساسه

بس أنا مفيش أي منتج بطلعه أنا مش منتجة
:(

3 أيام وهفوووووووووووووووووق إن شاء الله
لازم أفوق قبل رمضان
ولازم أتغيّر بعديه
إن شاء الله
سأشحذ نصل سيفي وأبايع نفسي

قالت شادن (1): تعالوا نعمل خير وننساه

شادن دي صديقتي الصدوقة .. ملهمتي في الحياة وعكازي .. طاقة النور اللي ربنا بعتهالي .. بتعلّم منها حاجات كتييييييييييييرة أوي .. وعلشان مانسهاش هيبقى فيه تسمية ليها هنا بعنوان قالت شادن .. دايمة إن شاء الله ومحدّثة بكل حاجة حلوة علمتهالي وإن شاء الله تعلمهالكم إنتم كمان

(1)

تعالوا نعمل خير وننساه..

 الفكرة إن حد يعمل حاجة كويسة وينساها فعلاً.. وينسى إنه عملها

 .. زي إن يصوم يوم تطوعاً ..

 وينسى إنه صامه جايز يبقى هو اللي يفرق معاه في الآخر 

وقيس على كدة كل حاجة تانية .. 

ممكن تساعد ست عجوزة مش قادرة تشيل حاجة

هي حاجات صغيرة أوي بس والله هتفرق

أنا عن نفسي قررت أنسى كل حاجة حلوة بعملها أو هعملها
بأمل إن ربنا يتقبلها مني 

Without u: 4 my l♥vely N70 MUSIC EDITION

أصل مش مجرد موبايل دول سنتين من عمري معاه

كان عندي لسة 18 وببدأ أفهم العالم زي ما كون طفل بيتولد من جديد

وهو اتولد معايا

قالولي في الصيانة إن كل اللي عليه هيتمسح

حسيت للحظة إني بحقد عليه في حاجات كتيرة اوي نفسي امسحها من حياتي بس مش قادرة

وبعد شوية الحقد اتقلب لخوف

هو الموبايل كدة مش هيعرف اني أنا اللي صاحبته

 !!

يمكن دي فرصته إنه يبدأ حياة جديدة

أنا مكنتش برحمه برضه

بس بيتهيألي اللي بينّا أكبر من إنه يتمسح زي

الصور اللي كنت بوقف فيها الزمن والضحكة للحظة

قائمة To Do اللي معملتش منها ولا حاجة :D

أعياد ميلاد صحابي ومواعيد امتحانات العملي

هو ممكن يتمسح من عليه كل الحاجات دي

بس أنا مش ممكن يتمسح من بالي ابدا

ليلة الامتحان وهو نايم قلقان جنبي على المخدة

وأنا ظابطة المنبه فيه عشان أقوم أراجع الفجر

ال Music والراديو و Mega FM وقت المذاكرة

الفيس والشعر لما المحاضرة بتبقى مملة وهي على طول مملة 

10/ 2011

بالفعل ارتباطي بالماضي أكبر من ارتباطي بالحاضر.. وماحدث قديماً لا يمكنني تجاوزه.. وهذا ما يعرقل كل خطوات حياتي 

6/2012

يا عزيزي كلُنا بكروش :Script trial no 1

كل واحد فينا عنده كرش .. مهما حاول يداريه ويغطيه .. لازم هيبان .. طيب المشكلة دلوقتي فين .. إننا كلنا بكروش ولا أننا بنحاول نداريها ؟؟