مات.. يموت.. موتاً

احم احم .. طيب بما إني مش عارفة ابدأ منين فأنا هبتدي من الأول خالص

.
.
. 

 أول مرة سمعت فيها عن الموت ..

.كنت أصغر من إني اعرف عندي كام سنة.. كانت خالتي اتوفت .. فطبيعي مش فاكرة غير إننا كنا وقتها في بيت جدتي .. ماما صحيتني بالليل .. وكانت بتعيط والمفروض إنها هتروّحنا لبابا في البيت بتاعنا .. مش فاكرة غير طريق طويل ضلمة كان لسة متسفلت وسخن وشبشب لابساه في رجلي بلاستيك ساح من السخونية واتقطع.. مش عارفة امشي الأرض سخنة أوي والشبشب بيلزق ومقطوع ومش قادرة وعاوزة أنام بعيط عشان ماما تشيلني .. ومش فاكرة اللي حصل بعد كدة .. غير إننا بعدها بأيام كان بابا بيزعق لنا لما نفتح التليفزيون .. وعرفت إن الموت دا حاجة وحشة أوي

أول مرة استوعبت مفهوم الموت ..

كنت في الحضانة.. كنّا مربيين أرانب فوق السطوح .. طلعنا أنا وأخواتي نلعب بيهم .. كنا ببساطة بنمسك الأرانب من ودانها ونرميها لفووووق ونسيبها تقع على الأرض .. احنا كنا بنلعب بجد وبنضحك وكمان بنحمّي الأرانب بالمياه عشان اتوسخت من اللعب .. ونزلنا عادي .. بعدها بشوية .. بابا دبحهم كلهم عشان طلع لاقاهم بيموتوا وروحهم بتطلع 

أول مرة خوفت من الموت..

كنت بحفظ قرآن في دار تبع الدعوة السلفية كنت في ابتدائي .. لمّا المحفظات ربنا يسامحهم ويهديهم .. كانوا بيكلمونا عن الموت وطلوع الروح وعذاب القبر والنار .. وسوء الخاتمة!!

أنا لما بعدي  من قدام الدار دا دلوقتي وبسمعهم بيحفظوا قرآن .. قلبي بينقبض وبختفي من الشارع

أول مرة اتمنيت فيها الموت.. 

كنت مكتئبة ..اكتئاب حقيقي بس بما إني الحمد لله مؤمنة ولا أزكي نفسي على الله.. فدا كان تحوير لل Suicidal thoughts اللي بتصاحب الاكتئاب

عارفين أنا عمري ماشوفت الموت على إنه دافع أحسن عشانه حياتي .. الفكرة كلها مبهمة ..مبهمة زي فكرة بالظبط احنا كنا عبارة عن إيه قبل ما نتولد .. زي ما محدش يعرف هو كان إيه قبل ما يتولد .. محدش يعرف برضه إيه اللي بيحصل لما بيموت غير الناس اللي بتموت نفسها ..

أنا لو بحسن حياتي لو برضي ربنا .. لو بنهي نفسي عن المنكرات فدا عشان ارتقي بنفسي .. ارتقي بروحي انتصر بالنور اللي جوايا على الطين ..عشان أعيش حياتي صح

 الدين موجود في حياتنا عشان ينظّم العلاقة بين الطين والنور..ميطغاش حد على حد..الطين اللي اتشكلنا منه وبنرجع له في الآخر ..والنور نفخة من روح الله .. واللي بتطلع برضه لربنا في الآخر ..  .. عشان كدة أنا مش زاهدة في الحياة .. بالعكس أنا بحبها جداً .. وفي نفس الوقت مش ناسية إنها مزرعة للأخرة .. الصراع بين النور والطين مش سهل أبداً .. واللي يقولك هو عارف نفسه أنهي واحد اللي غالب فيهم.. يبقى مش فاهم حاجة.. سيدنا أبو بكر كان بيقول فيما معناه .. إن لو حتى رجل في الجنة والرجل التانية لسة مدخلتش .. مش هيبقى متطمن ولا آمن إنه كدة خلاص ..

 طول ما أنت عايش الصراع بين الطين والنور بيفضل مستمر .. لحد ما في حاجة هتغلب في الآخر .. مفيش معادلة معينة أو حاجة تعملها تضمن لك إن النور اللي هينتصر .. مع إنك ممكن تكون بتعمل كل حاجة صح من وجهة نظرك بس ربنا مش متقبل .. حاجة من اللي بتعملها ..

ممكن تكون بتجاهد في سبيل الله من وجهة نظرك برضه.. بس جواك في نية تانية للي بتعمله .. ساعتها بيجي الموت .. أو بمعنى آخر كلمة النهاية بتنزل على الفيلم اللي كان من بطولتك في اللحظة اللي بتنكشف فيها نيتك الحقيقية.. وساعتها بنفهم يعني إيه..

{وَإِذْ قَتَلْتُمْ نَفْساً فَادَّارَأْتُمْ فِيهَا وَاللّهُ مُخْرِجٌ مَّا كُنتُمْ تَكْتُمُونَ }البقرة72

والله مخرج ما كنتم تكتمون .. مافيش نوايا هتستخبي ساعتها .. حقيقتتنا بس اللي بتظهر 

طب احنا ليه لما بنفكر في زمايلنا اللي اتوفوا وهما في سننا.. ما بنفكرش في إن ربنا اختارهم إنهم ميكملوش أكتر من كدة ..لكن في نفس الوقت ربنا اختارنا نكمّل زيادة عنهم "بقدرِ غير معلوم".. فليه منفكرش في إن ليهم نصيب من عمرنا دا .. وعشان كدة نقاسمهم في كل حاجة بنعملها لربنا .. لو صدقة .. لو دعاء لو ذكر .. وحتى لو مجهود بدني عملناه.. ماشينا بيه في الخير .. 

ديماً نفكر في  إن:

"يا رب في  ناس قدنا  قبضت روحها وهما عندك دلوقتي .. متساويين بالتراب..نفسهم يرجعوا يعملوا عمل صالحا واحنا لسة عايشين وبصحتنا.. فيارب خلينا احنا عملهم الصالح ..يارب احنا عباد غصب عننا هننساهم وهنكمل .. ممكن ننسى نتصدق أو ننسى ندعي لهم  أو ننسى ننوي مجهودنا وعملنا يبقى  صدقة ليهم .. لكن يارب أنت ما بتنساش حد فلا تقطع نظرك عنهم يا أرحم الراحمين.."

لو  كل واحد عمل كدة في الدايرة بس بتاعته اللي فارق فيها ناس صدقوني الموضوع هيفرق كتير .. معانا ومعاهم إن شاء الله

كُلنا سلمـــــــــــــــى

المساء

ايليا أبو ماضي

ألسحب تركض في الفضاء الرّحب ركض الخائفين

و الشمس تبدو خلفها صفراء عاصبة الجبين

و البحر ساج صامت فيه خشوع الزاهدين

لكنّما عيناك باهتتان في الأفق البعيد

سلمى ... بماذا تفكّرين ؟

سلمى ... بماذا تحلمين ؟

*

أرأيت أحلام الطفوله تختفي خلف التّخوم ؟

أم أبصرت عيناك أشباح الكهوله في الغيوم ؟

أم خفت أن يأتي الدّجى الجاني و لا تأتي النجوم ؟

أنا لا أرى ما تلمحين من المشاهد إنّما

أظلالها في ناظريك

تنمّ ، يا سلمى ، عليك

إنّي أراك كسائح في القفر ضلّ عن الطّريق

يرجو صديقاً في الفـلاة ، وأين في القفر الصديق

يهوى البروق وضوءها ، و يخاف تخدعه البروق

بل أنت أعظم حيرة من فارس تحت القتام

لا يستطيع الانتصار

و لا يطيق الانكسار

*

هذي الهواجس لم تكن مرسومه في مقلتيك

فلقد رأيتك في الضّحى و رأيته في وجنتيك

لكن وجدتك في المساء وضعت رأسك في يديك

و جلست في عينيك ألغاز ، و في النّفس اكتئاب

مثل اكتئاب العاشقين

سلمى ... بماذا تفكّرين ؟

*

بالأرض كيف هوت عروش النّور عن هضباتها ؟

أم بالمروج الخضر ساد الصّمت في جنباتها ؟

أم بالعصافير التي تعدو إلى و كناتها ؟

أم بالمسا ؟ إنّ المسا يخفي المدائن كالقرى

و الكوخ كالقصر المكين

و الشّوك مثل الياسمين

*

لا فرق عند اللّيل بين النهر و المستنقع

يخفي ابتسامات الطروب كأدمع المتوجّع

إنّ الجمال يغيب مثل القبح تحت البّرقع

لكن لماذا تجزعين على النهار و للدّجى

أحلامه و رغائبه

و سماؤه و كواكبه ؟

*

إن كان قد ستر البلاد سهولها ووعورها

لم يسلب الزهر الأريج و لا المياه خريرها

كلّا ، و لا منع النّسائم في الفضاء مسيرها

ما زال في الورق الحفيف و في الصّبا أنفاسها

و العندليب صداحه

لا ظفره و جناحه

*

فاصغي إلى صوت الجداول جاريات في السّفوح

واستنشقي الأزهار في الجنّات ما دامت تفوح

و تمتّعي بالشّهب في الأفلاك ما دامت تلوح

من قبل أن يأتي زمان كالضّباب أو الدّخان

لا تبصرين به الغدير

و لا يلذّ لك الخرير

*

لتكن حياتك كلّها أملا جميلا طيّبا

و لتملإ الأحلام نفسك في الكهولة و الصّبى

مثل الكواكب في السماء و كالأزاهر في الرّبى

ليكن بأمر الحبّ قلبك عالما في ذاته

أزهاره لا تذبل

و نجومه لا تأفل

*

مات النهار ابن الصباح فلا تقولي كيف مات

إنّ التأمّل في الحياة يزيد أوجاع الحياة

فدعي الكآبة و الأسى و استرجعي مرح الفتاة

قد كان وجهك في الضّحى مثل الضّحى متهلّلا

فيه البشاشة و البهاء

ليكن كذلك في المساء

حبيبي إنت يا فيلسوف

كنت بفكر كدة وبتأمل في علاقاتي الإنسانية .. لاقيتني حد لما بيتعامل أول مرة مع حد .. بيكسر التلج اللي بيبقى موجود .. واقعد اهزر واتكلم وكدة -ملحوظة:الخاصية دي بتشتغل للبنات بس- .. بس فعلياً مش بطور علاقتي بيهم أو اخليها اكثر عمقاً .. إلا لما اشوف في روحهم نور ربنا .. أو اقصد يعني علم .. أي نوع عندهم من العلم مش فارق بقى..
*
 الفكرة .. إني حسيت إن في حاجة هما بيعرفوا يعملوها وأنا مابعرفش .. أو حاجة هما اتعلموها وأنا لسة ماتعلمتش .. بقابل ناس عندهم نوعين من العلم .. علم أنا مهتمة بيه وعلم أنا مش مهتمة بيه .. علم مهتمة بيه زي الأخلاق والشخصيات وتطويرها والمعاني الفلسفية عن الصبر واليقين والإيمان والأحلام وتحقيقها .. وإزاي يأثروا في الناس ويسيبوا في حياتهم بصمة.. وحبي للناس دي بيبقى النسخة المصغرة لحبي للفنون والتصوير والأداب بكل أشكالها .. لأن مش حد ممكن يعملهاغير لما يكون عنده المعاني السابقة
*
وأيون دا علم لأنه نور من عند ربنا والعلم مش كتب وقراية .. العلم دا طريقة وإسلوب حياة ومش مرتبط بطبقة أو كلية أو فئة معينة..
*
أو حتى علم علمي زي اللي بدرسه في صيدلة وكدة .. في نوع من العلم مش مهتمة بيه .. حاجات زي إني اعمل كيكة وكوفيات واصطب ويندوز .. بس أنا بحترم جدا جدا الناس اللي بتعرف في كدة كفاية إنها عندها نور من ربنا برضه
*
أنا بتعرف ع الناس بسرعة جداً.. وغالباً التعارف الأول ليا مع حد بتفرد فيه شوية عن الحاجات اللي بعرف عنها او بعرف اعملها ..  بس عمري ما بطور علاقتي بيهم وأدخلهم في دايرتي غير لما بشوف النور دا جواهم .. حتى لو مكانش كامل بس بيدوروا عليه زي .. أو حتى إني سابقاهم في شوية حاجات وبنقلها لهم .. 

*

المشكلة بقى بتبدأ إني لو كنت فاكرة حد عنده نور ومطلعش كدة .. هي كل الناس جواها نور .. بس لو حد تعمد إنه يظهر لي أو يمثل لي نور مش جواه .. تن تن تششششششششش ببقى عاملة زي الموسيقى دي بالظبط ومش هعرف اشرح يعني إيه هو تسمعوها وخلاص

*

وعندي مشكلة كبيرة إني اتعامل مع حد برضه مكتفي بالنور اللي جواه ومش بيحاول يطوره.. أو حد إنه ميقدرش ويقدس الحتة دي جوايا ويشوفها حاجة مش مهمة
*

والمشكلة الأكبر إن في ناس مش بتظهر النور دا لحد غير للي يقرب منها .. فممكن في ناس اكون عارفاها من فترة كبيرة بس مش دخلتهم دايرتي فساعتها بضيع على نفسي وقت كبير قبل ما يدخلوا دايرتي  كان ممكن اتعلم منهم 

*

ومشكلة تانية إني أسأل حد سؤال في صميم النور بتاعه.. ولما معرفش يجاوب محاولش يدور أو الأنيل أنه يفتي فيه .. 

*

ساعتها بوقّعهم من دايرتي .. أنا حاسة إن دا مش صح وإن المفروض العلاقة الإنسانية تكون أكتر من كدة .. بس غصب عني بفقد الشغف اللي كان جاذبني فيهم من الأول .. وأنا أساساً شوية شغف فوق بعض.. وببعد بقسوة .. قسوة كبيرة بحجم الشغف اللي شدني ليهم في الأول .. وعلقتهم بيا وبيه..

وأنا لو اخدت قرار لحد إنه يخرج من حياتي ودايرتي.. مش ممكن يرجع  تاني ليها في يوم ..أنا مش بعرف أتعامل مع حد مش بيعلمني حاجة ومش بيتعلم مني حاجة .. وأنا مقاييسي بتبقى عالية وقاسية أوي ..أنا ببقى قاسية جداً وممكن شرسة لو حد عاوز يهدم معتقداتي وقناعاتي وإيماني مش بسمح لحد يقرب لهم أصلاً إلا لو كان هيضيف ليهم

أنا أساساً رافعة شعار "علِمني تجدني" أو "يا منوراتي غير لي حياتي " :D

اختبار حب

كنت بتفرج على الخواجة عبد القادر.. وبعدين زينب قالت له
أنا عاوزة عصفور بيتكلم من مصر وفستان خيط فضة وخيط دهب ومياة زمزم
وفعلاً جاب لها اللي قالت عليه.. ساعتها قالت له يتقدم لها عشان يتجوزها
ولما وشه جاب ألوان عشان أخوها مش هيوافق
قالت له أنا هسيب عندك العصفور والفستان بس اعمل حسابك
لو العصفور مات أو الفستان اتشد منه خيط
أنا مش هتجوزك يا عبد القادر حتى لو أخويا وافق
وسابته ومشيت

ساعتها افتكرت بوست كان كاتبه شريف القلاوي في المدونة بتاعته Be ReaDy To Be :- NiGmAwY 3la ToOoL ^&^
بوست قدييييم جداً أنا نفسي مش هعرف أطلعه
كان كاتب يعني إن في الحكايات الخيالية الأميرة هي اللي بتحط اختبارات للي هيتقدم لها 
بس الواقع إن العكس اللي بيحصل والولاد هما اللي بيختبروا البنات

المصيبة بقى إن في ناس كتيرة أوي عندهم التباس بين اختبار الحب واختبار الكرامة

فلو حد ساب حد عشان سقط وهو بيختبر كرامته .. احب أقول للي اتساب إن ربنا بيحبك

وهبة كمان كانت بتقوللي الولاد بقوا مغرورين أوي وبيتعاملوا على إنهم هما اللي لقطة

ومش يتعوضوا

بس أنا في نفس الوقت عجباني زينب أوي ..

مش فكرة اختبار.. لكن كفكرة إنك هتحقق لي اللي بحلم بيه 

زي مثلاً إننا نكتب كتابنا في المسجد النبوي

واحضر حفلة لعلي الحجار وعمر خيرت ومسار اجباري

وماتجيبليش هداية لبس وبيرفيوم وأدوات مطبخ ولا حتى ورد

تجيب لي هدايا متعاملتش لحد ومش ممكن تتهدى لحد لغير إسراء

زي الخواطر الكاملة للشيخ الشعراوي

ومجلد ألف ليلة وليلة 

وأي حاجة تانية على ذوقك 

و ممممم ممممممممممم

مش فاكرة الباقي صراحة 

بس أنا طيب مش كدة ها ؟ ها؟

أصلي لسة قارية البوست دا.. وحاسة بيقين إن كل حاجة ممكنة

:)

تحدث المعجزة عندما يصل الإنسان إلى أعلى مراحل الإيمان واليقين بأن ما يريده سيتحقق . دون أن يشوب ذلك شائبة بسبب أي أحداث من حوله ، مهما كانت تفاصيلها .

الإيمان واليقين العميق ، مع عزل الأحداث منتهى إفراد الله بالعبادة .

إن أثرت عليك الأحداث من الداخل ، فأنت أشركتها مع الله في إدارة الأمور ، وهذا عمق معنى الشرك ، لكنه شرك خفي لا يخرج من الدين ، لكنه يؤثر على حياة الأشخاص سلبا 

.

 أحمد عمارة

السمك يأكل الشيبسي أحياناً

عارفين لو بصيتوا على سمكة في حوض ..ديما في سمكة كدة عمالة تعوم بسرعة وتطلع وتنزل وتجيب الحوض من أوله لأخره .. تايهة ونفسكوا تعرفوا السمكة دي بتدور على ايه؟؟.

بقالي فترة كبيرة بصحي من النوم أنزل الكلية ومدخلش بيتنا غير في العشا.. مش مهم حضرت كام محاضرة ولا سكشن كان قد ايه.. انا هفضل في الكلية لآخر وقت.. بروح اتغدى وأنام وأصحى تاني يوم وهكذا.. إحساس إني بلف في ساقية دا مش لطيف.. ومش فاهمة أنا إيه اللي جبرني على كدة

حقيقي أنا مش بفهمني .. ومش بفهم الحجات اللي عاوزاها.. ومش بفهم الحاجات اللي كنت عاوزاها ولما جت لي زهدت فيها .. وهل أنا لازم افهم؟ 

أنا شخص Insecure مفتقدة ديماً الإحساس بالأمان .. ودا شئ بيتجاوز إسراء اللي في كلية لإسراء الطفلة .. ممكن أول مرة حسيته لما كنت في الحضانة وأول مرة اشتري شيبسي .. طلعت عشان أعلم الكراسة بتاعتي .. وأنا راجعة البنات اللي ع الحرف مش رضوا يعدوني .. طلعت ع الكرسي بتاع الميس .. عشان أعدي وأرجع مكاني من فوق الديسك .. الكوتشي بتاعي ساب علامة فوق الجلد الأحمر اللي بيبطن الكرسي.. الميس قالت مين اللي عمل كدة؟.. قولت لها أنا .. قالت لي امسحيه.. مسحته بأيدي اللي كان فيها زيت من الشيبسي .. -    Which Is Anyel- وكان رد فعل الميس إنها ضربتني بالكراسة في وشي.. واتعلمت درس مهم جداً اليوم دا .. إني مش المفروض آكل شيبسي..

زي بالظبط لما كبرت شوية في ابتدائي وكنت بحفظ في دار .. والميس كانت بتفرق بينا في المعاملة .. بنات جم بعدي وكانت عاوزة تسمع لهم قبلي .. ولما تمسكت أن دا دوري وإني المفروض أسمع الأول .. قالت لي خلاص سمعي.. وحسيت بقى بلذة إني أخدت حقي منها ومن اللي بتعمله فيا طول الصيف.. ولما بدأت أسمع اتلككت على كل أخطائي مكملتش آيتين وقالت لي باللفظ .. قومي من وشي.. طبعاً الدرس المستفاد هنا إني مش المفروض أخد حقي..

عارفين الشخصيتين دول وشخصيات أخرى .. أنا مش مسامحاها .. ومفيش حاجة ممكن تغفر اللي عملوه فيا .. غير يوم القيامة لما ربنا يقول لسة في حد ليه حق عندكم  .. وييجوا يدوني حقي دا هو أنا ساعتها بس أكيد هسامحهم .. بس الفكرة لما يعرفوا إنهم حلوين وزي الفل ومع ذلك في حاجة مش عارفينها منعاهم يدخلوا الجنة .. القلق الرهيب اللي ممكن يحسوه وقتها وأن كل اللي عملوه في حياتهم ممكن يكون ولا حاجة غير الحق اللي ليا عندهم ..وأنهم ممكن يدخلوا النار وبتعذبوا بحق مش ردوه.. لحظة صعبة مش كدة..  ويطلع في الأخر إن الحق اللي عليهم كان بسبب تشويه نفسية طفلة .. وإنه ذنب لا يغتفر مش زي ما هما كانوا فاكرين..ساعتها بس ممكن أسامحهم في الآخرة
ومحدش برضه يقوللي سامحي في الدنيا وكدة لإنه مش بالبساطة دي ..
لأني حتي لما حاولت أسامحهم وفشلت .. عيشت بتأنيب ضمير رهيب إني إنسانة وحشة ومش متسامحة.. وأنا اللي غلطانة في الآخر

نطلع قدام شوية في امتحان ال Math في الكلية لما كت لابسة أكتر فستان حبيته في حياتي .. فستاني الأحمر.. وتقريبا مكنتش عارفة أحل حاجة في الامتحان وانهرت من العياط بعديه .. عشان المشكلة في الفستان مكانش المفروض البسه يوم امتحان الMath .. 

وكله كوم ولما يكون عريس متقدم لي اللي هو مناسب وزي الفل وهيريحني .. بس طبعا كل الحاجات اللي حكيتها لأمي عن الإنسان اللي مستنياه  ومبادئي وأفكاري اللي مش هتناسب أي حد ومحتاجة حد يقدرها.. بتتنسى وبتتحول في الأخر لفلسفة وكلام كتب والدنيا مش زي الروايات اللي هبلت عقلي .. طبعاً هنا كانت غلطتي لـأني مش المفروض أحكي 

كل حاجة في حياتي بقيت كدة بقيت الشيبسي اللي مش المفروض اخده لمجرد إنه شيبسي وأنا إسراء وبس .. وحد لو جاه عطهولي بقول لأ عشان مفيش غير كراسة بتضرب بيها في وشي في الاخر.. 

 ومهما حد بقى يقوللي إنتي مش غلطانة والعيب مش في الشيبسي .. عمري ما هصدقه .. لإني بلف ألف وأتغلب مهما أتغلب على دا جوايا لازم أرجع لنقطة الصفر من تاني..وأرجع ادور عليه وألف في الساقية ..وعشان كدة Mainly أنا لا واثقة في نفسي ولا واثقة في حد


 عارفين لو بصيتوا على سمكة في حوض ..ديما في سمكة كدة عمالة تعوم بسرعة وتطلع وتنزل وتجيب الحوض من أوله لأخره .. تايهة ونفسكوا تعرفوا السمكة دي بتدور على ايه؟؟.. 
دي بتدور ع الشيبسي اللي ضاع منها.. اللي لما أكلته مرة انتهي بيها الحال من المحيط لحوض زجاج

الآتى نياتى جريح الآتى حصان مطلوق قلبك تعبان من الريح لكن مستنى شروق

يمكن يسقينا الشاى يمكن يعطينا الناى

ديماً بعمل حساب

ديماً بعمل حساب أن عمري وحلمي ما يتسرقوش مني .. واكتشف في النهاية إن مش هو دا اللي كنت عاوزة أعمله..

 اسمعوا ال 3 أغنيات دول هيفرقوا ويغيروا حاجات فيكم

Those were the days

Mary Hopkin

I dreamed a dream

Susane Boyle

My way

Frank Sinatra

عن الشطرنج وأشياء أخرى

الشطرنج دي مش من اللعب المفضلة عندي .. أصل أنا أخويا الكبير اللي علمهالي وكان بيفلس فلس رهيييييب وبيخترع قوانين تخليه يكسب وحتى لما حاولت أطبقها وألعب بقوانيه مكنتش بتطبق عليا فكنت أقل حاجة بعملها إني أقلب الرقعة وأقوم .. الكلام دا كنا صغيرين أوي بس فضل في حاجز بيني وبينها .. خصوصاً إني من الناس اللي محظوظة في اللعب في أي لعبة كنا بنلعبها كوتشينة بجميع ألعابها .. بنك الحظ بجميع ألعابه .. وطبعاً Hoyle board games اللي ع الكمبيوتر بكل اللعب اللي فيها .. كنت ديما ديما ديما بكسب وبسحق اللي بيلعب قدامي بفرق رهيب .. محظوظة وأساسي عندي قدرة على رسم فخ للي قدامي .. -الله أكبر بقى عشان الحسد :D-
المهم أجي بقى في الشطرنج وأنا شييييش بييييييش خاااااالص .. فبقى نقطة ضعفي اللي مش بحب افتكرها .. دا غير بقى لما الفلسفة دخلت معايا وكرهت فكرة الجنود اللي بتضحي عشان الملك يعيش 

بس بما إني ماشية من أول السنة بسياسة إني لازم أجرب حاجات جديدة وأتصالح مع ذاتي في الحاجات اللي مش بحبها .. بدأت أول السنة بالتصالح مع اللون البنفسجي .. اشتريت قلم STABILOحبر بنفسجي.. واللون كمان زي ما يكون  ما صدق فكان أول حاجة أكتبها بالقلم أو باللون  هو حلمي على سبورة الأحلام .. وبعدين بقيت برسم بيه ايموشن  سمايلي :) على ايد صديقاتي عشان كل مايبوصوا على ايديهم يضحكوا .. وعملت كدة بنية إدخال سرور على قلب مسلم .. دا غير إني بكتب بيه في كراسة الروشتات الكراسة اللي ناوية أطلع بيها من صيدلة بكل النوتس المهمة وهتفرق معايا في شغلي .. يعني من الآخر أكتر لون كنت بكرهه في حياتي -عشان مرة دوقت طباشيرة لونها بنفسجي وأنا صغيرة وكان طعمها وحش وقلبت معدتي فبقى اللون كل ما بشوفه بحس بطعم وحش وبطني بتوجعني - بقى أكتر لون معبر عن الخطوة الجاية في حياتي والابتسام

وعشان كدة قررت أتصالح مع الشطرنج .. وشايفة إنه مش ذنبي إن اللي علمني معلمنيش بذمة - ربنا يسامحك يا إسلام بقى :))-  نزلت كتب عن الشطرنج وقريت عن القوانين والنقلات .. أعجبت بشوية فلسفة فيهم هبقى أكتبها في نوت مستقلة .. النهاردة لعبت أول مباراة ليا .. ومع إني خسرت بس فخورة إني كملت للآخر ومقفلتش البرنامج اللي كنت بلعب عليه وقومت .. مش عارفة هوصل لإيه جايز مابقاش أحسن واحدة بتلعبه بس على الأقل هبقى أحسن من إسراء اللي متعرفش حاجة عنه .. وكفاية بقى أصلاً إني سعيدة جداً بالجزء ال Spirtual اللي بدأت اكتشف فيه :)

عشان نبقى واضحين الموضوع مش بالبساطة دي

إنك تلاقي حد مستكين وصابر وكله سلام داخلي ..وحكم بتطلع منه عن قدرة ربنا وارضا بالقضاء والقدر.. الموضوع مش بالبساطة دي .. دا هو مش بيتولد كدة .. وبيعدي بحاجات وبمواقف ما يعلم بيها إلا اللي خلقه .. لكنه بيختار في كل أزمة أنه يبقى كدة

الأغنية دي اللي مدتها دقيقتين واللي الكليب بتاعها تحس يا سلام هي دي العيشة ولابلاش .. التنفيذ مش بيبقى بالبساطة دي .. دي مرحلة عشان توصلها لازم تمر بمرمطة وبهدلة .. 

وحتى التدوينة اللي بتقراها .. أي تدوينة .. اللي كتبها مكانش قاعد مع نفسه فقرر إن الدنيا ماشية كدة.. الكلام اللي طلع منه سواء نصيحة أو نتيجة أو نظرية .. دا بياخد منه أيام طويلة أووممكن كمان عمر كامل.. كانت تجربة بدأت بدهشة وحيرة وقلق وعدم قدرة على اتخاذ القرار استشارة وبحث .. ثم حل .. والأهم من الحل الرضا بيه

كل حاجة بتلمس قلوبكم أومشاعركم .. كل حاجة قريتوها أوفكرتوا اللي كتبها دا عارف منين .. أو كتب الكلام دا إزاي؟؟ ..أو رسم الرسمة دي منين .. أو حتى سؤال جاه على بالكم مالهوش إجابة زي إيه اللي خلى فيليكس ينط النطة دي؟.. أو عمر سمرة إزاي قدر يتسلق قمة ايفرست من غير ما يستسلم؟ أدا بيبقى خلاصة لعصير من المعاناة .. والكاتب و الفنان و الشخص اللي قدر يعمل حاجة متعملتش قبل كدة  .. مالهوش أي ميزة عن أي حد بيمر بأي معاناة في الدنيا مهما كان نوعها .. غير طريقة تفاعله معاها واختياره هو هيفضل إيه من الكويس فيه مش هيسيبه يضيع أثناء مروره بالتجربة.. الحاجات الكويسة اللي بتفضل .. والحاجات الكويسة اللي بتظهر فيه لأول مرة هي اللي بتخليه ينجح كدة 

أنا مش عارفة حد فاهم كلامي ولا مش فاهمه.. ومش عارفة إذا كان في حد مهتم يقرالي أصلاً.. أنا كنت عاوزة أقول أي حاجة بتحصل في الدنيا مش بالبساطة اللي أنتم بتتخيلوها بيها .. .. متخلوش حاجة تعدي عليكم من غير ما تدوروا ع القصة وتعيشوا في التفاصيل

ملحوظة: أنا مستمرة في الكتابة في المدونة رغم إن جملة ليست هناك تعليقات كل ما بشوفها بتحبطني .. بكتب بس عشان مؤمنة إن شخصِ ما في زمنِ ما هيقرا كلامي وهيفرق معاه أوي

أنا قلبي لما حكى

صاحية بدري .. وطبعاً .. كل الأفكار العظيمة مش بتجي لي غير لما بصحى بدري ..
هاقولوا لي ليه يا سوسو .. ليه يا سوسو
عشان طبعا اليوم ما بيكونش لسة اتشحن
بحاجات ترجع تخليني أشوف كل حاجة عادية ومش عظيمة

هو احنا ليه كدة .. عمر طاهر قالها قبل كدة
الحياة مأساوية للناس اللي دماغها عالية
يعني أنا وابتهال واسراء الحياة بالنسبة لنا قمة المأساة
اكيد برضه جهاد ورغدة ولميا نفس النظام
أنا معرفش تفاصيل عن حياتهم زي ما اعرف عن ابتهال وإسراء
بس أنا اعرف إن دماغهم عالية 
ودا بيخليني أطرح سؤال 
هل العيب في الحياة ولا العيب في دماغنا
هو اللي أنا اعرفه إني لاقيت نفسي كدة
حاولت في فترة أني أكون تافهة وسطحية
بس فشلت

ودا مش معناه إنك يا إما دماغك عالية أو تبقى تافه
بس أنا مش بعرف أعمل كدة
أعمل زي إسراء فرماوي مثلاً
إسراء دي جميلة أوي بجد ماشاء الله
-بختك يا عم أحمد بيها- :DD
بحس إنها فاهمة الفولة وفاهمة كل حاجة
بس الدنيا بيس وعادي وإيه المشكلة
وليه نعرّضها .. لما ممكن نكشكشها 
-ربنا يديم عليها ضحكتها يارب-

مش بعرف أمسك العصاية من النص
أنا يا إما ابقى فاهمة أوي يا إما ببقى حمارة
مفيش حل وسط

مع إننا والله
مش عاوزين في الآخر غير حد يطبطب علينا أوي
الطبطبة دي اللي مش بتبقى عالضهر وخلاص
لا الطبطبة اللي بتوصل لاعماق الروح
لمكان جواك مكنتش تعرف إنه موجود عندك قبل كدة
طبطبة ممكن تعيش حياتك كلها على ذكراها
ومتعوزش حاجة تانية

ممكن برضه حد يعلمنا إننا منخافش
مش مهم من الحياة
بس منخافش من نفسنا ومن الحاجات اللي بنحبها وبتفرحنا

أو كمان يعلمنا إننا منعلقش سعادتنا على حد
حتى هو نفسه منعلقش سعادتنا عليه

إيييييييه دونييييييييييييا

المهم بقى أنا هنزل الكلية
بعد ما شربت شاي بالقرفة والجنزبيل
وسمعت الأغنية دي دشلداشر مرّة

دعوة للتصالح مع الذات تاني مرّة

أول مرّة تصالحت فيها مع نفسي  

قولت كلام حلو أوي بس نسيت أهم حاجة

 {فَإِنَّ مَعَ الْعُسْرِ يُسْراً }5 {إِنَّ مَعَ الْعُسْرِ يُسْراً }6 الشرح

أن للتوكيد .. دا غير إن يسرا نكرة مرتين ومعناه أن كل مرة فيهم بيسر جديد .. على عكس العسر المعرفة

دا معناه إنه عسر واحد قصاده يسر مرتين 

طيب دلوقتي بقالي فترة مرتبكة ومحتارة وبراجع نفسي في حاجات مهمة وبما إن بجد حقيقي دا مش وقته فأنا هأجل الموضوع دا لحد ما أخلص امتحانات ولحد الفترة دي هفضل افتكر في الحاجات اللي بتخليني أتصالح مع ذاتي 

راضية الحمد لله

هو بغض النظر عن التقلبات وضغط الامتحانات بس الترم دا كان مرضي .. الحمد لله بقيت بعمل أكتر ما بتكلم ودا شئ جميل جداُ وتطور في شخصيتي .. أنا بقيت بتكلم عن النتيجة النهائية للفعل فقط عشان أسجلها في دفتر الذكريات وعشان برضه مش بحب الناس اللي محدش بيحس بيها ومش بتلهم حد .. لكني بطلت أتكلم عن حاجة عاوزة أعملها .. عشان في الغالب بتكلم بس وما بعملهاش.. أياُ كان الحمد لله

حالــــــــة (2)..حبيب بطعم الجبنة التُركي

حالــــــــة (2)..حبيب بطعم الجبنة التُركي

أنا اكتشفت إن بقالي عشريـــــــــــــــــــــن سنة بفطر وبتعشى وباخد ساندوتشات المدرسة معايا .. جبنة تُركي..صنف وحيد باكله يومياً أكتر من مرة في اليوم لمدة عشريـــــــــــــن سنة .. وأحيييييه لو في يوم نسوا يجيبوا مش ممكن اكل حاجة تانية أبداً..


اكتشفت مع إني شخصية ملولة جدااا واللي تحبه الصبح عادي جداااااً إني أكرهه بالليل .. بس في حاجة فضلت أحبها وأعشقها وأدمنها الفترة دي كلها وأعتقد لباقي حياتي برضه حفضل أحب الجبنة التركي


والسؤال .. أنا ليه بحبها كدة؟؟ أصل اكتشفت إن الجبنة التركي ..في كل مرة باكلها بحس أنها اول مرة ليا أدوقها  . نفس الانبهار.. بطعمها..نفس تغميضة العين للحظات ..نفس المضغ براحة عشان مفوتش أي متعة .. كل مرة هي أول مرة ..فعلا الجبنة التركي دي الجبنة الوحيدة اللي طعمها بيختلف من بياع لبياع ومن مصنع لمصنع  ع العموم انا مش حعمل تحليل المرة دي لطعم الجبنة التركي
في حاجات أهم


مثلاً
..من غير كسوف و عندي ثقة فيك بسمعها كل يوم من سنة وبحبها جدا وعمري ما زهقت منها..دا لأن طعمها طعم الجبنة التركي ..كل مرة بسمعها بكتشف معاني جديدة في الأغنية بنفس الانبهار كل مرة هي أول مرة


مثلاً ..
 ابتهال
كل مرة بنتكلم فيها بتفتح عيني على حاجات جديدة ..بتقولي على مقولة ..بتفرق معايا جدا .. كتير اوي بنسى اللي كنا بنتكلم فيه لكن بفتكر المقولة بس النهاردة قالت لي "لم تخيب أبداً خيبتي فيك".."قبلك كان عندي أحلام..بعدك أنا "لا أحلم".."إذا أصبحت في ال 30 مثلما كنت في ال20 ..فأنت أهدرت 10 سنوات من عمرك
حبقى أعملها قاموس إن شاء الله..
المهم إن.. :))
كل مرة هي أول مرة


الحب مفروض يكون بطعم الجبنة التركي..كل مرة نشوف بعض فيها كأنها أول مرة بنتقابل ..كلامنا اول مرة نتكلم فيه..ميبقاش الإنسان اللي كان مثير للتساؤل بس لما اتفهم بقى ممل .. وأنا كمان مبقاش الست التقليدية اللي كانت مهتمة بنفسها وبعد كدة
فجأة صحى من النوم يلاقي إنه متجوز واحد صاحبه  ..
كل مرة لازم تبقى أول مرة
أنا عمري ماحبيت بجد .. بس يوم ما أقول يا حب..لازم حببيبي يبقى بطعم الجبنة التركي


متعرفوش بقى بيتباع فين؟؟
:DDDD


يُتبع

حـــــــالة

Hصل احنا من يومين بالظبط اشترينا دش جديد لأول مرة يدخل بيتنا ولما جيت اشوووف واتفرج اكتشفت حاجات عجيبة..

الأفلام الأجنبي

===========

1-إن مثلا أفلام الرعب بقيت كوميدية جداا بالنسبة لي..أنا اللي بخاف من خيالي.. بقيت بستمتع بمصاصين الدماء وهما بيمصوا دم ضحاياهم..بس المرة دي بقيت بشجع مصاص الدماء .. وبفرح لما حد جديد يتحول.. انا شايفة ان مصاص الدماء شخص جميل جدا ومش شرير ولا حاجة .. ع الاقل يعني مش ممل وتافه ومش مخادع .. عارف هو عاوز ايه منك ومش بيخبي عليك .. من اول مرة شافك فيا صارحك بالحقيقة ..هو ممكن الدم يكون طعمه مالح شوية بس اكيد ليه ميزات لسة مكتشفتها.. وبعدين ايه اللي خلاُك تعتقد أصلاً انه شرير..يعني إنت حد كان مص دمك قبل كدة .. عشان تعرف .. مش يمكن تبقى حاسس إحساس أحلى وإنت معندكش دم

ولما وحش كان بياكل واحدة من أمعائها.. هي ليه كل الوحوش تقليدية هو ليه مجريش معاه شوية كاتشاب او مسطردة أكيد طعمها حيبقى احلى .. بس كان حيبقى شكله مضحك اوي ان واحش كدة طويل عريض ماشي بإزازة مسطردة في ايده هههههههههههه

2-الأفلام الرومانسية بقيت سخيفة جداًا 

يعني طول الوقت .. بتبقي عن مثلث الحب .. دا بيحب دا ودي بتحب واحد تاني والتاني مش حاسس بيها

او بتتكلم عن واحد غني مش مقدر ان الجمال جمال النفس ويقعد يتحفنا معاه وهو بيكتشف الحقيقة دي لاول مرة

او حتى تيمة  ان الواحد مش بيقدر اللي في ايده غير لما يضيع منه..طب ما يكتبوا المقولة دي وخلاص مش لازم نقعد متحنطين ساعتين

قنوات الكرتون بقى

============

1-جيري هو اللي شرير مش توم..توم ديما قاعد في امان الله ..جيري هو اللي مصمم يروح يشرب اللبن من قدامه .. او ياكل الجبنة اللي توم مسئول عن حراستها .. ركزوا شوية وإنتم يتتفرجوا على توم وجيري حتلاقوا ان جيري هو اللي بيجر شكله وهو اللي بيبدأ

2-إن الأميرة فضلت تستني الامير اللي حينقذها.. بس هو مرحش لإن الدقيقة بتفرق مع فودا فون

القنوات الدينية

=========

1-أنا الحمد لله وبلا فخر مش بحبهم ومش بتفرج عليهم..أصلاً ..في ناس منهم بجد محترمة وعمرها ما باعت بس دول أمن الدولة كان مظبطهم أول يأول لإني بعتبر الشيوخ اللي فيها من فلول النظام..يعني لو هما كانوا مفيدين  وكلامهم مؤثر.. ليه لحد دلوقتي فيه كباريهات وفي خمرا ..وليه السياحة دي مش سياحة اصلا دي حاجة تانية اتكسف اقولها.. ليه الناس بتسرق والمخدرات منتشرة والأفلام الإباحية ..حد يقوللي هما بيعملوا ايه بالظبط ما دام كل الحاجات دي بتزيد أصلا.؟؟ ومش بتقل ..يعني من وجهة نظري يا إما هما بايعين..يا إما هما بيتكلموا بطريقة والدنيا كلها ماشية بطريقة

ثواني عشان مبقاش اخدت العاطل مع الباطل انا بسمع إذاعة القرآن فقط وبحبها جدا ..بحب الشيخ الشعراوي لإنه بيخليني ابص للقرآن بصة جديدة مؤثرة..المام الغزالي..لأنه بيربط الدين بالدنيا بتطبيق عملي مش منفصل .. مصطفى حسني ..حلو كبداية لحد لسة بيلتزم..عمرو خالد ..لأنه بيخلينا فعَالين ..

أما بقى رياضتي المفضلة بقيت 

=================

monester truck

يااااااا لما عربية كبيرة كدة تطير تفعص وتتطحن العربيات الاصغر منها  وااااااااو بجد 

اكتشفت حاجات تانية كتير برضه

يُتبع