الفراغ القاتل

هو ليه ديماً الفراق صعب؟

يمكن بسبب الفراغ القاتل اللي بيسيوه جوّانا وهما ماشيين

ولا يمكن التفاصيل اللي مش بتروح من بالنا عنهم أبداً

أو حتى الخوف من الأيام اللي جاية وهما مش فيها

بقالي فترة بفارق في ناس

(1)

أستاذ وليد مات-ربنا يرحمه-

بس كل درس علمه لي لسة صاحي جوّايا

بيفكّرني بيه

أستاذ وليد مات 

وأكبر طموح ليا معاه دلوقتي

إني أشوفه ولو مرة أخيرة في الحلم

(2)

يوسف سافر القاهرة -ربنا يخليه ويرجعه بالسلامة-

عشان أهرب من لحظة الوداع

حطيت له جوّا التي شيرت بتاعه تلج وأنا بحضنه

بعدها بيوم ماما كانت عاملة لنا عصير 

وانا مش شربته كله عاملة حسابه فيه ناسية انه مسافر

(3)

اسراء اللي اتحولت سكشن تاني

مش عارفة هقعد مع مين بين السكاشن

ومش عارفة مين ممكن يصبرني غيرها

ولاحتى عارفة هعمل ايه في البرزينتيشن من غيرها

(4)

دفعة 2011

 شباب صح

مشيت النهاردة من الحفلة بحجة إني متأخرة

مشيت بس عشان مش عاوزة أسلم عليهم

أو أبص لهم بصة فيها احتمال اني معرفش أشوفهم تاني

مشيت عشان مكانش عندي أدنى استعداد أعيط قدامهم

كفاية السح اللي سحيته لندى يوم حفل ختام النشاط الاتحاد

فارقوني ومش فاضل منهم غير حاجات صغيرة مش ممكن تفارقني

كلماتهم في الأوتوجراف

الفرحة اللي بتنط من عيونا في أول لحظة بنشوف فيها بعض

فيديوهات الكواليس

والصورة اللي مهما كبرنا عنها أو بعدنا

أحساسنا فيها هوّ هوّ

مفيش كلام أو إحساس تاني هقدر أتكلم عنه

زي الكليب اللي فوق ما هيعبر عنه

يا ليلة عودي تاني

يا ليلة كوني تاني

خدينا طهر وروح

وردّي فينا الروح

خدينا ضمّينا دفينا

يا ليلة عودي تاني

29/9/2011

my stickman adventure.

دي لعبة حلوة أوي وإبداعية جداً  

أغاني التسعينيات (1)

التسعينيات أحب فترة على قلبي
لإني عيشت فيها طفولتي
التسعينيات دي فترة مكانش ليها ملامح
يعني مفيش فيها انجازات ولا حروب ولا حاجة
وحتي الأفلام والإعلانات مكانش ليها ملامح
بس الأغاني بتاعتها مش ممكن أبداً أنساها
كان ال tops فيها
مصطفى قمر وإيهاب توفيق ومحمد فؤاد وعمرو دياب
وكان ظهورهم متواكب مع ظهور ال walkman*
وطبعاً مش ممكن أجيب سيرة الواكمان من غير ما أجيب سيرة الشرايط
اللي لونها بني ولو فكتها هتتكعبل منك وتتعقد 100 عقدة
ملحوظة الشرايط دي كنت بفكّها عشان أطيّر بيها الطيارة بدل الخيط
كان ظهورهم برضه نبؤة لظهور
بسكوت الشمعدان والكاراتيه اللي كانوا طفرة في صناعة الحلويات للأطفال

ونبدأ بأول أغنية سمعتها في حياتي
دباديبوووووووووووو لِـ مصطقى قمر

الأغنية إنتاج 92 وأنا من مواليد 91
بس بيتهيألي والله أعلم إني سمعتها 93 

وأنا عندي كدة سنتين ونص باين

بس شووور إنها أول أغنية اسمعها في حياتي

وزي ما هتلاخظوا كعادة أغاني التسعينيات
الكليب مش مترابط خالص صورة من هنا وصورة من هناك
ومصطفى قمر منكوش
مش موضة الشعر المسبسب والمتجلجل
اللي ظهرت في ال 2000
P.S
مكنتش أعرف إن دباديبو دي تبقى دباديب رجليه
كنت فاكرة دباديبو نسبة للدبدوب بتاعي لعبتي
زي ما عملوامنه فستنان كله دباديب
عملوا ليه أغنية كمان
:D

*الواكمان دا تسجيل صغير بسماعات سهل الحمل بيشتغل بالحجارة أو بالشحن بديل ال MP3 في الفترة دي

إعترافات مُراهقة:ريهام ♥

النهاردة الصبح قابلت ريهام صديقتي الصدوقة  اللي ماشوفتهاش من 3 سنين من ثانوي ..كنّا راكبين مع بعض المشروع ودي كانت النتيجة  !

 (1)

ذكرياتي عن ثانوي مش كتيرة مش فاكرة منها غير إني مرة كنت في أوضة الوسائط متنحة في السقف لإن مدرستي كانت فيلا للأجانب من طراز التلاتينيات وكان السقف عالي أوي ومنقوش نقوشات حلوة زي ما كل حاجة كانت حلوة وقتها  .. كل اللي فكرت فيه ساعتها يا ترى كمان سنة من دلوقتي هبقى قاعدة في كلية إيه .. يارب أخلص بقى

* * * *

سقف الكلية اللي برغم حجمه إلا إنه سقف واطي وبارد أوي من التكييف 
سقف لأجنة أحلام معادتش لاقية دفا عشان تكمّل نموها .. 

متقدرش تتنفس في المدرج من الزحمة

  براحها لسة في مدرسة الثانوي

(2)

شلة ثانوي  في الدرس لما المدرس طلع يرد ع التليفون

وساعتها صممت إن حد يقولي نكتة  في المناسبة دي
وصوت   8 بنات
بتضحك في نفس الوقت خلّى الجيران تشتكي

لأننا كنا فوق جامع وباقي العيال مش فاهمة ايه اللي بيحصل -كانت أول وآخر مرة ضحكت فيها من قلبي بجد 

* * * *

محاضرات د.نبيل في الكلية .. 

كنا ديماً بنتحذّر من محاضرته بس اللي سمعناه مكانش ممكن يتقال لحد 

كانت بتخلّيني وبتخلّي البنات كلها تنكمش في البنشات وتحمّر.. 

مش من كلامه على قد من ضحك الولاد اللي قاعدين ورانا 

ضحكهم المُفجع بجد 

ضحكهم اللي بينشف الدم في عروقنا

(3)

والمدرسة كانت بتحتفل حفل ختام العام بس احنا احتفلنا فيه في الفصل على طريقتنا الخاص زغاريد وطبل ورقص المدرسين كانوا في حالة ذهول لإن دا مستوى مدرسة متفوقات ! 

ميعرفوش إن دا مستوى بنات مُراهقات

(4)

كان إحساس كسر القوانين ممتع أوي

لمّا كنت بزوّغ اخر اسبوع من الفصل

وأنزل أقعد في الحوش  العقاب كان نفسه ممتع

لإن معناه إن إنت لسة مسؤل من حد

(5)

ذكرياتي عن ثانوي مش كتيرة بس 

إحساس الوداع في آخر يوم دراسة كنت حاسة في آخر جرس ضرب

مكانش جاي بفرج مستنيّنه بفروغ الصبر على غير العادة

زي ما يكون ..ضرب طلقة في قلبي وسابه مرمي في أرض الحوش محبوس وحيد مش عارف إيه اللي بيحصل ؟خايف بيرتعش بيعيّط بينزف ..

طلعت من غيره وسيبته بيعاني 

قلبي اللي لسة في الحوش مرجعليش لحد دلوقتي  

بينتقم مني

(6)

ريهام البنت الجميلة الشقية الناعمة اللي دمها خفيف

ريهام لما كانت بتدخل مكان مش ممكن يفضل زي ما هوّا 

كل حاجة كانت بتقول إن ريهام موجودة فيه

ريهام حلم كل ولد في الدنيا :)

ريهام كانت حاجة من الحاجات اللي سيبتها وودعتها على أمل إني حرجع لها

ومش عارفة بقى مقابلتنا النهاردة دي فرصة إني أرجّع اللي اتسرسب مني وانا مطنشة

ولّا مجرد لقاء مع الماضي

P.S

بحبِك أوي وآسفة عشان قصرت معاكِ السنين دي كلها

تم بحمد الله

الحب من أول خبطة :D

أول ما دخلت الكلية وأنا عندي 17 سنة

مكنتش لسة فوقت من العته بتاع ثانوي

وصراحة كنت شايفة إنها فرصة إني أحب بقى وكدة

بس اللي كنت أعرفه عن الحب إنه بيجي من أول خبطة

يعني ديماً البطل والبطلة يتخبطوا في بعض

السكتشات توقع والنضارات

وهوبا يحبوا بعض

كنت مستنية الفرصة تجي لي في خبطة أتخبطها صدفة

بس بعد ما قعدت 3 سنين في الكلية 

متخبطش فيهم غير مرتين

مرة في الأسانسير دوخت فدوست على رجل اللي واقف جنبي

:D

ومرة تانية واحد كان بيخلع البالطو واحنا طالعين من السكشن

فرزعني حتة لكامية في وشي بس لكامية ايه كانت عنب

:DDD

فهمت إن الحب عمره ما كان كدة

الحب بيجي بالراحة وبهدوء

ومن ناس مكناش نتخيل إننا كان ممكن نقابلهم أو حتى ممكن نحبهم

هو أنا صحيح برضه لسة محبتش بالطريقة التانية

بس أنا بقى معنديش استعداد أفقد عين أو عاهة مستديمة

في خبطة جديدة 

:))))

التدوينة مخلصتش أنا عاوزاكم تحكوا لي عن فكرتكم عن الحب ؟؟

 وقابلتوه ولا لسة ؟؟

 ويا ترى وجهة تظركم اتغيرت عنه؟؟

P.S:

الدوخان في الاسانسير نشاط طبيعي بيحصل لي :))