الجمعة، 30 نوفمبر 2012

خسارة تدفع للفوز وأشياء أخرى

النهاردة كانت مسابقة المكتبة للقصة القصيرة .. ومش فوزت فيها .. أكيد كان نفسي أكسب بس ليا شوية ملاحظات:

1- أنا لسة مبتدأة .. واللي فازوا النهاردة كانوا كبار في السن كان أقل فرق 10 سنين على الأفل ..حسيت إن فوز واحدة مبتدأة ممكن يكون ظلم لناس خبرتها بالسنين .. طبعاً الموهبة مالهاش سن .. لكن تطويع الموهبة دي والوصول بيها لأكبر شكل جمالي ممكن محتاج كتير أوي ..دا غير إن فعلاً القصص الفايزة تستحق أن تفوز بجدارة حتى شوفوا بنفسكم 

2- كان فيه كابل النهاردة ... اللي فازت بالمركز الثالت زوجها كان رااااااااائع صراحة هي مهندسة في اواخر  الاربعينات وقاهرية ..جوزها كان جاي معاها يدعمها وكان فخور بيها أوي .. وتعليقاته كانت في غابة الرقي والاحترام .. مكنتش حاسة بغير .. أنا عاوزة من دا يا حزمبل أنا عاوزة من دا :) :) ... أومال ليه اللي -الله يسامحهم بقى- بيقولوا لي الناس دي مش موجودة وإني المفروض اقبل بأي حد هيعيشني كويس وخلاص .. يارب لا تشمت بي الأعداء

3- في ناس كتير مشيت لما ندهوا ع المركز الأول مكانش اسمهم.. أنا فرحت أوي صراحة إنهم مشوا .. عشان اللي مش بيستني يشوف مين المركز الأول وليه ? عمره ما هيبقى مكانه .. أحسن خلوا المنافسين يقلوا :) :))

4- أنا واخدة مركز تاني جامعة السنة اللي فاتت .. ودا مش معناه أبداً أني كدة وصلت أو ابقى حاجة .. صحيح هو أنا كدة تفوقت بس على شريحة واحدة صغيرة في السن .. كبداية كويس لكن مش كفاية ومش حاجة


ملاحظات مالهاش علاقة بالمسابقة:

1- فرحانة بدعم إسراء صوابي ليا.. أول مرة من خمس سنين تهتم كدة وتشجعني

2- لو ابتهال مجابتش الكيت كات اللي هتصالحيني بيها يوم السبت هزعل أوي بجد ..ولو زعلت بجد كدة مفيش حاجة ممكن تصالحني


3-بقالي فترة الكوابيس ضيفة عليا .. واكتشفت إن نومي مش طبيعي .. أنا مش بنام متواصل من ساعة ما دخلت الكلية.. لازم اصحى بعد 4 أو 5 ساعات من النوم ومحتاجة ساعتين تلاتة عشان أرجع أنام تاني ..مكتشفتش كدة غير لما كنت بتكلم مع صاحبتي وقالت لي ازاي وكانت مذبهلة اوي  من إني كدة من 5 سنين .. كمان لما خدت فارماكولوجي وسيوتيكال ولاقيت في علاج بيتاخد لل Intermittent sleep.. مع إني والله ممكن اكتفي بهدهدة زي دي عشان أنام على طول





الثلاثاء، 27 نوفمبر 2012

أحلامي

النهاردة لاقيت فولدر بتاعي بعنوان أحلامي .. بتاريخ 24/4/2011
بقتحه لاقيت الصور دي فيه



















حاسة بإحساس مين دول أصلاً :d

عشان أحلامي دلوقتي اختلفت كتييييييييييييييير
مع انهم 7 شهور بس فرق :))

الأربعاء، 21 نوفمبر 2012

أنا حلوة وزي الفل :D

أنا عارفة إني مش بكتب هنا غير على الوجع والاستياء.. واللي هياخد المدونة دي ك Source
عن كل شخصيتي يبقى هو ميعرفشي حاجة عني .. أنا إنسانة مش مهزومة ولا منكسرة ..
بس هو الحظ بقى إني مش بعرف اكتب غير في الحالتين دول

أنا الحمد لله ليا انتصارات برضه في الحياة ..

 يعني مثلاً واخدة مركز تاني قصة قصيرة على الجامعة :D

.. عملت مجلة فارما بظ لشباب صح من وأنا في سنة أولى :d

نظمت يوم ثقافي مع ابتهال في سنة تانية
كنت عضوة في مويك في سنة تالتة وانضميت حالياً لبصمة 
حافظةعدة أجزاء من القرآن الكريم :)
بعد برنامج في اذاعة صوت صيدلة وانا في بكالوريوس دلوقتي
السنة اللي فاتت كانت أول سنة أجيب فيها جيد جداً وأول سنة ابطل تزويغ من المحاضرات
وبألف رواية اسمها لذلك أحببتها يوماً
ليا صحاب كتير جداً غير اسراء صالح وابتهال واسراء فرماوي وهبة عادل .. اللي مش بتكلم غير عنهم .. زي اسراء صوابي أول صديقة ليا في الكلية واسراء السيد أقدم صديقة ليا من اولى ثانوي واسراء شرقاوي واسراء صبري واسراء ابو زيد ورغدة وجهاد يوسف وجهاد جابر وطبعاً سلمى ومي ولميا وحنان
انطباع الناس عني ديماً ايجابي الحمد لله وبيستغربوا لما بيلاقوني زعلانة .. يا سلام لو كان معايا الاوتجراف بتاعي كنتوا صدقتوا على طول والله 

مش معايا منه ع الجهاز غير الصفحة دي


دي صورتي بقى مع دكتور منير :)

طب مش بالذمة مش ابقى حلوة اهو وزي الفل
:) :) :)

الثلاثاء، 20 نوفمبر 2012

رسايل من ربنا : الرسالة رقم 7


ربنا على طول بيبعت لنا رسايل .. لحاجات كتيرة بنفكر فيها سواء كنت أفكار كويسة بيساعدنا إننا نكمل فيها .. أو أفكار سيئة بيساعدنا إننا منمشيش فيها .. بقالي 3 اسابيع الرسايل مكثفة من ربنا ليا بالصدفة كنت بعدهم .. ولما وصلت النهاردة للرسالة رقم 7 .. قررت اكتب عنهم

امبارح كنت اعلنت اعلان عظيم  وبرغم من إنه يبدو إنه موجع بس بالعكس ابسولوتلي دا بيوحي بقمة معاني السكينة والرضا.. المهم نمت وصحيت بالليل وأنا عمالة أردد " مَنْ كَانَتْ هِجْرَتُهُ إِلَى اللَّهِ وَرَسُولِهِ فَهِجْرَتُهُ إِلَى اللَّهِ وَرَسُولِهِ .. 

واكتشفت إن كل اللي فات دا مكانتش هجرتي لله ورسوله .. كنت مثلاً لما بتكلم عن الارتباط  كنت شايفاه إنه الحل السحري لمشاكلي وعقدي النفسية.. شكايتي من إني دخلت صيدلة غلطة وإن كان هيحصل إيه لو دخلت كلية بحبها موهوبة فيها .. كنت برضه بفكر إن كدة كل مشاكلي هتتحل .. لكني للأسف مكنتش حاجة في دماغي إني بعمل كدة لربنا وبس .. أنا كان نفسي في كدة عشان ابقى مبسوطة.. صحيت امبارح وأنا بقكر في إن كل خطوة في حياتي هي هتبقى هجرة لله ورسوله.. وكل طلب وأمنية بتمناها للغرض دا .. هجرة من السجن اللي سجنت نفسي جوا نفسي .. لحاجة أكبر وأعظم وأبقى وزي ما الصوفيين بيقولوا إن الهلاك إنك تعشق وتحب وتتمنى هالكين زيك ..

المهم دلوقتي بقى لاقيت المقال دا ودي كانت الرسالة رقم 7 اللي ربنا بيقولي فيها صح اثبتي بقى على اللي وصلتي له

 هو أنا لسة مش عارفة هستغل دا إزاي ؟ بس أكيد ربنا هيبعت لي حاجة ترشدني .. أنا واثقة إني في يوم من الايام هعمل حاجة عظيمة جداً هتخدم البشرية .. وربنا بيؤهلني وبيربيني من دلوقتي ليها :)

الحديث الكامل
 وعن أمير المؤمنين أبي حفص عمر بن الخطاب -رضي الله عنه- قال: سمعت رسول الله -صلى الله عليه وسلم- يقول: إنما الأعمال بالنيات، وإنما لكل امرئ ما نوى، فمن كانت هجرته إلى الله ورسوله فهجرته إلى الله ورسوله، ومن كانت هجرته لدنيا يصيبها أو امرأة ينكحها فهجرته إلى ما هاجر إليه . 

تصوير هبة عادل


الاثنين، 19 نوفمبر 2012

إعلان


أعلن أنا إسراء يوسف وأنا في قمة شعوري بوجع فقدان الأمل .. والإحباط والمرارة من القوالب والعقليات الجامدة..واكتشافي أن اللي كنت بصبر بيه نفسي عشان أوصل لبكالوريوس صيدلة من غير ما انتحر ولا أنشل ولا اتنقط ولا اتجن تقريبا طلع وهم.. وبعد 6 ساعات عياط.. ساعتين منهم كانوا على كتف ابتهال .. وبعد ما بوظت فرحة إسراء صالح.. وحصلت على تعاطف إسراء صبري لدرجة إنها كانت هتشتري لي فانتا .. وقلشت رضوى وهي جاية تكلمني وسيبتها ومشيت بمنتهى قلة الذوق.. بأعلن أنا في هذه اللحظة الحرجة أني مش زعلانة وراضية وصابرة ومش هتنازل عن هدفي أنا بس هغير الخطة.. ودي آخر مرة هوجع الناس معايا بوجعي -إن شاء الله-

الأحد، 18 نوفمبر 2012

قالت شادن (2): الناس معادن


بما إن الناس معادن .. فطبيعي تقابل أشكال مصدية
:D :D :D

ملحوظة: مش عارفة الحكمة من تأليفها ولا .. بس أول مرة عرفتها كانت منها

السبت، 17 نوفمبر 2012

شفاعة


 مَّن يَشْفَعْ شَفَاعَةً حَسَنَةً يَكُن لَّهُ نَصِيبٌ مِّنْهَا وَمَن يَشْفَعْ شَفَاعَةً سَيِّئَةً يَكُن لَّهُ كِفْلٌ مِّنْهَا وَكَانَ اللّهُ عَلَى كُلِّ شَيْءٍ مُّقِيتاً{85} النساء

الأحد، 11 نوفمبر 2012

ممكن مثلاً مثلاً يعني

يعني مثلاً مثلاُ يعني لما ألاقي حد من صحابي بيمر بتجربة قاسية .. وهي لسة عايشة في الاذبهلال والصدمة.. بينما أنا حاسة بيها أوي وحاسة برضه إنتِ بتتكلمي في ايه؟؟ دا أنتِ قديمة أوي دا أنا مريت بيها من زمان أوي وعديتها .. تقريباً مفيش حد مر بحاجة قاسية غير لما أكون مريت بيها الأول  وحتى القرارات اللي بياخدوها غلط نتيجة لصدمتهم.. بكون خدتها برضه.. وجربتها وبقعد أقنعهم انهم مينفعش يعملوا كدة لإن النتيجة مش زي ما هما متخيلين..
ممكن مثلاً مثلاً يعني.. إن كل التجارب المؤلمة عديت بيها في حياتي  دي عشان ربنا يجعلني سند ليهم في مواقفهم .. وأحس قد إيه هما محتاجين لحد يوقف جنبهم ويحتويهم.. لأن غالباً مكانش دا اللي بيحصل معايا.. لإن معظم صدماتي أخدتها من قبل ما اكون صداقات وروابط قوية
المشكلة إن الصدمات اللي خدتها متأثرتش بيها في وقتها قد ما بتأثر دلوقتي أكتر لما بشوفهم بيعدوا بنفس الألم اللي كنت فيه.. خصوصاً إن ربنا قرر أن كل صحابي يمروا بتجارب مختلفة في نفس ذات الوقت :D..ففعلياً مفيش حد بقعد معاه غير لما يقلب في مواجعه واكيد مواجعي .. 

مش عارفة برضه هل التجارب القاسية دي مرحلة بنتعلم منها حاجات وبتخلص ولا دي حاجة مستمرة في حياتنا .. والمفروض نتعايش بيها عادي
مشكلة كمان إني أنا بقيت بعمل زي الراجل دا في كتاب مكتوب أن تتخيل قصة جديدة لحياتك لباولو كويلو



الثلاثاء، 6 نوفمبر 2012

السمك يأكل الشيبسي أحياناً


عارفين لو بصيتوا على سمكة في حوض ..ديما في سمكة كدة عمالة تعوم بسرعة وتطلع وتنزل وتجيب الحوض من أوله لأخره .. تايهة ونفسكوا تعرفوا السمكة دي بتدور على ايه؟؟.

بقالي فترة كبيرة بصحي من النوم أنزل الكلية ومدخلش بيتنا غير في العشا.. مش مهم حضرت كام محاضرة ولا سكشن كان قد ايه.. انا هفضل في الكلية لآخر وقت.. بروح اتغدى وأنام وأصحى تاني يوم وهكذا.. إحساس إني بلف في ساقية دا مش لطيف.. ومش فاهمة أنا إيه اللي جبرني على كدة

حقيقي أنا مش بفهمني .. ومش بفهم الحجات اللي عاوزاها.. ومش بفهم الحاجات اللي كنت عاوزاها ولما جت لي زهدت فيها .. وهل أنا لازم افهم؟ 


أنا شخص Insecure مفتقدة ديماً الإحساس بالأمان .. ودا شئ بيتجاوز إسراء اللي في كلية لإسراء الطفلة .. ممكن أول مرة حسيته لما كنت في الحضانة وأول مرة اشتري شيبسي .. طلعت عشان أعلم الكراسة بتاعتي .. وأنا راجعة البنات اللي ع الحرف مش رضوا يعدوني .. طلعت ع الكرسي بتاع الميس .. عشان أعدي وأرجع مكاني من فوق الديسك .. الكوتشي بتاعي ساب علامة فوق الجلد الأحمر اللي بيبطن الكرسي.. الميس قالت مين اللي عمل كدة؟.. قولت لها أنا .. قالت لي امسحيه.. مسحته بأيدي اللي كان فيها زيت من الشيبسي .. -    Which Is Anyel- وكان رد فعل الميس إنها ضربتني بالكراسة في وشي.. واتعلمت درس مهم جداً اليوم دا .. إني مش المفروض آكل شيبسي..

زي بالظبط لما كبرت شوية في ابتدائي وكنت بحفظ في دار .. والميس كانت بتفرق بينا في المعاملة .. بنات جم بعدي وكانت عاوزة تسمع لهم قبلي .. ولما تمسكت أن دا دوري وإني المفروض أسمع الأول .. قالت لي خلاص سمعي.. وحسيت بقى بلذة إني أخدت حقي منها ومن اللي بتعمله فيا طول الصيف.. ولما بدأت أسمع اتلككت على كل أخطائي مكملتش آيتين وقالت لي باللفظ .. قومي من وشي.. طبعاً الدرس المستفاد هنا إني مش المفروض أخد حقي..


عارفين الشخصيتين دول وشخصيات أخرى .. أنا مش مسامحاها .. ومفيش حاجة ممكن تغفر اللي عملوه فيا .. غير يوم القيامة لما ربنا يقول لسة في حد ليه حق عندكم  .. وييجوا يدوني حقي دا هو أنا ساعتها بس أكيد هسامحهم .. بس الفكرة لما يعرفوا إنهم حلوين وزي الفل ومع ذلك في حاجة مش عارفينها منعاهم يدخلوا الجنة .. القلق الرهيب اللي ممكن يحسوه وقتها وأن كل اللي عملوه في حياتهم ممكن يكون ولا حاجة غير الحق اللي ليا عندهم ..وأنهم ممكن يدخلوا النار وبتعذبوا بحق مش ردوه.. لحظة صعبة مش كدة..  ويطلع في الأخر إن الحق اللي عليهم كان بسبب تشويه نفسية طفلة .. وإنه ذنب لا يغتفر مش زي ما هما كانوا فاكرين..ساعتها بس ممكن أسامحهم في الآخرة
ومحدش برضه يقوللي سامحي في الدنيا وكدة لإنه مش بالبساطة دي ..
لأني حتي لما حاولت أسامحهم وفشلت .. عيشت بتأنيب ضمير رهيب إني إنسانة وحشة ومش متسامحة.. وأنا اللي غلطانة في الآخر

نطلع قدام شوية في امتحان ال Math في الكلية لما كت لابسة أكتر فستان حبيته في حياتي .. فستاني الأحمر.. وتقريبا مكنتش عارفة أحل حاجة في الامتحان وانهرت من العياط بعديه .. عشان المشكلة في الفستان مكانش المفروض البسه يوم امتحان الMath .. 

وكله كوم ولما يكون عريس متقدم لي اللي هو مناسب وزي الفل وهيريحني .. بس طبعا كل الحاجات اللي حكيتها لأمي عن الإنسان اللي مستنياه  ومبادئي وأفكاري اللي مش هتناسب أي حد ومحتاجة حد يقدرها.. بتتنسى وبتتحول في الأخر لفلسفة وكلام كتب والدنيا مش زي الروايات اللي هبلت عقلي .. طبعاً هنا كانت غلطتي لـأني مش المفروض أحكي 




كل حاجة في حياتي بقيت كدة بقيت الشيبسي اللي مش المفروض اخده لمجرد إنه شيبسي وأنا إسراء وبس .. وحد لو جاه عطهولي بقول لأ عشان مفيش غير كراسة بتضرب بيها في وشي في الاخر.. 

 ومهما حد بقى يقوللي إنتي مش غلطانة والعيب مش في الشيبسي .. عمري ما هصدقه .. لإني بلف ألف وأتغلب مهما أتغلب على دا جوايا لازم أرجع لنقطة الصفر من تاني..وأرجع ادور عليه وألف في الساقية ..وعشان كدة Mainly أنا لا واثقة في نفسي ولا واثقة في حد


 عارفين لو بصيتوا على سمكة في حوض ..ديما في سمكة كدة عمالة تعوم بسرعة وتطلع وتنزل وتجيب الحوض من أوله لأخره .. تايهة ونفسكوا تعرفوا السمكة دي بتدور على ايه؟؟.. 
دي بتدور ع الشيبسي اللي ضاع منها.. اللي لما أكلته مرة انتهي بيها الحال من المحيط لحوض زجاج

الآتى نياتى جريح الآتى حصان مطلوق قلبك تعبان من الريح لكن مستنى شروق
يمكن يسقينا الشاى يمكن يعطينا الناى

السبت، 3 نوفمبر 2012

الحقيقة المرة

الأغنيتين دول هما الحقيقة المرة .. اللي جيلنا كله حاسس بيه ناحية البلد.. لو سمعتهم .. من غير ما تعرف ظروفنا ومن غير ما تشوف الكليب.. بتاعهم أول حاجة هتفتكرها إن واحد بيغنيها لحبيبته اللي مبهدلاه ومطلعة عين اللي جابوه.. وبعدين مش هتتخيل أبداً إنها مصر.. مع إنك هتستنتج كدة لوحدك من غير ما حد يغششك.. لأن اللي وصفها وصفها بالورقة والقلم.. احنا الجيل اللي أفلام حرب أكتوبر وأغنية يا حبيبتي يا مصر.. ومتقولش ايه اديتني مصر.. بيموتوه من الضحك.. احنا الجيل اللي أكل أكل مهجن ومحقون ولحم حمير وكلاب.. الجيل اللي بيقعد أكتر من 14 سنة في التعليم وهو مش فاهم حاجة.. احنا الجيل اللي اتعود ع الموت سواء من حريق قصر ثقافي أو خروج قطار عن مساره .. عندك بقى المختل عقلياً والماس الكهربي وصخور الدويقة.. بقول إيه اسمعوا أحسن

أنا طفل اتعلق بيكى فى نص السكه وتوهتيه

بيني وبينك بكره جاى.. ولسه مش عايز اشوفه