إيه في أمل؟؟

تا نرجع لا مش معقول

أنا حاسة إني خايفة أوي من امبارح.. ورجعت روحي تحس بالساقعة زي زمان..  سبحان مقلب القلوب .. في ناس كنت بتحبها في يوم لأسباب مش قادر تحددها.. وتاني يوم كرهتها لأسباب برضه مش قادر تحددها .. غير إن القلوب بين ايدين ربنا بيقلبها كيف ما يشاء..

في أمل إيه في أمل.. أوقات بيطلع من ملل

هو أنا بعافر عشان اللي مؤمنة بيه.. بحارب وNo1 Fighter .. بس الفكرة الدعم النفسي بيفرق معايا أوي.. فرق لما اعمل حاجة مؤمنة بيها.. وباقي الناس مؤمنة بيها وبيا .. وإني اعملها وهم مش مؤمنين بيا .. خصوصاً إني من نوع
give me a little encourage and i''ll give you back a great ideas ..
بس مؤخراً فقدت قدرتي على إني اتخانق .. اتخانق على حاجات هي حقي أصلاً.. معنديش أدنى استعداد أعيط .. 

في أمل إيه في أمل.. أوقات بيرجع من شي حنين .. لحظات ليخفف زعل

المشكلة كمان إني بكره نفسي على وجودي في الصيدلية .. آه بنزل ومش لخمة وبقيت بعرف حاجات اعملها بس مش هو دا اللي عاوزة اقضي حياتي وأنا بعمله .. مش نفس إحساسي لما كنت بروح معسكر أبو قير من أول اليوم لأخره قصص وشعر ومسرح وغنا 3 أيام كدة بس .. كانوا بالنسبة لي جنة ع الأرض ..

المشكلة بقى الأكبر أني مبحبش اقعد اندب وابكي على حظي .. أنا مش من الناس دي .. مش من الناس اللي بتلاقي عزائها في النواح .. مش من الناس اللي بتيأس من رحمة الله .. 

بس مش عارفة أعمل إيه ؟ غير إني اقعد اقرا شوية واسافر بالكتب من هنا

يومياً  ليل وبعده نهار عمري قدامي عم بينقضى

إلى من سيقرأ يوماً "2"

 My dear anonymous 

طيب أولاً أنا متضايقة جداً دلوقتي.. حصل موقف كدة ومش هينفع احكيه ع المدونة .. عشان ما عنديش نية اشتم.. دا غير إني كنت بتكلم مع إسلام وبشكي له من حاجات كتير  .. قام مختصر كل مشاكلي في إني عندي فراغ عاطفي .. المشكلة إنه عنده حق

 My dear anonymous 

وأنا بغسل المواعين كنت بفكر في إني زي مكون بجري في سبق.. وإنت مش بتلعب دور مشروب طاقة.. لكن بتلعب دور الجايزة .. ودا بيدل على حاجات كتيرة وخطيرة زي أني ممكن افقد قدرتي ع الجري في أي لحظة وانهار .. 

وكنت بفكر برضه في إن المواعين غسيلها بيخلص بعد 5 أغاني

 My dear anonymous 

رجلي لسة متلجة وطلع عندي Raynaud's syndrome الدوا اللي باخده .. من آثاره الجاانبية إنه بيعمل كوابيس! .. كوابيس من اللي هي مش بفتكر أذكر ربنا فيها عشان اهدى 

مش عارفة لو كنت كتبت لك قبل كدة عن كوابيسي .. بس هقولك برضه إنها كلها واحدة .. حد من صحابي معايا ورايحين مشوار غاليا البحر.. الدنيا بتليل وصاحبتي بتختفي ومفيش غيري في شارع طويل بجري

 My dear anonymous 

د.عبد الفتاح اللي بتدرب في صيدليته قاللي .. احنا صيادلة في الأول وفي برا.. احنا مش بايعين ماتنسيش كدة في يوم .. الدكتور دا بحس إنه آخر الصيادلة المحترمين.. وبعزه أوي زي والدي.. لازم تبقى تتعرف عليه إن شاء الله

 My dear anonymous 

واتخنقت مع بابا النهاردة ع التليفزيون .. واتضايقت من نفسي أوي "افتكرت واخفض لهما جناح الذل من الرحمة" وللأسف مش دا اللي عملته.. بس لما خدت بالي صالحته على طول وإن شاء الله مش هكررها تاني

 My dear anonymous 

لاقيت عندي كتب كنت شارياها بس مقريتهاش وأنقذتني .. بدأت في كتاب الإنسان في القرآن للعقاد .. احم احم مش فاهمة كل الكلام بصراحة .. بس اللي فهمته كان حلو أوي أوي .. علمت ع اللي مش فاهماه عشان تشرحهولي في يووم من الأيام هع هع هع يا حلو :D
.. وبدأت كمان صحابيات حول الرسول لمحمود المصري .. بحاول أشوف صفات زوجات الرسول والصحابيات .. علشان اكتسبها.. في حاجات فيهم مني بس مش بنفس القوة إن شاء الله هشتغل عليها الفترة الجاية

 My dear anonymous 

نسيت أقول إني كل ما بفتقد وجودك

بدعي ب" اللهم ارزقني حبك وحب من يحبك وحب كل عمل يقربني إلى حبك.. اللهم إن رزقتني ما أحب فاجعله قوة لي فيما تحب.. وإن أخذت مني ما أحب فاجعله فراغاً لي فيما تحب" 

 My dear anonymous 

أنا ماتجننتش لسة :D

 .. أنا بس بسلي نفسي على ماتشرف سيادتك وكمان كتبت لك رسالة قبل كدة مش عارفة قريتها ولا 

إلى من سيقرأ يوماً

المطر الذي لا اعرفه

طول عمري وأنا بحب الشتا بمووووووووت فيه أسعد أوقاتي وهي بتشتي .. الشتا دا كان ال Saver for my soul

بس أنا كنت غلطانة لما فكرت كدة .. ممممم أصل الموضوع إن النهاردة كنت ماشية في الشارع لوحدي وأنا مروحة من الكلية بعد ما امتحنت شفوي واشتريت ورق المادة التانية  لما بدأت تشتي .. الشنطة مدلدلة من كتف والايد التانية معلقة عليها الجاكيت وماسكة النضارة والموبايل وبرغم كل دا كنت فاردة جناحاتي وببحلق في السما ومبسوطة جداًااااااااا وعمالة أدندن "أنا اتوب عن حبك أنا .. أنا ليا في بعدك هنا .. دا أنا بترجاك الله يجازيك يا شاغلني معاك وشاغلني عليك"..

 ومبسوطة وزي الفل لحد ما طلعت على البحر .. المطر زاد والهوا وكنت ماشية في عكسه والمطر بيخبطني بجد في وشي مش قادرة افتح عيني ..مش لابسة النظارة عشان كدة كدة مش هشوف بالمياه اللي عليها وأنا مش بشوف من غيرها.. المشكلة إني ماكنتش عارفة اوقف المشروع ولبست الجاكيت من كتر الساقعة .. وعمالة اوقف المشاريع فيكتوريا الساعة طب ابو سليمان حجر ..كوبري الناموس .. اي حاجة طب اي حتة ماتكونش بالمطر دا السما بلا مبالغة كانت عاملة زي دوش مفتوح بجبروت عليك .. اتحطيت في مواجهة بيني وبين اكتر حاجة بحبها في الدنيا وفي حياتي كلها ..

ساعتها تلقائياً حصل Switch جوايا على أغنية .. "مطر وعصفور ارتعش وبين ايديكِ الطيبة طلب الأمان أيوة بحبك آه بحبك من زمان".. كنت هبدأ أعيط مش لاقية أي مشروع اركبه والسكة طويلة والمطر بيزيد وأنا كل اللي كنت اعرفه عن المطر قبل النهاردة هو إني بحبه وأنا دفيانة في البيت بشرب كاكاو وتفرج على ال MBC2 .. أو وأنا راكبة المشروع جنب الشباك والمياه مثكثقة على الازاز وعمالة ارسم عليها..مع إن المطر دا قمة المأساة لناس معندهاش بيوت أو ساكنة في عشش..اللي عمري ما كنت بفكر فيهم.. زي بالظبط البحر اللي بحبه وأنا واقفة على الشط اترعب لو دخلت جوا ولا حد من اخواتي دخل وفكرة إني اركب مركب دي بالنسبة لي قلة عقل وتخلف.. لو كنت في 2012 كنت هفكر في  ياتري كام حاجة بحبها طول ما انا بعيدة عنها ومخدوعة في حقيقتها واني هخاف بعد كدة اقرب من حاجة عشان ماشوفش عيوبها .. دا كان هيبقى تفكير إسراء اللي في 2012 اللي كانت بتتصدم وبس بس بما إني في 2013 إسراء اللي معادتش فيه حاجة ممكن تصدمها فكرت في إن الغلط مش إني احب المطر الغلط إني اخليه

 Saver for my soul

because

 rain himself needs to be saved

 sometimes ..

الغلط في فكرة ال Hero اللي لازم يكون بيرفيكت في كل حاجة .. اللي مينفعش يتحط في مواجهة بينا وبين نفسنا .. عشان حد فينا هيخسر.. بالعكس ابسولوتلي هو شتا زي ماهو شتا وأنا إسراء زي ما أنا إسراء وزي مابتقبل حسنات ومتعة وروحانية الشتا لازم كمان اتقبله لما بيكون بنوّه وزعابيب

المهم ركبت في الأخر الحمد لله ووصلت البيت..  بس ساعتها كنت بغني ساعات المطر اسمعوها بنفسكم أحسن :)

إسراء اللي في 2013 تحب تقول إيه لإسراء اللي في 2012

السنة اللي فاتت كانت غريبة أوي فاشلة في المستوى العاطفي وناجحة في الصداقات والمهني 

 دول شوية لينكات لأبرز الموقف اللي حصلت لكل شهر.. في مواقف لسة ماتحكاش عنها ..ممكن يتحكى عنها في يوم .. وفي مواقف لن أجرؤ أن أحكي عنها .. وفي مواقف حكيت عنها بعدين مسحتها عشان بقيت مؤلمة وزي ما قال منير" كل يوم فرحته معاك بيعذبني"

بس السنة نقدر نقول إنها كانت مفيدة جداً وعملت لي تقويم شامل للعوج اللي في شخصيتي.. وبرغم إن الوجع كان مسيطر فيها ومكانش فيه حاجات كبيرة مفرحة .. لكني مفقدتش قدرتي إني أفرح بالتفاصيل الصغيرة .. زي وردة إسراء صوابي.. وحلويات جابتهالي ابتهال وتحضيري لبرنامج وشوشة الإذاعي مع د.هشام.. دخولي بصمة وتعرفي على رضوى ونهال ودكتورة شاهندة .. والتحليل النفسي اللي اتعملي من د.محمد صديق.. قربت من لميا.. ووقوف هبة جنبي طول فترة اكتئابي في الصيف.. اتدربت عند د.عبد الفتاح أكتر إنسان صيدلي بيحترم المهنة وأخلاقها ..طبعاً دا غير صداقاتي بإسراء صالح وجهاد جابر وجهاد يوسف ورغدة

 أهم مكسب نفسي اكتسبته السكينة والصبر وحاليا بتخبط عشان اوصل لليقين الكامل وكمان لا حزن دايم ولا الشباب بيدوم

المهم إن شاء الله 2013 تكون سنة أفضل من اللي قبلها 

يناير:

منيريات (1)

كانت ككًل الأشياء

فيراير:

أمنية .. أمنيتان.. ثلاث أماني

3 حاجات أنا كمان

مارس:

Night&Day: pleasant sleep &Quiet wake up

The last 2 days

صباح الأماني المؤجلة

أبريل:

MANAMANAH

مايو:

راضية الحمد لله

يونيو:

لذا كل سنة وأنا طيّبة

يوليو:

رغي: محرّمة على الـتأخير

أغسطس:

أنا وهبة: الوجه الآخر من الفسحة

سبتمبر:

تجلّيات

عفريت الكتابة

أنا قلبي لما حكى

أكتوبر:

جواب لربنا

عشان نبقى واضحين الموضوع مش بالبساطة دي

نوفمبر:

السمك يأكل الشيبسي أحياناً

أنا حلوة وزي الفل :D

ديسمبر:

أهل الحب

اختبار حب

توازن الروح والجسد"1"

Sweet disposition :)