الدنيا بقيت ساقعة أوي يا ربنا .. ايدي فيها رعشة مش بتروح .. وحاجات كتيرة بتقع منها .. وبسيبها تقع .. فقدت قدرتي إني أوطي وأجيبها .. كل ما بنام بحلم أني عمالة أعيط وأشخاص مختلفة بتطبطب عليا .. شخص منهم كان حمدين صباحي :D
بس ياربي مش بيتحقق من الحلم غير جزء العياط .. يا سلام ياربي لو الطبطبة تتحقق كمان.. الطبطبة دي بقيت أكبر طموحاتي في الحياة ..
أنا ياربي ممتنة ليك وممتنة لكل الحاجات اللي بتبعتهالي تخفف من عليا .. زي صحابي والسينابون اللي جبتهالي صوابي وأكلتهالي صالح .. وآخر شعاع للشمس بلقطه في المغرب وأنا مروحة على البحر.. وكمان البيت اللي جنب كلية هندسة بالنجفة المنورة على طول وستايره اللي بيحركها الهوا .. القمر في الخسوف لما بيبقى قريب أوي وكبير أوي ولونه مش أبيض.. ,وكمان مجلة ناشيونال جيوجرافيك
بس مش عارفة ليه ياربي الساقعة مش بتروح .. وروحي بردانة على طول .. أنا عارفة ياربي إنك مش بتعذبني ولا غضبان عليا إنت ياربي بس .. عاوزني أتعلم حاجة مهمة أوي .. هتفرق في حياتي .. بس أنا ياربي مش عارفة المفروض أتعلم إيه؟؟ .. أنابس واثقة فيك .. وواثقة إنك هتعوضني مش مهم خالص يكون العوض في الدنيا .. بس ياربي أنا محتاجة شوية دفا .. يدوني شوية طاقة أكمل بيهم يومي
ليست هناك تعليقات:
إرسال تعليق