أنا قلبي لما حكى

صاحية بدري .. وطبعاً .. كل الأفكار العظيمة مش بتجي لي غير لما بصحى بدري ..
هاقولوا لي ليه يا سوسو .. ليه يا سوسو
عشان طبعا اليوم ما بيكونش لسة اتشحن
بحاجات ترجع تخليني أشوف كل حاجة عادية ومش عظيمة

هو احنا ليه كدة .. عمر طاهر قالها قبل كدة
الحياة مأساوية للناس اللي دماغها عالية
يعني أنا وابتهال واسراء الحياة بالنسبة لنا قمة المأساة
اكيد برضه جهاد ورغدة ولميا نفس النظام
أنا معرفش تفاصيل عن حياتهم زي ما اعرف عن ابتهال وإسراء
بس أنا اعرف إن دماغهم عالية 
ودا بيخليني أطرح سؤال 
هل العيب في الحياة ولا العيب في دماغنا
هو اللي أنا اعرفه إني لاقيت نفسي كدة
حاولت في فترة أني أكون تافهة وسطحية
بس فشلت

ودا مش معناه إنك يا إما دماغك عالية أو تبقى تافه
بس أنا مش بعرف أعمل كدة
أعمل زي إسراء فرماوي مثلاً
إسراء دي جميلة أوي بجد ماشاء الله
-بختك يا عم أحمد بيها- :DD
بحس إنها فاهمة الفولة وفاهمة كل حاجة
بس الدنيا بيس وعادي وإيه المشكلة
وليه نعرّضها .. لما ممكن نكشكشها 
-ربنا يديم عليها ضحكتها يارب-

مش بعرف أمسك العصاية من النص
أنا يا إما ابقى فاهمة أوي يا إما ببقى حمارة
مفيش حل وسط

مع إننا والله
مش عاوزين في الآخر غير حد يطبطب علينا أوي
الطبطبة دي اللي مش بتبقى عالضهر وخلاص
لا الطبطبة اللي بتوصل لاعماق الروح
لمكان جواك مكنتش تعرف إنه موجود عندك قبل كدة
طبطبة ممكن تعيش حياتك كلها على ذكراها
ومتعوزش حاجة تانية

ممكن برضه حد يعلمنا إننا منخافش
مش مهم من الحياة
بس منخافش من نفسنا ومن الحاجات اللي بنحبها وبتفرحنا

أو كمان يعلمنا إننا منعلقش سعادتنا على حد
حتى هو نفسه منعلقش سعادتنا عليه

إيييييييه دونييييييييييييا

المهم بقى أنا هنزل الكلية
بعد ما شربت شاي بالقرفة والجنزبيل
وسمعت الأغنية دي دشلداشر مرّة

عفريت الكتابة

الواحد وهو بيكتب .. بيبقى زي ما يكون ملبوس أوممسوس.. قوة غريبة بتدخل في ايديه .. بتختار حروف على مزاجها بتصادف إنها تعمل حكاية في الآخر.. الحكاية جت منين واتكتبت إزاي ؟؟! مش عارفة 
زي مثلاً
أنا وأنا بكتب .. غير أنا في الحقيقة .. في الحقيقة أنا كلامي ممل عشان محدش بيحب يسمع عن أزماتي الوجودية الفكرية الفلسفية في الحياة .. ممكن يسمعوا عن خطيبي دا إذا كنت مخطوبة .. أو لما كنت رايحة اشتري فستان وقعدت ألف عليه وملاقيتهوش .. أو وأنا بتخانق مع ولد استفزّني .. أنا مش بعرف أحكي الحكايات دي خالص غير لإسراء صالح مش عارفة ليه؟جايز عشان بحس إنها متحمسة.. فبعرف أتكلم ساعتها ..  بتضحك عليا وبحس إني بعمل إنجاز فإني أقولها حاجة تضحك ..
بس إسراء متعرفش إنها الوحيدة اللي بتضحك من حكاياتي
 محدش بيهتم لو أنا لو سمعت لحن لعمر خيرت بعرف اسمه على طول وكان متلحن لفيلم إيه وألبوم إيه ؟؟
محدش بياخد باله من إني عندي لزمة ""أصلاً أصلاً يعني" في الكلام؟
محدش يعرف إني كل ما أمسك حاجة في إيدي .. لازم أعملها توازن عشان تقف لوحدها... زي مثلاً إني أوقف القلم على سنه .. وأوقف الموبايل والريموت على القاعدة الرفيعة بتاعتهم.. أخيراً بقيت بعرف أوقف إزازة البيرفيوم من الجزء اللي بنضغط عليه عشان البيرفيوم يطلع؟
محدش بياخد باله إني بفرح جداً لما الناس بتسألني أنا مخصوص على كتاب معين وأحس إن حدقة عيني بتوسع من الفرحة.. ومحدش بياخد باله إنها بترجع تضيق تاني لما يسألني بيتكلم عن إيه؟؟
ومحدش يعرف برضه إن أكتر حاجة مخوّفاني في الدنيا.. هي جملة من أغنية لمحمد منير -بتصرف- "خايف أقول بردانة .. تغطيني بإحساسك متدفيش" ؟
محدش مهتم بتفاصيلي الصغيرة اللي بتخليني مبقاش حد غيري
محدش يعرفني على حقيقتي .. لما بتكلم .. لكن الناس بتبدأ تحبني لما بكتب ..
كل الناس اللي بتقرأ كتابتي بعدين تشوفني في الحقيقة .. مش بتصدّق أبداً إنها نفس البنت وبتتصدم دي أقل حاجة
أنا بس متضايقة عشان نفسي كل الناس تعرف
 إني مش مملة زي ما هما فاكرين .. وأنا مش بتكلم كتير عشان أقول حاجة.. لكن أنا عندي حاجة أقولها فبكتبها

تجلّيات

(1)

 كانت بتقولي يعني إنتِ شايفة إن فيه أمل؟

قولت لها  ساعات ربنا بيبعت لنا ناس 

تحسسنا باحساس معين وتمشي بعدها

عشان منفقدش الأمل في إننا نحس الأحساس دا تاني

ويبقى عندنا أمل تاني إنه مايبقاش مرّة زيهم .. وما يمشيش

(2)

جهاد قالت لي .. اتعلمت منّك البساطة والتلقائية

ابتهال: إني أحارب عشان أحلامي

إسراء: أدخل الحاجة بقلب .. إنتِ بتحضنيني بقلب أوي

والله مكانش قصدي

:))

(3)

مشاعرنا ولائها للي هنتجوّزه

بمعنى إن كل حاجة قبليه هتبقى مزيّفة

بمجرد ما يجي

(4)

كان نفسي أعيّط زيّها قدامه

وأعاتبه بصمت

بس أنا أساساً بنسحب بسرعة

عشان ميجيش يوم أعيّط قدامه

(5)

نفسي برضه أخليه يرتبك كدة

وعقله يتوه منه 

زي ما عملت فيه من غير ولا كلمة

أومال لو كانت اتكلمت كان الراجل عمل إيه؟؟

:DD

(6)
كان أول ما خلصت كلام عنه سمعنا
كوبليه من أغنية
"إنت اللي حلمت بيه"
بقولها شوفتي الفال مصدقتنيش
بعدين مشينا سِنّة صغيرة
سمعنا
"ليلة البس لك الأبيض"
فضلت طول السكة تدور في كل فال جديد

(6*)

لما كنت بقولها أدعي لك بإيه

فكانت بتقولي الدعوة اللي بتدعيها له

فأنا كنت بدعيها مش بصيغتها هي وهو

لا كنت بدعيها عليّا أنا وهو

بس الحمد لله لحقتني قبل ما اكمل

بس كانت هتضربني بس 

ليها حق الصراحة

(7)

قالت لي أول ما يجي هزعق له

عشان سابني كل دا 

لناس تانية بتتقدم لي كل شوية

دي طيبة أوي

أصل أنا أول حاجة هعملها بعد قراية الفاتحة

إني هقرصه جامد

عشان يحرّم يسيبني لوحدي تاني

(8)

لما كنا قاعدين بناكل ع البحر

وقالت لي يا سلام لو نبقى 4 مش اتنين

قولت لها ايون لازم هما كمان يتصاحبوا

قالت لي: أو ناخدهم صحاب جاهزين

:DD

(9)

إنت أساساً ربنا بيحبّك

-إنت بتاعها وإنت بتاعي-

تخيل لما بنتكلّم عليك كدة وإنت أساساً

 لسة مش موجود في حياتنا

ومنعرفكش إنت تبقى مين أصلاً ولحد دلوقتي

لست سوى مجرّد أمنية

أومال لما تيجي ونعرفك هنعمل معاك إيه

تخيل إنتَ بقى :)))))))))))))))

(10)

إنت هتيجي امتى بقى

ها؟ ها؟

قولي ومش هقول لحد 

:*

بدري

صاحية من ساعتين .. قعدت ساعة الا ربع في السرير بحاول أنام تاني بس فشلت
قومت عشان أظبط فيديوهات الإنجليش عشان الامتحان الفاينال بكرة ان شاء الله
بعدين سجلت في كورس أون لاين 

أيون أيون عن Listening to world music

جامعة بنسلفانيا

:) :)

صحيح أنا أساساً كنت داخلة عشان كورس Fundamentals of pharmacology
بس مش قدرت صراحة أقاوم خصوصاً إن مفيش وجه مقارنة
المهم بقى هقوم أعملي ساندوتش جبنة بالفلافل
وهظبط اللاب بتاع أخويا عشان اشغل عليه باقي اليوم
ومش عارفة دلوقتي إذا كنت هروح أقابل هبة وعلا ونرمين في نادي الأطباء ولا لا
ماما تعبانة شوية وأنا كنت مندلة معاها امبارح طول اليوم
طبعاً هبة دي صديقتي الصدوقة كنت اتكلمت عنها في كذا بوست هنا
علا ونرمين مع إني معاهم من شهرين ونص في كورس الانجليش
بس أنا أول مرة اكتشفهم من يومين
لما كنا عاملين discussion group عن  Our dreams and goals
ينات دماغها نضيفة أوي وعالية ومش تافهة
 صحيح نرمين شبه باسنت سعد صاحبتي جدااااا في الشكل واللبس وكمان TEDx
إن شاء الله أغرّفهم على بعض
بس زعلانة أوي ان اول مرة كنت اتكلم معاهم من يومين بس
حظهم جاه في وقت كنت مكتئبة فيه ومعنديش اي استعداد اتكلم مع حد
مش مشكلة لسة قدامي سنة معاهم في الكلية
المهم بقى أنا لازم أقوم بطني بتصوصو من الجوع ولسة كمان هعملي شاي بلبن

P.S: داخلة من اكاونت أخويا عشان كسّلت أعملي أكاونت :))