إعترافات مُراهقة:ريهام ♥

النهاردة الصبح قابلت ريهام صديقتي الصدوقة  اللي ماشوفتهاش من 3 سنين من ثانوي ..كنّا راكبين مع بعض المشروع ودي كانت النتيجة  !

 (1)

ذكرياتي عن ثانوي مش كتيرة مش فاكرة منها غير إني مرة كنت في أوضة الوسائط متنحة في السقف لإن مدرستي كانت فيلا للأجانب من طراز التلاتينيات وكان السقف عالي أوي ومنقوش نقوشات حلوة زي ما كل حاجة كانت حلوة وقتها  .. كل اللي فكرت فيه ساعتها يا ترى كمان سنة من دلوقتي هبقى قاعدة في كلية إيه .. يارب أخلص بقى

* * * *

سقف الكلية اللي برغم حجمه إلا إنه سقف واطي وبارد أوي من التكييف 
سقف لأجنة أحلام معادتش لاقية دفا عشان تكمّل نموها .. 

متقدرش تتنفس في المدرج من الزحمة

  براحها لسة في مدرسة الثانوي

(2)

شلة ثانوي  في الدرس لما المدرس طلع يرد ع التليفون

وساعتها صممت إن حد يقولي نكتة  في المناسبة دي
وصوت   8 بنات
بتضحك في نفس الوقت خلّى الجيران تشتكي

لأننا كنا فوق جامع وباقي العيال مش فاهمة ايه اللي بيحصل -كانت أول وآخر مرة ضحكت فيها من قلبي بجد 

* * * *

محاضرات د.نبيل في الكلية .. 

كنا ديماً بنتحذّر من محاضرته بس اللي سمعناه مكانش ممكن يتقال لحد 

كانت بتخلّيني وبتخلّي البنات كلها تنكمش في البنشات وتحمّر.. 

مش من كلامه على قد من ضحك الولاد اللي قاعدين ورانا 

ضحكهم المُفجع بجد 

ضحكهم اللي بينشف الدم في عروقنا

(3)

والمدرسة كانت بتحتفل حفل ختام العام بس احنا احتفلنا فيه في الفصل على طريقتنا الخاص زغاريد وطبل ورقص المدرسين كانوا في حالة ذهول لإن دا مستوى مدرسة متفوقات ! 

ميعرفوش إن دا مستوى بنات مُراهقات

(4)

كان إحساس كسر القوانين ممتع أوي

لمّا كنت بزوّغ اخر اسبوع من الفصل

وأنزل أقعد في الحوش  العقاب كان نفسه ممتع

لإن معناه إن إنت لسة مسؤل من حد

(5)

ذكرياتي عن ثانوي مش كتيرة بس 

إحساس الوداع في آخر يوم دراسة كنت حاسة في آخر جرس ضرب

مكانش جاي بفرج مستنيّنه بفروغ الصبر على غير العادة

زي ما يكون ..ضرب طلقة في قلبي وسابه مرمي في أرض الحوش محبوس وحيد مش عارف إيه اللي بيحصل ؟خايف بيرتعش بيعيّط بينزف ..

طلعت من غيره وسيبته بيعاني 

قلبي اللي لسة في الحوش مرجعليش لحد دلوقتي  

بينتقم مني

(6)

ريهام البنت الجميلة الشقية الناعمة اللي دمها خفيف

ريهام لما كانت بتدخل مكان مش ممكن يفضل زي ما هوّا 

كل حاجة كانت بتقول إن ريهام موجودة فيه

ريهام حلم كل ولد في الدنيا :)

ريهام كانت حاجة من الحاجات اللي سيبتها وودعتها على أمل إني حرجع لها

ومش عارفة بقى مقابلتنا النهاردة دي فرصة إني أرجّع اللي اتسرسب مني وانا مطنشة

ولّا مجرد لقاء مع الماضي

P.S

بحبِك أوي وآسفة عشان قصرت معاكِ السنين دي كلها

تم بحمد الله

الحب من أول خبطة :D

أول ما دخلت الكلية وأنا عندي 17 سنة

مكنتش لسة فوقت من العته بتاع ثانوي

وصراحة كنت شايفة إنها فرصة إني أحب بقى وكدة

بس اللي كنت أعرفه عن الحب إنه بيجي من أول خبطة

يعني ديماً البطل والبطلة يتخبطوا في بعض

السكتشات توقع والنضارات

وهوبا يحبوا بعض

كنت مستنية الفرصة تجي لي في خبطة أتخبطها صدفة

بس بعد ما قعدت 3 سنين في الكلية 

متخبطش فيهم غير مرتين

مرة في الأسانسير دوخت فدوست على رجل اللي واقف جنبي

:D

ومرة تانية واحد كان بيخلع البالطو واحنا طالعين من السكشن

فرزعني حتة لكامية في وشي بس لكامية ايه كانت عنب

:DDD

فهمت إن الحب عمره ما كان كدة

الحب بيجي بالراحة وبهدوء

ومن ناس مكناش نتخيل إننا كان ممكن نقابلهم أو حتى ممكن نحبهم

هو أنا صحيح برضه لسة محبتش بالطريقة التانية

بس أنا بقى معنديش استعداد أفقد عين أو عاهة مستديمة

في خبطة جديدة 

:))))

التدوينة مخلصتش أنا عاوزاكم تحكوا لي عن فكرتكم عن الحب ؟؟

 وقابلتوه ولا لسة ؟؟

 ويا ترى وجهة تظركم اتغيرت عنه؟؟

P.S:

الدوخان في الاسانسير نشاط طبيعي بيحصل لي :)) 

أحلام بِطعم الديك الرومي

كانت أمنية من أمنياتي الصغيرة إني آكل ديك رومي

طبعاً منظره في الافلام والحشو بتاعه والنهم اللي بيتاكل بيه

وكمان سِعره المرتفع..يخليك تعتبره أمنية

في يوم كنا معزومين في فرح 

وصدقوا أولا تصدقوا كان في البوفيه

بس لما أكلته انهارت كل أحلامي

طعمه كان عادي جداااا 

طعمه زي ما يكون طعم فرخة بس معندهاش جفاف مش أكتر

هنلاقي إن عندنا أحلام كتيرة اوي

عشان بتبقى بعيدة عننا وصعبة شوية 

خيالنا بيخليها زي الديك الرومي

بس بمجرد ما بنقرب منها بنشوف حقيقتها

ونشوف إنها مكنتش تستحق التفكير فيها أساساً

احذروا من اللي بتتمنوه 

P.S:

البعض نحبهم
لكن لا نقترب منهم ........ فهم في البعد أحلى
وهم في البعد أرقى .... وهم في البعد أغلى

وَاصْبِرْ لِحُكْمِ رَبِّكَ فَإِنَّكَ بِأَعْيُنِنَا

 كان عندي أمنية .. كانت أكبر أمنية في حياتي 

كنت بدعي إنها تتحقق في كل وقت

وكل سجدة 

كانت حياتي كلها متوقفة عليها

بس للاسف كان كل ما بتمناها أكتر كانت كل ما المواضيع بتتكعبل وبتبعد أكتر

وكان في الوقت نفسه مش قادرة اوقف حياتي عليها.. ومكنتش قادرة أنساها برضه

صليت ركعتين لله وقولت 

"اللهم أجرني في مصيبتي وأخلفني خيراً مِنها"
وسيبتها مبقيتش أفكر فيها تاني

وبعد سنة  ماعديت أكتشفت قد إيه ..إن ربنا بيحبني لما كان بيبعدها عني

وإنها كانت هتبقى شر كبير أوي ليا لو اتحققت

"اللهم امنحني السكينة لأتقبل الاشياء التي لا استطيع تغييرها .. وامنحني الشجاعة لتغير الاشياء التي استطيع تغييرها .. والحكمة لمعرفة الفرق بينهما"

ويسترن يونيون

حاسة اني رجعت الحضانة من تاني

ومعاك بتعلم أستهجى الدنيا من أول وجديد

شكراًأًأًأًأًأًأًأً والله يكون في عونك ع اللي انت فهمته 

بدري

حالــــــــة (2)..حبيب بطعم الجبنة التُركي

حالــــــــة (2)..حبيب بطعم الجبنة التُركي

أنا اكتشفت إن بقالي عشريـــــــــــــــــــــن سنة بفطر وبتعشى وباخد ساندوتشات المدرسة معايا .. جبنة تُركي..صنف وحيد باكله يومياً أكتر من مرة في اليوم لمدة عشريـــــــــــــن سنة .. وأحيييييه لو في يوم نسوا يجيبوا مش ممكن اكل حاجة تانية أبداً..


اكتشفت مع إني شخصية ملولة جدااا واللي تحبه الصبح عادي جداااااً إني أكرهه بالليل .. بس في حاجة فضلت أحبها وأعشقها وأدمنها الفترة دي كلها وأعتقد لباقي حياتي برضه حفضل أحب الجبنة التركي


والسؤال .. أنا ليه بحبها كدة؟؟ أصل اكتشفت إن الجبنة التركي ..في كل مرة باكلها بحس أنها اول مرة ليا أدوقها  . نفس الانبهار.. بطعمها..نفس تغميضة العين للحظات ..نفس المضغ براحة عشان مفوتش أي متعة .. كل مرة هي أول مرة ..فعلا الجبنة التركي دي الجبنة الوحيدة اللي طعمها بيختلف من بياع لبياع ومن مصنع لمصنع  ع العموم انا مش حعمل تحليل المرة دي لطعم الجبنة التركي
في حاجات أهم


مثلاً
..من غير كسوف و عندي ثقة فيك بسمعها كل يوم من سنة وبحبها جدا وعمري ما زهقت منها..دا لأن طعمها طعم الجبنة التركي ..كل مرة بسمعها بكتشف معاني جديدة في الأغنية بنفس الانبهار كل مرة هي أول مرة


مثلاً ..
 ابتهال
كل مرة بنتكلم فيها بتفتح عيني على حاجات جديدة ..بتقولي على مقولة ..بتفرق معايا جدا .. كتير اوي بنسى اللي كنا بنتكلم فيه لكن بفتكر المقولة بس النهاردة قالت لي "لم تخيب أبداً خيبتي فيك".."قبلك كان عندي أحلام..بعدك أنا "لا أحلم".."إذا أصبحت في ال 30 مثلما كنت في ال20 ..فأنت أهدرت 10 سنوات من عمرك
حبقى أعملها قاموس إن شاء الله..
المهم إن.. :))
كل مرة هي أول مرة


الحب مفروض يكون بطعم الجبنة التركي..كل مرة نشوف بعض فيها كأنها أول مرة بنتقابل ..كلامنا اول مرة نتكلم فيه..ميبقاش الإنسان اللي كان مثير للتساؤل بس لما اتفهم بقى ممل .. وأنا كمان مبقاش الست التقليدية اللي كانت مهتمة بنفسها وبعد كدة
فجأة صحى من النوم يلاقي إنه متجوز واحد صاحبه  ..
كل مرة لازم تبقى أول مرة
أنا عمري ماحبيت بجد .. بس يوم ما أقول يا حب..لازم حببيبي يبقى بطعم الجبنة التركي


متعرفوش بقى بيتباع فين؟؟
:DDDD


يُتبع

حـــــــالة

Hصل احنا من يومين بالظبط اشترينا دش جديد لأول مرة يدخل بيتنا ولما جيت اشوووف واتفرج اكتشفت حاجات عجيبة..

الأفلام الأجنبي

===========

1-إن مثلا أفلام الرعب بقيت كوميدية جداا بالنسبة لي..أنا اللي بخاف من خيالي.. بقيت بستمتع بمصاصين الدماء وهما بيمصوا دم ضحاياهم..بس المرة دي بقيت بشجع مصاص الدماء .. وبفرح لما حد جديد يتحول.. انا شايفة ان مصاص الدماء شخص جميل جدا ومش شرير ولا حاجة .. ع الاقل يعني مش ممل وتافه ومش مخادع .. عارف هو عاوز ايه منك ومش بيخبي عليك .. من اول مرة شافك فيا صارحك بالحقيقة ..هو ممكن الدم يكون طعمه مالح شوية بس اكيد ليه ميزات لسة مكتشفتها.. وبعدين ايه اللي خلاُك تعتقد أصلاً انه شرير..يعني إنت حد كان مص دمك قبل كدة .. عشان تعرف .. مش يمكن تبقى حاسس إحساس أحلى وإنت معندكش دم

ولما وحش كان بياكل واحدة من أمعائها.. هي ليه كل الوحوش تقليدية هو ليه مجريش معاه شوية كاتشاب او مسطردة أكيد طعمها حيبقى احلى .. بس كان حيبقى شكله مضحك اوي ان واحش كدة طويل عريض ماشي بإزازة مسطردة في ايده هههههههههههه

2-الأفلام الرومانسية بقيت سخيفة جداًا 

يعني طول الوقت .. بتبقي عن مثلث الحب .. دا بيحب دا ودي بتحب واحد تاني والتاني مش حاسس بيها

او بتتكلم عن واحد غني مش مقدر ان الجمال جمال النفس ويقعد يتحفنا معاه وهو بيكتشف الحقيقة دي لاول مرة

او حتى تيمة  ان الواحد مش بيقدر اللي في ايده غير لما يضيع منه..طب ما يكتبوا المقولة دي وخلاص مش لازم نقعد متحنطين ساعتين

قنوات الكرتون بقى

============

1-جيري هو اللي شرير مش توم..توم ديما قاعد في امان الله ..جيري هو اللي مصمم يروح يشرب اللبن من قدامه .. او ياكل الجبنة اللي توم مسئول عن حراستها .. ركزوا شوية وإنتم يتتفرجوا على توم وجيري حتلاقوا ان جيري هو اللي بيجر شكله وهو اللي بيبدأ

2-إن الأميرة فضلت تستني الامير اللي حينقذها.. بس هو مرحش لإن الدقيقة بتفرق مع فودا فون

القنوات الدينية

=========

1-أنا الحمد لله وبلا فخر مش بحبهم ومش بتفرج عليهم..أصلاً ..في ناس منهم بجد محترمة وعمرها ما باعت بس دول أمن الدولة كان مظبطهم أول يأول لإني بعتبر الشيوخ اللي فيها من فلول النظام..يعني لو هما كانوا مفيدين  وكلامهم مؤثر.. ليه لحد دلوقتي فيه كباريهات وفي خمرا ..وليه السياحة دي مش سياحة اصلا دي حاجة تانية اتكسف اقولها.. ليه الناس بتسرق والمخدرات منتشرة والأفلام الإباحية ..حد يقوللي هما بيعملوا ايه بالظبط ما دام كل الحاجات دي بتزيد أصلا.؟؟ ومش بتقل ..يعني من وجهة نظري يا إما هما بايعين..يا إما هما بيتكلموا بطريقة والدنيا كلها ماشية بطريقة

ثواني عشان مبقاش اخدت العاطل مع الباطل انا بسمع إذاعة القرآن فقط وبحبها جدا ..بحب الشيخ الشعراوي لإنه بيخليني ابص للقرآن بصة جديدة مؤثرة..المام الغزالي..لأنه بيربط الدين بالدنيا بتطبيق عملي مش منفصل .. مصطفى حسني ..حلو كبداية لحد لسة بيلتزم..عمرو خالد ..لأنه بيخلينا فعَالين ..

أما بقى رياضتي المفضلة بقيت 

=================

monester truck

يااااااا لما عربية كبيرة كدة تطير تفعص وتتطحن العربيات الاصغر منها  وااااااااو بجد 

اكتشفت حاجات تانية كتير برضه

يُتبع