أول ما دخلت الكلية وأنا عندي 17 سنة
مكنتش لسة فوقت من العته بتاع ثانوي
وصراحة كنت شايفة إنها فرصة إني أحب بقى وكدة
بس اللي كنت أعرفه عن الحب إنه بيجي من أول خبطة
يعني ديماً البطل والبطلة يتخبطوا في بعض
السكتشات توقع والنضارات
وهوبا يحبوا بعض
كنت مستنية الفرصة تجي لي في خبطة أتخبطها صدفة
بس بعد ما قعدت 3 سنين في الكلية
متخبطش فيهم غير مرتين
مرة في الأسانسير دوخت فدوست على رجل اللي واقف جنبي
:D
ومرة تانية واحد كان بيخلع البالطو واحنا طالعين من السكشن
فرزعني حتة لكامية في وشي بس لكامية ايه كانت عنب
:DDD
فهمت إن الحب عمره ما كان كدة
الحب بيجي بالراحة وبهدوء
ومن ناس مكناش نتخيل إننا كان ممكن نقابلهم أو حتى ممكن نحبهم
هو أنا صحيح برضه لسة محبتش بالطريقة التانية
بس أنا بقى معنديش استعداد أفقد عين أو عاهة مستديمة
في خبطة جديدة
:))))
التدوينة مخلصتش أنا عاوزاكم تحكوا لي عن فكرتكم عن الحب ؟؟
وقابلتوه ولا لسة ؟؟
ويا ترى وجهة تظركم اتغيرت عنه؟؟
P.S:
الدوخان في الاسانسير نشاط طبيعي بيحصل لي :))
هناك 10 تعليقات:
عاجباني قوي البوست دي علشان بتحكي واقع حقيقي
ان احب مش بيحصل زي ما بيعملوه في الأفلام
قال خبطة قال ههههههههههه
اه و الله حاجة متخلفة و تهلك من الضحك
قال يعني لازم الشخص اللي هحبه على رأيك يسببلي عاهة مستديمة علشان يحبني ههههههههه
بس انا بصراحة لما كنت داخلة الكلية مكنتش مستنية اللحظة دي , اللي هي لحظة الخبطة
كنت داخلة الكلية عاملة حسابي ان كل الشباب تافه و داخلين يظبطوا و يضحكوا عالبنات و كنت عاملاها تحدي و قلت محدش هيقدر يضحك عليا بنظرة او كلمة او ابتسامة
:D :D
علشان كده كنت جافة شوية في التعامل في البداية مع زمايلي الولاد
بس لما دخلت الاسرة و بدأت اتعامل بشكل ايجابي اكتشفت ان الشباب في منه كتير كتير جدا محترم و عنده هدف و واعي
كل ده كان كلام جانبي بعيد عن الحب ^&^
اما رأيي في الحب هأجله لتعليق تاني علشان هحتاج اقول كلام كتير ^__^
اخيرا لقيت سكة للتعليق :)
انا عن نفسى كنت شايفة ان الحب ده لازم يكون حاجة مستخبيه
الحب اللى من غير كلام بيبقى نقى اكتر
بس فى الكلية موضوع الحب ده زى مايكون فضيحة
يلا الله يرحم ايام الكلية
ايييييييه ربنا رزقنا بقى
إسراء إنتي عارفة رأيي كويس في المسائل دي D:
أول رأي ليا في الحب هو ان
الحب كلمة مظلومة لان الناس يسيئون استخدامها:)
الحب هو ان يسرق منك أحد قلبك , فلا يكون امامك سوى حلين , ان تسترد قلبك بأي طريقة كانت و يعود لك مع الوقت
او تعيش معه بقية حياتك لان ببساطة روحك و قلبك بين يديه , اي انك تتعامل مع سارق ففي المقابل امامك فرصة ان تسرق قلبه انت ايضا اذا استطعت :)
أسوأ شيء في الحب أنه يعلمنا الخوف , أو ربما هذا اجمل شيء فيه :) , لان الحب يصنع الخوف اينما وجد و يجعل الشخص الذي كان لا يوجد عنده ما يخاف عليه او منه , ان يخاف طوال الوقت !!!
الحب زي ما انتي قلتي فعلا بييجي بهدوء و بالراحة و بيتسرب من غير ما نحس جوانا لحد ما يتغلغل جوة و يحط جذوره و منقدرش نقتلعه و نتخلص منه بسهولة و هيسبب لنا آلام فظيعة لو حاولنا نقتلعه
و كمان بييجي من ناس اول ما قابلناهم عمرنا ما تخيلنا ان هما دول اللي روحهم هتدخل جوانا في هدوء و تستقر جوة من غير ما نحس و نبدأ تدريجيا ندرك انهم ملكونا :)
و اخيرا , كل الكلام اللي فات ده عن الحب صحيح و لكن لو بدأ صح , الحب اللي بياخد سكة غلط من اوله و مفهوش صبر و تقوى لله , بيضيع و بتكون جذوره ضعيفة و اي كلام
اما الحب اللي بيكون في سكة صح و بادئ صح , حتى لو محصلش كلام بين الطرفين يزود مشاعرهم , مجرد ما هما الاتنين عارفين انهم مختارين بعض و بدأوه صح و بيصبـّروا بعض بتقوى الله لحد ما ييجي الوقت اللي يقدروا فيه يبوحوا بما في داخلهم , هنا الحب هيزيد بشكل لا يوصف و لا يصدقه بشر لان الناس اللي حواليهم مش هيكونوا جربوه زيهم و لا صبروا زيهم فمش هيفهموا سر قوته ايه !!!
يعني الحب اللي ربنا بيحط فيه بركته بيكون أقوى من اي شيء في العالم , كل ما تقل البركة يقل معاها قوة الحب
:))))
@خديجة
كنت داخلة الكلية عاملة حسابي ان كل الشباب تافه و داخلين يظبطوا و يضحكوا عالبنات و كنت عاملاها تحدي و قلت محدش هيقدر يضحك عليا بنظرة او كلمة او ابتسامة
:D :D
ماهو الأنطباع دا برضه يا خوخة سببه الأفلام برضه :DD
ههههههههههههههههههههه
أوكش مستنية بوست تاني عن رأيك في الحب ما تزوغيش أنا بحذرك :DD
مها
الحب اللى من غير كلام بيبقى نقى اكتر
إزاي يعني يا مها ؟؟
إيه علاقة الكلام بنقاء الحب بصي أنا مش مع إن الحب يمر بمرحلة الصحوبية والدنيا تتفتح ع البحري
بس لازم اللي بيحب يقول عشان يعرف رد فعل التاني وإذا كان عنده مشاعر ليه أو لا ويبدأوا يتفقوا ع الارتباط الرسمي كلام في اضيق الحدود يعني يحطوا النقط ع الحروف مش أكتر
اللهم آمين يا مها :)
إسراء
هههههه مفيش أمل تتغيري يا سو ولا مش عاوزة أصلاً تتغيري؟ :D
خوووووووووووووخة
الله ينوّر بجددددددددد إيه دا كله إيه دا كله كان مستخبي فين كل دا
ومعاكِ حق في مسألة تقوى الله في الحب لا بجد شابووووووووووه
حاسة انى مش هاقدر اوصلك قصدى
عندى مشكلة فى التعبير بالذات فى الحاجات دى
عشان كده بقولك انه من غير كلام بيكون احسن
انا ممكن ما اتكلمش معاكى كتير بس احس مشاعرك ناحيتى
هو ده اللى اقصده وبعدين الحب مش اتفاق ولا توافق
يعنى مش لازم عشان بحبك نتكلم ونتفق
ممكن عشان بحبك استنى منك مبادرة او مفاجئة
او استنى منك المستحيل فى سبيل حبك ده
فى الحب اللى بيتحس افضل كتير من اللى بيتقال
يا ترى قدرت افهمك قصدى ؟؟
اة انا محبتش ولا تحبيت ولا عيزة اتخبط ولا حاجة خالص لان الحب دة مش يجى من وراه غير وجع القلب مهما كان فى حب بين الطرفين بعد الجواز كل شىء يبروح مع الوقت ومفيش قصة حب بتستمر لان بعد كدة بننسى الحب دة وبننشغل بطغوط الحياة ....فنصيحة سيبك من موضوع الحب دة وما دوريش علية فى حد يدور على تعبة بأيدة سيى الموضوع دة يجى لوحدة ما تستعجليش على تعبك وحزنك
إرسال تعليق