إعترافات مُراهقة:ريهام ♥

النهاردة الصبح قابلت ريهام صديقتي الصدوقة  اللي ماشوفتهاش من 3 سنين من ثانوي ..كنّا راكبين مع بعض المشروع ودي كانت النتيجة  !

 (1)

ذكرياتي عن ثانوي مش كتيرة مش فاكرة منها غير إني مرة كنت في أوضة الوسائط متنحة في السقف لإن مدرستي كانت فيلا للأجانب من طراز التلاتينيات وكان السقف عالي أوي ومنقوش نقوشات حلوة زي ما كل حاجة كانت حلوة وقتها  .. كل اللي فكرت فيه ساعتها يا ترى كمان سنة من دلوقتي هبقى قاعدة في كلية إيه .. يارب أخلص بقى

* * * *

سقف الكلية اللي برغم حجمه إلا إنه سقف واطي وبارد أوي من التكييف 
سقف لأجنة أحلام معادتش لاقية دفا عشان تكمّل نموها .. 

متقدرش تتنفس في المدرج من الزحمة

  براحها لسة في مدرسة الثانوي

(2)

شلة ثانوي  في الدرس لما المدرس طلع يرد ع التليفون

وساعتها صممت إن حد يقولي نكتة  في المناسبة دي
وصوت   8 بنات
بتضحك في نفس الوقت خلّى الجيران تشتكي

لأننا كنا فوق جامع وباقي العيال مش فاهمة ايه اللي بيحصل -كانت أول وآخر مرة ضحكت فيها من قلبي بجد 

* * * *

محاضرات د.نبيل في الكلية .. 

كنا ديماً بنتحذّر من محاضرته بس اللي سمعناه مكانش ممكن يتقال لحد 

كانت بتخلّيني وبتخلّي البنات كلها تنكمش في البنشات وتحمّر.. 

مش من كلامه على قد من ضحك الولاد اللي قاعدين ورانا 

ضحكهم المُفجع بجد 

ضحكهم اللي بينشف الدم في عروقنا

(3)

والمدرسة كانت بتحتفل حفل ختام العام بس احنا احتفلنا فيه في الفصل على طريقتنا الخاص زغاريد وطبل ورقص المدرسين كانوا في حالة ذهول لإن دا مستوى مدرسة متفوقات ! 

ميعرفوش إن دا مستوى بنات مُراهقات

(4)

كان إحساس كسر القوانين ممتع أوي

لمّا كنت بزوّغ اخر اسبوع من الفصل

وأنزل أقعد في الحوش  العقاب كان نفسه ممتع

لإن معناه إن إنت لسة مسؤل من حد

(5)

ذكرياتي عن ثانوي مش كتيرة بس 

إحساس الوداع في آخر يوم دراسة كنت حاسة في آخر جرس ضرب

مكانش جاي بفرج مستنيّنه بفروغ الصبر على غير العادة

زي ما يكون ..ضرب طلقة في قلبي وسابه مرمي في أرض الحوش محبوس وحيد مش عارف إيه اللي بيحصل ؟خايف بيرتعش بيعيّط بينزف ..

طلعت من غيره وسيبته بيعاني 

قلبي اللي لسة في الحوش مرجعليش لحد دلوقتي  

بينتقم مني

(6)

ريهام البنت الجميلة الشقية الناعمة اللي دمها خفيف

ريهام لما كانت بتدخل مكان مش ممكن يفضل زي ما هوّا 

كل حاجة كانت بتقول إن ريهام موجودة فيه

ريهام حلم كل ولد في الدنيا :)

ريهام كانت حاجة من الحاجات اللي سيبتها وودعتها على أمل إني حرجع لها

ومش عارفة بقى مقابلتنا النهاردة دي فرصة إني أرجّع اللي اتسرسب مني وانا مطنشة

ولّا مجرد لقاء مع الماضي

P.S

بحبِك أوي وآسفة عشان قصرت معاكِ السنين دي كلها

تم بحمد الله