الحكاية عن الشجن

يالراوي ..سعاد ماسي

عادي يعني ما فيهاش حاجة .. لو طلع فيلم MR.popper's penguins مش حلو زي ما اتخيلت .. مش زي ما كنت فاكرة إن جيم كاري وبطاريق في فيلم واحد هتبقى قافلة .. لا قافلة ولا بتاع 

عادي كمان لما كنت بتفرّج على حكايات خيال الظل الصبح .. معرفش السحر العجيب فيها .. إن القصص ناضجة أوي والشخصيات مش عبيطة .. دا غير الفن في الرسم والحكاية والتحريك .. كمان النهايات بجد حزينة ..الموضوع كله عن الشجن.. كانت القصة عن عروسة البحر اللي بتحب أمير من البر وبتتجوزه والساحرة الشريرة بتسيبهم في حالهم .. بس مش دا اللي حصل في خيال الظل .. اللي حصل إن الأمير اتجوز واحدة تانية عادي وهي اتحوّلت لموجة من أمواج البحر الكتيرة ..

الحكاية أوقات كتيرة بتنتهي .. بس ظلها بيفضل موجود .. بيداري من الشمس ومن الحقيقة لحد ما بيرجع أقوى من أي شمس ونهار .. الظل بيتقلب لظلام