مكانش قصدي أكتب كدة

The wheel breaks the butterfly

أنا كنت جاية أكتب تدوينة عن نظريتي اللي بتقول إن الإنسان أصله صيدلية :D

بس إذ فجأتن وأنا بكتب .. لاقيتني إني بشوف الحاجات محتلفة أوي .. مختلفة زي ما أي حد مش بيشوفها .. يعني مثلاً كام صيدلانية ربنا خلقها ..؟؟ كتير .. أنا الوحيدة اللي اتوصلت للنظرية دي مع إنهم وقفوا في الصيدليات يمكن كمان أكتر مني .. واللي هقوله عن أدلة النظرية دا صحيح بس عمر ما حد غيري ربط بينه وبين طبيعة الإنسان.. أنا ممكن أكون ماشية في الشارع ومخنوقة من الزحمة والعمارات .. ببص قدامي بشوف بنت طويلة أوي بشوف رجليها في الأرض وراسها في السما قاعدة بتجري وبتستخبي بين العمارات .. بتلعب بالسحاب وبتوشوش القمر.. ولما بتتعب بتقعد تستريح على أعلى عمارة وهي مدلدلة رجلها .. وبتقول لكل الناس اللي مزحومين ومخنوقين .Go to hell وهي مطلعة لسانها

ممكن كمان أشوف .. بجعة كبيرة جداً بتيجي من بعيد من السما .. المكان اللي بتشوفه نقطة.. تطير وتنزل قدامي عشان أركب عليها وتاخدني مع باقي النقط اللي في السما 

أخويا الصغير بيقولي إنتِ عايشة في عيشة مش عيشتك .. وأخويا الكبير بيقوللي أنا كل ما بشوفك بستغرب إنك أزاي أختنا .. 

وأنا بقى حاسة إني مش بنتمي للدنيا دي .. مش دي المشكلة.. المشكلة إن كل مشكلة في حياتي بسبب كدة ..المشكلة إني بلوم نفسي على التفكير دا .. ونفسي أبقى زي البشر الطبيعيين وبيشوفوا الحاجات بشكلها الطبيعي.. إن الصيدلية مكان بنحط فيه الدوا .. والعمارات عمارات والزحمة زحمة وبس
أنا كل يوم بتمرجح بالشعرة اللي بين العبقرية والجنون
ومش عارفة أعمل إيه؟