إلى أولادي (2) .. تعليقاً على نتائج الاتخابات

(1)

أنا انتخبت حمدين .. ليه مش عارفة.. فضلت استبعدهم واحد واحد ومفضلش غيره صورته نضيفة .. كنت منتخباه وأنا مش حاطة أي أمل .. بس لغاية ما بدأ ينافس شفيق ع المركز التاني .. حسيت لأول مرة إني انتخبت صح وإنه فعلا زي ما قالوا ..كان واحد مننا بقى أملنا كلنا

(1/)

إسكندرية كلها انتخبت حمدين هي والقاهرة وبورسعيد.. ال 3 مدن دول العصب الحقيقي للثورة.. بس للأسف مفيش انتشار فكرهم في باقي المدن .. صحيح اسكندرية من بعد خالد سعيد وسيد بلاب كانوا تمهيد .. كانوا كل جمعة يلبسوا إسود ويوقفوا بطول الكورنيش .. لا رافعين يافطة ولا بيتكلموا .. والموضوع وصل لكورنيش النيل .. للأسف مكانش ممكن اقف معاهم =(

(2)

الإعادة بين مرسي وشفيق .. لسة الكلام مش نهائي .. ولسة الناس حاطة أمل إنه يتقبل الطعون والبلاغات اللي على شفيق .. ويتم استبعاده .. بالمناسبة عليه 30 بلاغ في قضايا رشوة وفساد .. دا غير موقعة الجمل نفسها .. بس كلهم اتحولوا للقضاء العسكري ..ربنا ينتقم من النائب العام ومن اللي عينه.. صحيح حاولنا نقيله .. بس منفعش .. عشان منصبه محصّن من العزل .. يعني شيلنا مبارك ومش عارفين نشيله

(3)

مبارك كان أهون مشاكلنا .. طلع إن في ناس أتقل منه كانوا بيحركوه ويحركونا بمزاجهم.. هما مين مش عارفين لحد دلوقتي ..

(4)

بقى عندي يقين إننا عمرنا ما هنشوف نتيجة لثورتنا .. بس احنا هنفضل نعافر .. رفعنا راسنا مرة ودوقنا الموت .. عمرنا ما هننحني تاني .. ممكن أنتم اللي تشوفوا النتيجة .. بعد ما نربيكم صح وعلى نضافة..مش زي اللي اتعمل فينا.. احنا جيل متمرد بالكامل ومش جايبنا ورا غير جيل أهالينا بالكامل .. ناس بتقولي إنهم معذورين ودا مش ذنبهم.. بس أنا مش قادرة أسامحهم

(5)

دلوقتي لو شفيق كسب .. بفكر جدياُ بالهجرة .. مش هروب .. غير إني يا هتكيف يا هموت .. وانا اخترت أعيش .. عهيش وأربيكم وترجعوا تكملوا اللي احنا بدأناه

(6)

العسكر كلهم حرامية.. لو نجحتوا في ثورتكم .. متسلملهومش تاني .. كمان الإعلام لزم تنفوا كل إعلاميين اللي اتحسبوا ع النظام

(7)

افتكروا الشهدا اللي ماتت .. ديما وما تعتبروهمش رقم في كشف,, واوعوا تنسو اللي اتدبحوا في بورسعيد.. اعرفوا إن لو حق الشهدا ما جاش البلد دي عمرها ما هتقوم لها قومة تاني..

(8)

الثورة مش ميدان وبس .. الثورة فكرة .. وكما قال V

ideas are bulletproof