بقالي فترة كبيرة بصحي من النوم أنزل الكلية ومدخلش بيتنا غير في العشا.. مش مهم حضرت كام محاضرة ولا سكشن كان قد ايه.. انا هفضل في الكلية لآخر وقت.. بروح اتغدى وأنام وأصحى تاني يوم وهكذا.. إحساس إني بلف في ساقية دا مش لطيف.. ومش فاهمة أنا إيه اللي جبرني على كدة
حقيقي أنا مش بفهمني .. ومش بفهم الحجات اللي عاوزاها.. ومش بفهم الحاجات اللي كنت عاوزاها ولما جت لي زهدت فيها .. وهل أنا لازم افهم؟
أنا شخص Insecure مفتقدة ديماً الإحساس بالأمان .. ودا شئ بيتجاوز إسراء اللي في كلية لإسراء الطفلة .. ممكن أول مرة حسيته لما كنت في الحضانة وأول مرة اشتري شيبسي .. طلعت عشان أعلم الكراسة بتاعتي .. وأنا راجعة البنات اللي ع الحرف مش رضوا يعدوني .. طلعت ع الكرسي بتاع الميس .. عشان أعدي وأرجع مكاني من فوق الديسك .. الكوتشي بتاعي ساب علامة فوق الجلد الأحمر اللي بيبطن الكرسي.. الميس قالت مين اللي عمل كدة؟.. قولت لها أنا .. قالت لي امسحيه.. مسحته بأيدي اللي كان فيها زيت من الشيبسي .. - Which Is Anyel- وكان رد فعل الميس إنها ضربتني بالكراسة في وشي.. واتعلمت درس مهم جداً اليوم دا .. إني مش المفروض آكل شيبسي..
زي بالظبط لما كبرت شوية في ابتدائي وكنت بحفظ في دار .. والميس كانت بتفرق بينا في المعاملة .. بنات جم بعدي وكانت عاوزة تسمع لهم قبلي .. ولما تمسكت أن دا دوري وإني المفروض أسمع الأول .. قالت لي خلاص سمعي.. وحسيت بقى بلذة إني أخدت حقي منها ومن اللي بتعمله فيا طول الصيف.. ولما بدأت أسمع اتلككت على كل أخطائي مكملتش آيتين وقالت لي باللفظ .. قومي من وشي.. طبعاً الدرس المستفاد هنا إني مش المفروض أخد حقي..
عارفين الشخصيتين دول وشخصيات أخرى .. أنا مش مسامحاها .. ومفيش حاجة ممكن تغفر اللي عملوه فيا .. غير يوم القيامة لما ربنا يقول لسة في حد ليه حق عندكم .. وييجوا يدوني حقي دا هو أنا ساعتها بس أكيد هسامحهم .. بس الفكرة لما يعرفوا إنهم حلوين وزي الفل ومع ذلك في حاجة مش عارفينها منعاهم يدخلوا الجنة .. القلق الرهيب اللي ممكن يحسوه وقتها وأن كل اللي عملوه في حياتهم ممكن يكون ولا حاجة غير الحق اللي ليا عندهم ..وأنهم ممكن يدخلوا النار وبتعذبوا بحق مش ردوه.. لحظة صعبة مش كدة.. ويطلع في الأخر إن الحق اللي عليهم كان بسبب تشويه نفسية طفلة .. وإنه ذنب لا يغتفر مش زي ما هما كانوا فاكرين..ساعتها بس ممكن أسامحهم في الآخرة
ومحدش برضه يقوللي سامحي في الدنيا وكدة لإنه مش بالبساطة دي ..
لأني حتي لما حاولت أسامحهم وفشلت .. عيشت بتأنيب ضمير رهيب إني إنسانة وحشة ومش متسامحة.. وأنا اللي غلطانة في الآخر
نطلع قدام شوية في امتحان ال Math في الكلية لما كت لابسة أكتر فستان حبيته في حياتي .. فستاني الأحمر.. وتقريبا مكنتش عارفة أحل حاجة في الامتحان وانهرت من العياط بعديه .. عشان المشكلة في الفستان مكانش المفروض البسه يوم امتحان الMath ..
وكله كوم ولما يكون عريس متقدم لي اللي هو مناسب وزي الفل وهيريحني .. بس طبعا كل الحاجات اللي حكيتها لأمي عن الإنسان اللي مستنياه ومبادئي وأفكاري اللي مش هتناسب أي حد ومحتاجة حد يقدرها.. بتتنسى وبتتحول في الأخر لفلسفة وكلام كتب والدنيا مش زي الروايات اللي هبلت عقلي .. طبعاً هنا كانت غلطتي لـأني مش المفروض أحكي
كل حاجة في حياتي بقيت كدة بقيت الشيبسي اللي مش المفروض اخده لمجرد إنه شيبسي وأنا إسراء وبس .. وحد لو جاه عطهولي بقول لأ عشان مفيش غير كراسة بتضرب بيها في وشي في الاخر..
ومهما حد بقى يقوللي إنتي مش غلطانة والعيب مش في الشيبسي .. عمري ما هصدقه .. لإني بلف ألف وأتغلب مهما أتغلب على دا جوايا لازم أرجع لنقطة الصفر من تاني..وأرجع ادور عليه وألف في الساقية ..وعشان كدة Mainly أنا لا واثقة في نفسي ولا واثقة في حد
عارفين لو بصيتوا على سمكة في حوض ..ديما في سمكة كدة عمالة تعوم بسرعة وتطلع وتنزل وتجيب الحوض من أوله لأخره .. تايهة ونفسكوا تعرفوا السمكة دي بتدور على ايه؟؟..
دي بتدور ع الشيبسي اللي ضاع منها.. اللي لما أكلته مرة انتهي بيها الحال من المحيط لحوض زجاج
الآتى نياتى جريح الآتى حصان مطلوق قلبك تعبان من الريح لكن مستنى شروق
يمكن يسقينا الشاى يمكن يعطينا الناى
هناك 7 تعليقات:
يمكن كلنا لينا مواقف شبيهه بالمواقف دى بس تفرق انتى بتبصى للموقف ازاى
ممكن تعديه عادى ومتركزيش فيه وممكن تتعقدى منه لفترة كبيرة او صغيره وكلنا بيحصلنا كده لكن بعد فترة اما تفكرى فيها هتلاقى انك كنتى غلطانة فتفكيرك بالشكل ده ...الغلط مكنش منك اساسا فى كل المواقف دى بس انتى ركزتى فيها زياده عن اللزوم واعتقدى انه العيب من عندك وبقيتى مش مسامحاهم كمان
كان عندنا مدرسه فى الحضانه كانت بتيجى كل يوم اتنين بس
المدرسه دى مرة ضربت طفل بالقلم على وشه
انا طبعا اترعبت وبقيت باكره يوم الاتنين وبخاف بس لو فكرت تكلمنى او تقرب منى وطبعا اتعلمت الجبن وانى مش المفروض اتكلم احسن تضربنى:)
بس اما بافتكر الموقف دلوقتى بلاقى انى انا اللى كنت فاهمه الموقف غلط وهى اساسا اللى غلطانه فى تصرفها وانه احنا مكنش المفروض يبقى ده رد فعلنا تجاها وهو الخوف منها بالشكل ده لانها اكيد كده افتكرت انها احسنت التصرف وقدرت تسيطر عالفصل ...تخيلى نفسيه الطفل نفسه لو كان لسه فاكراهالها بقى ...ممكن يكون متاثرش اساسا ولا خلته جبان ساعتها زينا :))
وبالمناسبة .....كلنا حلينا وحش فى امتحان الماث ده يعنى مكنش العيب فى فستانك التوحفه اساسا يا اسراء :)
ههههههههههههههههههه
طب قشطة هشيل الموضوع دي من حساباتي..
بس مع إن كلنا حلينا وحش في الامتحان بس أنا الوحيدة اللي كنت لابسة حاجة بحبها أووووي
بصي يا رغدة في حاجة في علم النفس اسمه Unfinished business
وهو دا اللي بعاني منه .. الدكتور قال إنتِ المفروض تتقبليه.. أو تتجاهليه لكن مش قادرة فعلياً أعمل كدة.. لأن كل حاجة كل حاجة بجد بتلف تلف وترجع تاني.. اللي أنا حاكياه دي مواقف بسيطة من مواقف تانية حصلت لي .. المشكلة بقى إن المواضيع الغير منتهية جوايا أنا بحارب بكل قوتي عشان أنهيها وهي مش المفروض تبقى finished business أصلاَ
وفكرة إني مش المفروض أربط المواضيع كدة ..أو ان الولد دا متأثرش نفسياً.. دا مش بايدي .. لأنه عيب أو Side effect
لGift ربنا اديهالي بتربط المواضيع وبتاخد بالها من حاجات محدش بياخد باله منها وبيأثر فيها أصغر المواقف بستغلها في الكتابة في النهاية.. دي نفس ال Gift
اللي بتميزني وبتخلي الناس كلها مجمعة على إني في يوم -إن شاء الله- هبقى كاتبة محصلتش
إسلوب حكيك تلقائى جدا :)
تشوية نفسية الطفلة أمر لا يغتفر فى الحقيقة
لكن لعل كان ليهم ظروف قهريه دفعتهم لفقدان السيطرة على تصرفاتهم فى ذلك الحين
و إنتى مبدعة و خيالك واسه
ربما تستطيعى أن تنسجى فى خيالك قصة تجعلك قادرة على مسامحتهم .. و يكون لط عظيم الأجر
و ربما أنك تدركين أن تلك التصرفات ربما تصغيرة فى الوقت اللى إستغرقته
مما يدعو للشك .. هو ممكن نكون عملنا كدا فى حد غضب عننا .. و مش فاكرين حتى ؟!
لذا يجب المسامحة
ليسامحنا الأخرين
و ليسامحنا اللة
تحياتى :)
لأني حتي لما حاولت أسامحهم وفشلت .. عيشت بتأنيب ضمير رهيب إني إنسانة وحشة ومش متسامحة.. وأنا اللي غلطانة في الآخ
الجملة دى اثرت فيا لانى عشت فيها فترة طويله انى غلطانه عشان مش متسامحة وعشان بعافر واخد حقى
بس اكتشفت حاجة المشكلة مش انك تسامحى المشكلة ان طول الوقت بتفكرى انى مش هقدر اسامح كل مدى الحرج والموقف بيزيد صعوبه والقلق والخوف بيزيد من الناس والمواقف العدتيها عشان الدنيا تمشى تاثر فيكى بعد كدة كانها لسة حصله
القدامى غلط الصحيح لو ركزت تفكيرى على تاثير غلطنه دى عليا او ردفعلى تجاه الغلطةفى ان اسامح او لا هبقى كدة بدور فى ساقية حبسة نفسى جو غلطة واحد عملها حتى تفكيرى فية منصب على الغلطة دى
اناشاسفه ان الحل اننا نركز ونوفر مجهودنا اننا نضيع تاثير حدعلينا اناعارفه انه مش سهل بس هيحصل انافاكرة لما مدرس رياضة مرةقالى خسارة فيكى اللبس اللبساه عشان جوبت على سوال غلط قعت فترة طويلة معتبرة نفسى غبية بس قررت مع نفسى ان مش كلمه واحداناواثقة انه غلطان هتغير فيا وتكرهنى فى حاجة انابحبها خلينا نحاول نرمم نفسنا ونصلح نفسنا احسن بكتير النفكير الايجابى فى نفسك بيعلى الهمم التسامح هيجى مع الوقت صدقنى هتحصل مواقف تحسى ان مفيش اى حاجة فى الدنيا تستاهل وهتسامحى من غير ماتجبرى نفسك اناسمحت ناس ماكنتش ابدا متخيلة انى ممكن اسامحهم وعلاقتى بيهم دلوقتى كانهم ماعملوش فيا حاجه غيران صحيح ممكن الواحديجرح فى حدمن غير ماياخدبالةلايقصد ربنايسامحنا بس لوفى حدلسة ممكن ياثر فيكى سالبا كدة بتصرفاتهاو كلامه نصحتى ابعدى عنه نفسك ونفسيتك اهم حاجة عندك حافظى عليها
تحياتى ليكى لمياء
علا
تحياتي لمرورك وردك
يارب ما تكونش أخر مرة
بصي يا ستي بالنسبة للظروف .. أنا مش مقتنعة بكدة لإن كان عندهم فترة ووقت كافي كنت فيه معاهم كان ممكن يعتذروا لي فيه ..يعني لو كان ظرف مرت بيه في يوم وخرجت عن شعورها.. فكان عندها فرص طويلة أوايام أطول إنها تصلح غلطها دا .. لاحظي إن أول واحدة بتعلمني الحروف والكتابة.. وتاني واحدة بتعلمني كلام ربنا .. يكفي إنهم لا يستحقوا شرف ربنا منحهم ليه..
وحقيقة مش هتلاقي خد عنده قدرة ع التسامح والتسامح زي الأطفال
هل أنا عملت كدة في حد.؟
هو جايز أكون غلطت في حد أكيد ومجتش فرصة أعتذر له بعدها أنا مش خالية من الذنوب.. بس قياساً على الذنب دا هل أنا أثرت في نفسية أطفال بالشكل دا .. معتقدش إني عملت كدة في يوم من الايام
صدقيني يا علا أني أسامح دي شئ مش سهل .. مع إني ربنا يعلم إني بسامح كل الناس على كل حاجة ولا أحمل أي ضغائن لحد في مجال تعاملاتي
بس الشخصيتين دول من وسط ما قابلت واتعاملت من يوم ما وعيت ع الدنيا مش قادرة اسامحهم
عارفة لو ربنا بيبحبهم هيجمعني بيهم يوم جايز ييكون عندهم فرصة يصلحوا غلطهم معايا
بس حقيقة سعيدة بمرورك جدا واهتمامك بالرد :)
لميااااااااء
My fav. psychiatrist
نتكلم بكرة إن شاء الله.. اوعيييي ما تجييييييش
ربنا يعملك اللى فيه الخير :)
و إن شاء الله متكونش آخر مرة :)
إرسال تعليق