السبت، 22 ديسمبر 2012

حبيبي إنت يا فيلسوف

كنت بفكر كدة وبتأمل في علاقاتي الإنسانية .. لاقيتني حد لما بيتعامل أول مرة مع حد .. بيكسر التلج اللي بيبقى موجود .. واقعد اهزر واتكلم وكدة -ملحوظة:الخاصية دي بتشتغل للبنات بس- .. بس فعلياً مش بطور علاقتي بيهم أو اخليها اكثر عمقاً .. إلا لما اشوف في روحهم نور ربنا .. أو اقصد يعني علم .. أي نوع عندهم من العلم مش فارق بقى..
*
 الفكرة .. إني حسيت إن في حاجة هما بيعرفوا يعملوها وأنا مابعرفش .. أو حاجة هما اتعلموها وأنا لسة ماتعلمتش .. بقابل ناس عندهم نوعين من العلم .. علم أنا مهتمة بيه وعلم أنا مش مهتمة بيه .. علم مهتمة بيه زي الأخلاق والشخصيات وتطويرها والمعاني الفلسفية عن الصبر واليقين والإيمان والأحلام وتحقيقها .. وإزاي يأثروا في الناس ويسيبوا في حياتهم بصمة.. وحبي للناس دي بيبقى النسخة المصغرة لحبي للفنون والتصوير والأداب بكل أشكالها .. لأن مش حد ممكن يعملهاغير لما يكون عنده المعاني السابقة
*
وأيون دا علم لأنه نور من عند ربنا والعلم مش كتب وقراية .. العلم دا طريقة وإسلوب حياة ومش مرتبط بطبقة أو كلية أو فئة معينة..
*
أو حتى علم علمي زي اللي بدرسه في صيدلة وكدة .. في نوع من العلم مش مهتمة بيه .. حاجات زي إني اعمل كيكة وكوفيات واصطب ويندوز .. بس أنا بحترم جدا جدا الناس اللي بتعرف في كدة كفاية إنها عندها نور من ربنا برضه
*
أنا بتعرف ع الناس بسرعة جداً.. وغالباً التعارف الأول ليا مع حد بتفرد فيه شوية عن الحاجات اللي بعرف عنها او بعرف اعملها ..  بس عمري ما بطور علاقتي بيهم وأدخلهم في دايرتي غير لما بشوف النور دا جواهم .. حتى لو مكانش كامل بس بيدوروا عليه زي .. أو حتى إني سابقاهم في شوية حاجات وبنقلها لهم .. 

*
المشكلة بقى بتبدأ إني لو كنت فاكرة حد عنده نور ومطلعش كدة .. هي كل الناس جواها نور .. بس لو حد تعمد إنه يظهر لي أو يمثل لي نور مش جواه .. تن تن تششششششششش ببقى عاملة زي الموسيقى دي بالظبط ومش هعرف اشرح يعني إيه هو تسمعوها وخلاص
*
وعندي مشكلة كبيرة إني اتعامل مع حد برضه مكتفي بالنور اللي جواه ومش بيحاول يطوره.. أو حد إنه ميقدرش ويقدس الحتة دي جوايا ويشوفها حاجة مش مهمة
*
والمشكلة الأكبر إن في ناس مش بتظهر النور دا لحد غير للي يقرب منها .. فممكن في ناس اكون عارفاها من فترة كبيرة بس مش دخلتهم دايرتي فساعتها بضيع على نفسي وقت كبير قبل ما يدخلوا دايرتي  كان ممكن اتعلم منهم 
*
ومشكلة تانية إني أسأل حد سؤال في صميم النور بتاعه.. ولما معرفش يجاوب محاولش يدور أو الأنيل أنه يفتي فيه .. 
*
ساعتها بوقّعهم من دايرتي .. أنا حاسة إن دا مش صح وإن المفروض العلاقة الإنسانية تكون أكتر من كدة .. بس غصب عني بفقد الشغف اللي كان جاذبني فيهم من الأول .. وأنا أساساً شوية شغف فوق بعض.. وببعد بقسوة .. قسوة كبيرة بحجم الشغف اللي شدني ليهم في الأول .. وعلقتهم بيا وبيه..

وأنا لو اخدت قرار لحد إنه يخرج من حياتي ودايرتي.. مش ممكن يرجع  تاني ليها في يوم ..أنا مش بعرف أتعامل مع حد مش بيعلمني حاجة ومش بيتعلم مني حاجة .. وأنا مقاييسي بتبقى عالية وقاسية أوي ..أنا ببقى قاسية جداً وممكن شرسة لو حد عاوز يهدم معتقداتي وقناعاتي وإيماني مش بسمح لحد يقرب لهم أصلاً إلا لو كان هيضيف ليهم

أنا أساساً رافعة شعار "علِمني تجدني" أو "يا منوراتي غير لي حياتي " :D



الثلاثاء، 18 ديسمبر 2012

اليقين.. رسالة رقم 8

اليقين هو:
 طُمأنينة القَلْب، على حقيقة الشيءِ وتحقيق التصديق بالغَيْب، بإزالة كلِّ شكٍّ ورَيْب.
أو زي ما أحمد عمارة بيقول

تحدث المعجزة عندما يصل الإنسان إلى أعلى مراحل الإيمان واليقين بأن ما يريده سيتحقق . دون أن يشوب ذلك شائبة بسبب أي أحداث من حوله ، مهما كانت تفاصيلها .
الإيمان واليقين العميق ، مع عزل الأحداث منتهى إفراد الله بالعبادة .
إن أثرت عليك الأحداث من الداخل ، فأنت أشركتها مع الله في إدارة الأمور ، وهذا عمق معنى الشرك ، لكنه شرك خفي لا يخرج من الدين ، لكنه يؤثر على حياة الأشخاص سلبا

.الموضوع مش شك في ربنا ولا شك في قدراته ولا شك في الاسلام .. لكن موضوع شوائب ان اللي بتمناه ممكن ميحصلش او فيه حائل يحول بيني وبينه وساعتها كان بيبقى احساس بالسخط مش بالرضا ودا شئ مش كويس بس امبارح بعد محادثة بيني وبين خلود عرفت ازاي اتخلص من الاحساس دا




ثم فتحت الصبح االفيس لاقيت رضوى حاطة البوست دا:

يقول ابن الجوزى -رحمه الله :.
(فإياك أن تستطيل مدة الإجابة , وكن ناظرا إلى أنه المالك وإلى أنه الحكيم فى التدبير , والعالم بالمصالح , وإلى أنه يريد اختبارك ليبلو أسرارك , وإلى أنه يريد أن يرى تضرعك , وإلى أنه يريد أن يأجرك بصبرك , وإلى غير ذلك , وإلى أن يبتليك بالتأخير لتحارب وسوسة الشيطان (يعنى تشكيكه للعبد وبثه اليأس فى قلبه ), وكل واحدة من هذه الأشياء تقوى الظن فى فضله , وتوجب الشكر له , إذ أهلك بالبلاء للالتفاف إلى سؤاله , وفقر المظطر إلى اللجأ إليه غنى كله )

وطبعا دي رسالة واضحة من ربنا وصريحة ليا .. فالمفروض اني اصبر واحارب الوسوسة .. اصبر في حربي ليها واصبر لحد ما وصل لليقين الكامل .. واثبت لربنا في كل اختبار يختبره لي اني استحق الإمامة.. ايوة الإمامة مرة واحدة ماهي جزاء اللي يصبر ويوقن

{وَجَعَلْنَا مِنْهُمْ أَئِمَّةً يَهْدُونَ بِأَمْرِنَا لَمَّا صَبَرُوا وَكَانُوا بِآيَاتِنَا يُوقِنُونَ }السجدة24
وجعلنا من بني إسرائيل هداة ودعاة إلى الخير, يأتمُّ بهم الناس, ويدعونهم إلى التوحيد وعبادة الله وحده وطاعته, وإنما نالوا هذه الدرجة العالية حين صبروا على أوامر الله, وترك زواجره, والدعوة إليه, وتحمُّل الأذى في سبيله, وكانوا بآيات الله وحججه يوقنون.


الأحد، 16 ديسمبر 2012

Sweet disposition :)




Never too soon
Oh, reckless abandon
Like no one's watching you
A moment of love
A dream
A laugh
A kiss
A cry
Our rights
Our wrongs

So stay there
'Cause I'll be coming over
While our blood's still young
It's so young, it runs
We won't stop 'til it's over
Won't stop to surrender

الأربعاء، 12 ديسمبر 2012

كل اللي فات حمادة


ممممممممم ابدأ بإيه؟
ابدأ مثلاً بإني عندي حساسية في الأنف وجعاني وواجعة وداني وواجعة الحنجرة ومصدعاني.. وإن ضغطي امبارح كان 110/90 .. وإن النوم بقى متعب أوي وموجع ومش اوبشن رفاهية.. رجلي بتبقى متلجة ..وبتاخد ساعتين عشان تبدأ تدفى بالرغم من إني بلبس عدد 3 شراب رجالي.. وبعد 4 ساعات بصحى من كتر ما بتسخن عليا ..يعني الأول بفضل صاحية عشان ساقعة وبعد كدة بصحى عشان سخنت ..المشكلة اني بحب الشتا.. بس مش عارفة ليه هو ماباقاش يحبني

حمااااااااادة بجد


واني بمتحن ورا بعض .. وبعك فيهم كلهم .. بس لازم اروح اضحك في البيت واقول انه كان كويس عشان امي ممكن Freak out.. لو عرفت غير كدة
بس هو الحاجة الحلوة إني لما بكون قارية حاجة ومش فاكرة اجابتها بقول يا كريم يا وهاب يا من ترزق بغير حساب.. فبعلم ع الاجابة وبتطلع صح :)

وان النهاردة ضغطي بقى 130/90 .. وكنت هموت وانام في المشروع.. بس ماكنتش  جنب الشباك.. كنت هموت اكتر واقول للبنت اللي جنبي ممكن انام على كتفك لو سمحتي؟هو عادي مافيهاش حاجة مش كدة!! .. 







إلى من سيقرأ يوماً



عمرك حسيت قبل كدة بوجع؟
بحفرة نار كبيرة في صدرك .. بتحرق أطراف جسمك وأعصابك ومشاعرك ومش يضر حبة من الحلو اللي فيك.. بتحرقك ببطئ شديد وبهداوة وبسادية رهيبة


طب عمرك جربت تنام ع الأرض من الاستسلام .. وتحس إن دا مكانك الطبيعي وإنك نسيت إزاي تقف؟ أو نسيت ليه تقف أصلاً


طب جربت قبل كدة تنام ع السرير وكل حتة في جسمك بتتنفض.. ولو عينك غفلت تحلم إنك عمال تجري تجري مش عارف بتجري من إيه بس هو لازم تجري وخلاص


عمرك حسيت بوجع كدة قبل كدة؟
وجع بس .. مش خوف ولا انكسار ولا هروب

موجوع بس؟
طب لو مش حسيت بحاجة كدة قبل كدة.. هتفهم يعني إيه ابقى أنا حسيته.. حتى لو كان سبب وجعي تافه جداً بالنسبة لك..
هتفهم؟
سؤال جاه في بالي أسألهولك عزيزي مجهول الهوية

الثلاثاء، 11 ديسمبر 2012

أنا أنا.. دي أنا والله :S


تدوّر وترجع وجع واعتكاف
 وتطبع عليك السنين العجاف
 وأول ما حُبك يقابلك يسيبك !
وأول ما حُبك يسيبك تخاف
صنعت سجنك م الهوا ودخلته بإرادتك
وإديت حبيبك نفسك، ما سألت فين حطك
وإكمن كله أذاك قررت تعشق ملاك !
يا اللي عشقت الملاك حتى الملاك صدّك

الاثنين، 10 ديسمبر 2012

حلم واحد بس

مشهد "1"
"على ظهر سفينة .. ليلاً .. عصابة مسلحة مكونة من 4 أشخاص يرتدوا الأسود .. وشخص مقيد إلى خشبة رفيعة مائلة بزاوية"
يقترب يحي الفخراني بحذر من الشخص :
هل وصلت بهم هذه الدرجة من الجبن؟
تنكسر الخشبة فيسقط الشخص أرضاً..يأتي صديق له من الخلف
-ماذا تظن إنك فاعل؟
-أنا قادر على أن أقتلهم جميعاً في أقل من دقيقة واحدة
يطير في الهواء ليدور عدة دورات .. وقبل أن ينتهي ..يسقط ال 4 رجال المسلحين مقتولين


يسود الهرج والمرج بين الراكبين يقفز البعض في الماء.. تأتي حبيبة يحي الفخراني.. تخبره أنها بوسعها .. عكس اتجاه السفينة .. بعد أن غيرته العصابة ليعودوا إلى مسارهم الطبيعي

مشهد"2"
مؤخرة السفينة يقف عندها الفخراني واثنان من أصدقائه..
-هل تعلمان ما المشكلة الحقيقية.. المشكلة ليست في العصابة.. المشكلة فيمن استأجروهم ليختطفونا.. هم نفسهم الذين ما زالوا يتتبعونا في الماء
يرفع المنظار ليلي .. ناحية البحر.. بالفعل يجد من يتتبعهم
يقفز أحد أصدقائه لينجو بنفسه.. لكن تلتقطه السفينة الأخرى لتقتله وتلقي بجثته في البحر


مشهد"3"
يضع الفخراني فخ ليستدرج أفراد العصابة إلي حيث يقتلوا
وبالفعل ينجح ..



دا كان حلم واحد بس من اللي بحلم بيه يومياُ.. أكتر حاجة منرفزاني.. التأليف الفظيع والحبكة الدرامية.. اللي مش بيبقوا موجودين فيا وأنا صاحية.. بحر الخيال الواسع.. والحديث في الحلم كان باللغة العربية بجد.. أنا أحلامي وحدها يتعمل لها أفلام

الأحد، 9 ديسمبر 2012

توازن الروح والجسد"1"



لو قولنا إن البني آدم مكون من 3 حاجات .. روح وجسد ولجنة تحكيم بينهم "العقل والقلب".. السعادة مش بتتحقق غير لما يحصل توازن بين الروح والجسد ..لو حصل طغيان لحاجة على حاجة .. هيحصل فقدان للتوازن مميا يؤدي إلى الضياع ..
أحلى حاجة في الإسلام وفي ديننا إنه بيحقق التوازن دا
.
يعني لو جينا من البداية خالص وقولنا إيه هو تعريف الإيمان؟
هنلاقي تعريفه هو ما انعقد عليه القلب ، وصدّقه اللسان , وعملت به الجوارح..
الإيمان قايم على التوازن بين الروح" انعقد عليه القلب" والجسد "وصدّقه اللسان , وعملت به الجوارح"
مينفعش حد يبقى قلبه مؤمن بالله بس عمله عمل كفر.. ومينفعش إنه يعمل عمل المؤمنين لكن من جواه مش مؤمن ومش حاسس وبيقلد وخلاص.

لو بصينا على باقي الأركان.. إقامة الصلاة مثلاً
هنلاقي إنها حركات جسدية من حيث الوقوف والسجود والركوع وفي نفس الوقت عبادة روحية .. فكرة إنك واقف بين ايدين ربنا متجه ناحية الكعبة .. فكرة إن الصلاة مكفرة للذنب اللي حصل قبلها .. يبقى مينفعش تركع وتسجد وتطلع وتنزل وتقرا الفاتحة وإنت مش حاسس بالقيمة الروحية ..مش حاسس بقيمة إنك قريب من ربنا أوي.. جسمك بيصلي بس روحك مش موجودة .. صلاتك مش هتتقبل

قبل ما تصلي وإنتَ بتتوضا.. بتمسح على جسمك بالمياه بتغسله .. في نفس الوقت بتغسل روحك بتغسل ذنوبك .. مينفعش برضه تتوضا أي كلام وبسرعة .. لازم روحياً تحس يعني إيه إنك بتغسل روحك من الذنوب.. عشان كمان شوية هتسجد وتبقى قريب من ربنا

وإنت بتقرأ ما تيسر من القرآن في أول ركعتين.. جرب تغير السور اللي مش بتقول غيرها عن نفسي مكنتش بقول غير الإخلاص والكوثر والمعوذتين .. :((.. جرّب سور صغيرة تانية .. أو من سورة الكهف اللي بتقراها كل جمعة .. جرب تقول قرآن جديد .. هتحس في كل مرة بمعنى مختلف وإحساس محسيتهوش قبل كدة

بلاش نصلي بجسمنا بس .. لازم نصلي بروحنا كمان .. ممكن أول ركعة تسرح وروحك تغيب عن الصلاة.. مش مشكلة لسة قدامك 3 ركعات .. ممكن ما تفتكرش غير في أخر سجدة وتحس إنك وحش عشان مش صليت كويس .. ما تزعلش وما تقولش إنك هتروح النار.. أسجد السجدة اللي فاضلة لك دي بحق الله .. صحيح ممكن تموت في أي وقت بس ماتصليش عشان خايف تموت بس .. صلي كمان عشان عشان خايف تعيش وروحك ميتة .. أهم حاجة إنك تحاول واعرف إن الشيطان مش هيسيبك تنجح .. وإنك مش فاشل لو مش عرفت تعمل كدة .. إنت فاشل لو ما حاولتش تعمل كدة

وزي ما هشام عفيفي على طول بيفكرنا إن سنة الفجر خير من الدنيا وما فيها
أحب افكركم برضه بركعتين قيام ليل
وَمِنَ اللَّيْلِ فَتَهَجَّدْ بِهِ نَافِلَةً لَّكَ عَسَى أَن يَبْعَثَكَ رَبُّكَ مَقَاماً مَّحْمُوداً } [الإسراء: 79].

* photographed by Heba Adel

السبت، 8 ديسمبر 2012

اختبار حب


كنت بتفرج على الخواجة عبد القادر.. وبعدين زينب قالت له
أنا عاوزة عصفور بيتكلم من مصر وفستان خيط فضة وخيط دهب ومياة زمزم
وفعلاً جاب لها اللي قالت عليه.. ساعتها قالت له يتقدم لها عشان يتجوزها
ولما وشه جاب ألوان عشان أخوها مش هيوافق
قالت له أنا هسيب عندك العصفور والفستان بس اعمل حسابك
لو العصفور مات أو الفستان اتشد منه خيط
أنا مش هتجوزك يا عبد القادر حتى لو أخويا وافق
وسابته ومشيت

ساعتها افتكرت بوست كان كاتبه شريف القلاوي في المدونة بتاعته Be ReaDy To Be :- NiGmAwY 3la ToOoL ^&^
بوست قدييييم جداً أنا نفسي مش هعرف أطلعه
كان كاتب يعني إن في الحكايات الخيالية الأميرة هي اللي بتحط اختبارات للي هيتقدم لها 
بس الواقع إن العكس اللي بيحصل والولاد هما اللي بيختبروا البنات

المصيبة بقى إن في ناس كتيرة أوي عندهم التباس بين اختبار الحب واختبار الكرامة
فلو حد ساب حد عشان سقط وهو بيختبر كرامته .. احب أقول للي اتساب إن ربنا بيحبك

وهبة كمان كانت بتقوللي الولاد بقوا مغرورين أوي وبيتعاملوا على إنهم هما اللي لقطة
ومش يتعوضوا

بس أنا في نفس الوقت عجباني زينب أوي ..


مش فكرة اختبار.. لكن كفكرة إنك هتحقق لي اللي بحلم بيه 
زي مثلاً إننا نكتب كتابنا في المسجد النبوي
واحضر حفلة لعلي الحجار وعمر خيرت ومسار اجباري
وماتجيبليش هداية لبس وبيرفيوم وأدوات مطبخ ولا حتى ورد
تجيب لي هدايا متعاملتش لحد ومش ممكن تتهدى لحد لغير إسراء
زي الخواطر الكاملة للشيخ الشعراوي
ومجلد ألف ليلة وليلة 
وأي حاجة تانية على ذوقك 
و ممممم ممممممممممم
مش فاكرة الباقي صراحة 
بس أنا طيب مش كدة ها ؟ ها؟

أصلي لسة قارية البوست دا.. وحاسة بيقين إن كل حاجة ممكنة
:)

تحدث المعجزة عندما يصل الإنسان إلى أعلى مراحل الإيمان واليقين بأن ما يريده سيتحقق . دون أن يشوب ذلك شائبة بسبب أي أحداث من حوله ، مهما كانت تفاصيلها .
الإيمان واليقين العميق ، مع عزل الأحداث منتهى إفراد الله بالعبادة .
إن أثرت عليك الأحداث من الداخل ، فأنت أشركتها مع الله في إدارة الأمور ، وهذا عمق معنى الشرك ، لكنه شرك خفي لا يخرج من الدين ، لكنه يؤثر على حياة الأشخاص سلبا 
.
 أحمد عمارة


My inner voice

كل يوم وأنا راجعة من الكلية بالليل ..
 راكبة المشروع وساندة دماغي  على الشباك ..
ومغمضة عيني نص تغميضة 
عشان الإضاءة الخلفية للعربيات يحصلها scattering 
وما شوفش غير النور في السكة
بلاقي الأغنية دي بتشتغل من مكانِ ما جوايا


الأربعاء، 5 ديسمبر 2012

آيتيــــــــــــــن

في حاجات كتيرة حصلت .. بس لحد ما افضى أتكلم عنها .. عاوزة أكتب عن آيتين مهمين جداً

أول آية سمعتها امبارح من د.محمد أسامة رئيس اللجنة الثقافية في أسرة بصمة صيدلي:


{قُلْ يَا عِبَادِ الَّذِينَ آمَنُوا اتَّقُوا رَبَّكُمْ لِلَّذِينَ أَحْسَنُوا فِي هَذِهِ الدُّنْيَا حَسَنَةٌ وَأَرْضُ اللَّهِ وَاسِعَةٌ إِنَّمَا يُوَفَّى الصَّابِرُونَ أَجْرَهُم بِغَيْرِ حِسَابٍ }الزمر10

كان بيتكلم عن إِنَّمَا يُوَفَّى الصَّابِرُونَ أَجْرَهُم بِغَيْرِ حِسَابٍ.. فكرة إن في جماعة بتدحل الجنة من غير ما تتحاسب .. الخازن سألهم إنتم عملتوا إيه.. هيردوا عليه احنا اللي صبرنا .. ويدخلوا على طول من غير ما يتحاسبوا .. تخيل كدة إنك ما توقفش تتحاسب زي باقي الخلق .. في مقابل إنك تصبر .. الصبر حلو مش مر والله :)

تاني آية سمعتها كانت النهاردة.. من د.هشام الششتاوي -الطبيب النفسي- واحنا بنصور أول حلقة للإذاعة .. كنت عملت بنصيحة ابتهال وسألته إيه وصيتك لينا الحلقة دي..؟ قاللي:

{وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا وَإِنَّ اللَّهَ لَمَعَ الْمُحْسِنِينَ }العنكبوت69
كان بيتكلم عن الناس اللي بتجاهد وبتاخد روح مبادرة.. وتعمل حاجة خير .. تكون دافع لناس كتير يقلدوها .. إن ربنا بيهديعم ويسهلهم طريقهم وبيفضل معاهم

لسة الكلام مخلصش عاوزة أكلمك عن قد إيه ربنا بيحبنا وعن مواقف حصلت معايا .. وحاجات من سنتين حصلت وعرفتش حكمتها غير النهاردة.. بس في بوست تاني إن شاء الله .. لحد ما أكتبه أتأملوا الآيتين اللي فوق وطبقوها في حياتكم



الأحد، 2 ديسمبر 2012

تحديث


ابتهال صالحتني ومش جابت لي كيت كات بس ..
جابت لي كيت كات White chocolate & dark
وشيبسي بالجبنة
وفانتا
 :) :)
 وأنا كإسراء فرحت أوي 

الجمعة، 30 نوفمبر 2012

خسارة تدفع للفوز وأشياء أخرى

النهاردة كانت مسابقة المكتبة للقصة القصيرة .. ومش فوزت فيها .. أكيد كان نفسي أكسب بس ليا شوية ملاحظات:

1- أنا لسة مبتدأة .. واللي فازوا النهاردة كانوا كبار في السن كان أقل فرق 10 سنين على الأفل ..حسيت إن فوز واحدة مبتدأة ممكن يكون ظلم لناس خبرتها بالسنين .. طبعاً الموهبة مالهاش سن .. لكن تطويع الموهبة دي والوصول بيها لأكبر شكل جمالي ممكن محتاج كتير أوي ..دا غير إن فعلاً القصص الفايزة تستحق أن تفوز بجدارة حتى شوفوا بنفسكم 

2- كان فيه كابل النهاردة ... اللي فازت بالمركز الثالت زوجها كان رااااااااائع صراحة هي مهندسة في اواخر  الاربعينات وقاهرية ..جوزها كان جاي معاها يدعمها وكان فخور بيها أوي .. وتعليقاته كانت في غابة الرقي والاحترام .. مكنتش حاسة بغير .. أنا عاوزة من دا يا حزمبل أنا عاوزة من دا :) :) ... أومال ليه اللي -الله يسامحهم بقى- بيقولوا لي الناس دي مش موجودة وإني المفروض اقبل بأي حد هيعيشني كويس وخلاص .. يارب لا تشمت بي الأعداء

3- في ناس كتير مشيت لما ندهوا ع المركز الأول مكانش اسمهم.. أنا فرحت أوي صراحة إنهم مشوا .. عشان اللي مش بيستني يشوف مين المركز الأول وليه ? عمره ما هيبقى مكانه .. أحسن خلوا المنافسين يقلوا :) :))

4- أنا واخدة مركز تاني جامعة السنة اللي فاتت .. ودا مش معناه أبداً أني كدة وصلت أو ابقى حاجة .. صحيح هو أنا كدة تفوقت بس على شريحة واحدة صغيرة في السن .. كبداية كويس لكن مش كفاية ومش حاجة


ملاحظات مالهاش علاقة بالمسابقة:

1- فرحانة بدعم إسراء صوابي ليا.. أول مرة من خمس سنين تهتم كدة وتشجعني

2- لو ابتهال مجابتش الكيت كات اللي هتصالحيني بيها يوم السبت هزعل أوي بجد ..ولو زعلت بجد كدة مفيش حاجة ممكن تصالحني


3-بقالي فترة الكوابيس ضيفة عليا .. واكتشفت إن نومي مش طبيعي .. أنا مش بنام متواصل من ساعة ما دخلت الكلية.. لازم اصحى بعد 4 أو 5 ساعات من النوم ومحتاجة ساعتين تلاتة عشان أرجع أنام تاني ..مكتشفتش كدة غير لما كنت بتكلم مع صاحبتي وقالت لي ازاي وكانت مذبهلة اوي  من إني كدة من 5 سنين .. كمان لما خدت فارماكولوجي وسيوتيكال ولاقيت في علاج بيتاخد لل Intermittent sleep.. مع إني والله ممكن اكتفي بهدهدة زي دي عشان أنام على طول





الثلاثاء، 27 نوفمبر 2012

أحلامي

النهاردة لاقيت فولدر بتاعي بعنوان أحلامي .. بتاريخ 24/4/2011
بقتحه لاقيت الصور دي فيه



















حاسة بإحساس مين دول أصلاً :d

عشان أحلامي دلوقتي اختلفت كتييييييييييييييير
مع انهم 7 شهور بس فرق :))

الأربعاء، 21 نوفمبر 2012

أنا حلوة وزي الفل :D

أنا عارفة إني مش بكتب هنا غير على الوجع والاستياء.. واللي هياخد المدونة دي ك Source
عن كل شخصيتي يبقى هو ميعرفشي حاجة عني .. أنا إنسانة مش مهزومة ولا منكسرة ..
بس هو الحظ بقى إني مش بعرف اكتب غير في الحالتين دول

أنا الحمد لله ليا انتصارات برضه في الحياة ..

 يعني مثلاً واخدة مركز تاني قصة قصيرة على الجامعة :D

.. عملت مجلة فارما بظ لشباب صح من وأنا في سنة أولى :d

نظمت يوم ثقافي مع ابتهال في سنة تانية
كنت عضوة في مويك في سنة تالتة وانضميت حالياً لبصمة 
حافظةعدة أجزاء من القرآن الكريم :)
بعد برنامج في اذاعة صوت صيدلة وانا في بكالوريوس دلوقتي
السنة اللي فاتت كانت أول سنة أجيب فيها جيد جداً وأول سنة ابطل تزويغ من المحاضرات
وبألف رواية اسمها لذلك أحببتها يوماً
ليا صحاب كتير جداً غير اسراء صالح وابتهال واسراء فرماوي وهبة عادل .. اللي مش بتكلم غير عنهم .. زي اسراء صوابي أول صديقة ليا في الكلية واسراء السيد أقدم صديقة ليا من اولى ثانوي واسراء شرقاوي واسراء صبري واسراء ابو زيد ورغدة وجهاد يوسف وجهاد جابر وطبعاً سلمى ومي ولميا وحنان
انطباع الناس عني ديماً ايجابي الحمد لله وبيستغربوا لما بيلاقوني زعلانة .. يا سلام لو كان معايا الاوتجراف بتاعي كنتوا صدقتوا على طول والله 

مش معايا منه ع الجهاز غير الصفحة دي


دي صورتي بقى مع دكتور منير :)

طب مش بالذمة مش ابقى حلوة اهو وزي الفل
:) :) :)

الثلاثاء، 20 نوفمبر 2012

رسايل من ربنا : الرسالة رقم 7


ربنا على طول بيبعت لنا رسايل .. لحاجات كتيرة بنفكر فيها سواء كنت أفكار كويسة بيساعدنا إننا نكمل فيها .. أو أفكار سيئة بيساعدنا إننا منمشيش فيها .. بقالي 3 اسابيع الرسايل مكثفة من ربنا ليا بالصدفة كنت بعدهم .. ولما وصلت النهاردة للرسالة رقم 7 .. قررت اكتب عنهم

امبارح كنت اعلنت اعلان عظيم  وبرغم من إنه يبدو إنه موجع بس بالعكس ابسولوتلي دا بيوحي بقمة معاني السكينة والرضا.. المهم نمت وصحيت بالليل وأنا عمالة أردد " مَنْ كَانَتْ هِجْرَتُهُ إِلَى اللَّهِ وَرَسُولِهِ فَهِجْرَتُهُ إِلَى اللَّهِ وَرَسُولِهِ .. 

واكتشفت إن كل اللي فات دا مكانتش هجرتي لله ورسوله .. كنت مثلاً لما بتكلم عن الارتباط  كنت شايفاه إنه الحل السحري لمشاكلي وعقدي النفسية.. شكايتي من إني دخلت صيدلة غلطة وإن كان هيحصل إيه لو دخلت كلية بحبها موهوبة فيها .. كنت برضه بفكر إن كدة كل مشاكلي هتتحل .. لكني للأسف مكنتش حاجة في دماغي إني بعمل كدة لربنا وبس .. أنا كان نفسي في كدة عشان ابقى مبسوطة.. صحيت امبارح وأنا بقكر في إن كل خطوة في حياتي هي هتبقى هجرة لله ورسوله.. وكل طلب وأمنية بتمناها للغرض دا .. هجرة من السجن اللي سجنت نفسي جوا نفسي .. لحاجة أكبر وأعظم وأبقى وزي ما الصوفيين بيقولوا إن الهلاك إنك تعشق وتحب وتتمنى هالكين زيك ..

المهم دلوقتي بقى لاقيت المقال دا ودي كانت الرسالة رقم 7 اللي ربنا بيقولي فيها صح اثبتي بقى على اللي وصلتي له

 هو أنا لسة مش عارفة هستغل دا إزاي ؟ بس أكيد ربنا هيبعت لي حاجة ترشدني .. أنا واثقة إني في يوم من الايام هعمل حاجة عظيمة جداً هتخدم البشرية .. وربنا بيؤهلني وبيربيني من دلوقتي ليها :)

الحديث الكامل
 وعن أمير المؤمنين أبي حفص عمر بن الخطاب -رضي الله عنه- قال: سمعت رسول الله -صلى الله عليه وسلم- يقول: إنما الأعمال بالنيات، وإنما لكل امرئ ما نوى، فمن كانت هجرته إلى الله ورسوله فهجرته إلى الله ورسوله، ومن كانت هجرته لدنيا يصيبها أو امرأة ينكحها فهجرته إلى ما هاجر إليه . 

تصوير هبة عادل


الاثنين، 19 نوفمبر 2012

إعلان


أعلن أنا إسراء يوسف وأنا في قمة شعوري بوجع فقدان الأمل .. والإحباط والمرارة من القوالب والعقليات الجامدة..واكتشافي أن اللي كنت بصبر بيه نفسي عشان أوصل لبكالوريوس صيدلة من غير ما انتحر ولا أنشل ولا اتنقط ولا اتجن تقريبا طلع وهم.. وبعد 6 ساعات عياط.. ساعتين منهم كانوا على كتف ابتهال .. وبعد ما بوظت فرحة إسراء صالح.. وحصلت على تعاطف إسراء صبري لدرجة إنها كانت هتشتري لي فانتا .. وقلشت رضوى وهي جاية تكلمني وسيبتها ومشيت بمنتهى قلة الذوق.. بأعلن أنا في هذه اللحظة الحرجة أني مش زعلانة وراضية وصابرة ومش هتنازل عن هدفي أنا بس هغير الخطة.. ودي آخر مرة هوجع الناس معايا بوجعي -إن شاء الله-

الأحد، 18 نوفمبر 2012

قالت شادن (2): الناس معادن


بما إن الناس معادن .. فطبيعي تقابل أشكال مصدية
:D :D :D

ملحوظة: مش عارفة الحكمة من تأليفها ولا .. بس أول مرة عرفتها كانت منها

السبت، 17 نوفمبر 2012

شفاعة


 مَّن يَشْفَعْ شَفَاعَةً حَسَنَةً يَكُن لَّهُ نَصِيبٌ مِّنْهَا وَمَن يَشْفَعْ شَفَاعَةً سَيِّئَةً يَكُن لَّهُ كِفْلٌ مِّنْهَا وَكَانَ اللّهُ عَلَى كُلِّ شَيْءٍ مُّقِيتاً{85} النساء

الأحد، 11 نوفمبر 2012

ممكن مثلاً مثلاً يعني

يعني مثلاً مثلاُ يعني لما ألاقي حد من صحابي بيمر بتجربة قاسية .. وهي لسة عايشة في الاذبهلال والصدمة.. بينما أنا حاسة بيها أوي وحاسة برضه إنتِ بتتكلمي في ايه؟؟ دا أنتِ قديمة أوي دا أنا مريت بيها من زمان أوي وعديتها .. تقريباً مفيش حد مر بحاجة قاسية غير لما أكون مريت بيها الأول  وحتى القرارات اللي بياخدوها غلط نتيجة لصدمتهم.. بكون خدتها برضه.. وجربتها وبقعد أقنعهم انهم مينفعش يعملوا كدة لإن النتيجة مش زي ما هما متخيلين..
ممكن مثلاً مثلاً يعني.. إن كل التجارب المؤلمة عديت بيها في حياتي  دي عشان ربنا يجعلني سند ليهم في مواقفهم .. وأحس قد إيه هما محتاجين لحد يوقف جنبهم ويحتويهم.. لأن غالباً مكانش دا اللي بيحصل معايا.. لإن معظم صدماتي أخدتها من قبل ما اكون صداقات وروابط قوية
المشكلة إن الصدمات اللي خدتها متأثرتش بيها في وقتها قد ما بتأثر دلوقتي أكتر لما بشوفهم بيعدوا بنفس الألم اللي كنت فيه.. خصوصاً إن ربنا قرر أن كل صحابي يمروا بتجارب مختلفة في نفس ذات الوقت :D..ففعلياً مفيش حد بقعد معاه غير لما يقلب في مواجعه واكيد مواجعي .. 

مش عارفة برضه هل التجارب القاسية دي مرحلة بنتعلم منها حاجات وبتخلص ولا دي حاجة مستمرة في حياتنا .. والمفروض نتعايش بيها عادي
مشكلة كمان إني أنا بقيت بعمل زي الراجل دا في كتاب مكتوب أن تتخيل قصة جديدة لحياتك لباولو كويلو



الثلاثاء، 6 نوفمبر 2012

السمك يأكل الشيبسي أحياناً


عارفين لو بصيتوا على سمكة في حوض ..ديما في سمكة كدة عمالة تعوم بسرعة وتطلع وتنزل وتجيب الحوض من أوله لأخره .. تايهة ونفسكوا تعرفوا السمكة دي بتدور على ايه؟؟.

بقالي فترة كبيرة بصحي من النوم أنزل الكلية ومدخلش بيتنا غير في العشا.. مش مهم حضرت كام محاضرة ولا سكشن كان قد ايه.. انا هفضل في الكلية لآخر وقت.. بروح اتغدى وأنام وأصحى تاني يوم وهكذا.. إحساس إني بلف في ساقية دا مش لطيف.. ومش فاهمة أنا إيه اللي جبرني على كدة

حقيقي أنا مش بفهمني .. ومش بفهم الحجات اللي عاوزاها.. ومش بفهم الحاجات اللي كنت عاوزاها ولما جت لي زهدت فيها .. وهل أنا لازم افهم؟ 


أنا شخص Insecure مفتقدة ديماً الإحساس بالأمان .. ودا شئ بيتجاوز إسراء اللي في كلية لإسراء الطفلة .. ممكن أول مرة حسيته لما كنت في الحضانة وأول مرة اشتري شيبسي .. طلعت عشان أعلم الكراسة بتاعتي .. وأنا راجعة البنات اللي ع الحرف مش رضوا يعدوني .. طلعت ع الكرسي بتاع الميس .. عشان أعدي وأرجع مكاني من فوق الديسك .. الكوتشي بتاعي ساب علامة فوق الجلد الأحمر اللي بيبطن الكرسي.. الميس قالت مين اللي عمل كدة؟.. قولت لها أنا .. قالت لي امسحيه.. مسحته بأيدي اللي كان فيها زيت من الشيبسي .. -    Which Is Anyel- وكان رد فعل الميس إنها ضربتني بالكراسة في وشي.. واتعلمت درس مهم جداً اليوم دا .. إني مش المفروض آكل شيبسي..

زي بالظبط لما كبرت شوية في ابتدائي وكنت بحفظ في دار .. والميس كانت بتفرق بينا في المعاملة .. بنات جم بعدي وكانت عاوزة تسمع لهم قبلي .. ولما تمسكت أن دا دوري وإني المفروض أسمع الأول .. قالت لي خلاص سمعي.. وحسيت بقى بلذة إني أخدت حقي منها ومن اللي بتعمله فيا طول الصيف.. ولما بدأت أسمع اتلككت على كل أخطائي مكملتش آيتين وقالت لي باللفظ .. قومي من وشي.. طبعاً الدرس المستفاد هنا إني مش المفروض أخد حقي..


عارفين الشخصيتين دول وشخصيات أخرى .. أنا مش مسامحاها .. ومفيش حاجة ممكن تغفر اللي عملوه فيا .. غير يوم القيامة لما ربنا يقول لسة في حد ليه حق عندكم  .. وييجوا يدوني حقي دا هو أنا ساعتها بس أكيد هسامحهم .. بس الفكرة لما يعرفوا إنهم حلوين وزي الفل ومع ذلك في حاجة مش عارفينها منعاهم يدخلوا الجنة .. القلق الرهيب اللي ممكن يحسوه وقتها وأن كل اللي عملوه في حياتهم ممكن يكون ولا حاجة غير الحق اللي ليا عندهم ..وأنهم ممكن يدخلوا النار وبتعذبوا بحق مش ردوه.. لحظة صعبة مش كدة..  ويطلع في الأخر إن الحق اللي عليهم كان بسبب تشويه نفسية طفلة .. وإنه ذنب لا يغتفر مش زي ما هما كانوا فاكرين..ساعتها بس ممكن أسامحهم في الآخرة
ومحدش برضه يقوللي سامحي في الدنيا وكدة لإنه مش بالبساطة دي ..
لأني حتي لما حاولت أسامحهم وفشلت .. عيشت بتأنيب ضمير رهيب إني إنسانة وحشة ومش متسامحة.. وأنا اللي غلطانة في الآخر

نطلع قدام شوية في امتحان ال Math في الكلية لما كت لابسة أكتر فستان حبيته في حياتي .. فستاني الأحمر.. وتقريبا مكنتش عارفة أحل حاجة في الامتحان وانهرت من العياط بعديه .. عشان المشكلة في الفستان مكانش المفروض البسه يوم امتحان الMath .. 

وكله كوم ولما يكون عريس متقدم لي اللي هو مناسب وزي الفل وهيريحني .. بس طبعا كل الحاجات اللي حكيتها لأمي عن الإنسان اللي مستنياه  ومبادئي وأفكاري اللي مش هتناسب أي حد ومحتاجة حد يقدرها.. بتتنسى وبتتحول في الأخر لفلسفة وكلام كتب والدنيا مش زي الروايات اللي هبلت عقلي .. طبعاً هنا كانت غلطتي لـأني مش المفروض أحكي 




كل حاجة في حياتي بقيت كدة بقيت الشيبسي اللي مش المفروض اخده لمجرد إنه شيبسي وأنا إسراء وبس .. وحد لو جاه عطهولي بقول لأ عشان مفيش غير كراسة بتضرب بيها في وشي في الاخر.. 

 ومهما حد بقى يقوللي إنتي مش غلطانة والعيب مش في الشيبسي .. عمري ما هصدقه .. لإني بلف ألف وأتغلب مهما أتغلب على دا جوايا لازم أرجع لنقطة الصفر من تاني..وأرجع ادور عليه وألف في الساقية ..وعشان كدة Mainly أنا لا واثقة في نفسي ولا واثقة في حد


 عارفين لو بصيتوا على سمكة في حوض ..ديما في سمكة كدة عمالة تعوم بسرعة وتطلع وتنزل وتجيب الحوض من أوله لأخره .. تايهة ونفسكوا تعرفوا السمكة دي بتدور على ايه؟؟.. 
دي بتدور ع الشيبسي اللي ضاع منها.. اللي لما أكلته مرة انتهي بيها الحال من المحيط لحوض زجاج

الآتى نياتى جريح الآتى حصان مطلوق قلبك تعبان من الريح لكن مستنى شروق
يمكن يسقينا الشاى يمكن يعطينا الناى

السبت، 3 نوفمبر 2012

الحقيقة المرة

الأغنيتين دول هما الحقيقة المرة .. اللي جيلنا كله حاسس بيه ناحية البلد.. لو سمعتهم .. من غير ما تعرف ظروفنا ومن غير ما تشوف الكليب.. بتاعهم أول حاجة هتفتكرها إن واحد بيغنيها لحبيبته اللي مبهدلاه ومطلعة عين اللي جابوه.. وبعدين مش هتتخيل أبداً إنها مصر.. مع إنك هتستنتج كدة لوحدك من غير ما حد يغششك.. لأن اللي وصفها وصفها بالورقة والقلم.. احنا الجيل اللي أفلام حرب أكتوبر وأغنية يا حبيبتي يا مصر.. ومتقولش ايه اديتني مصر.. بيموتوه من الضحك.. احنا الجيل اللي أكل أكل مهجن ومحقون ولحم حمير وكلاب.. الجيل اللي بيقعد أكتر من 14 سنة في التعليم وهو مش فاهم حاجة.. احنا الجيل اللي اتعود ع الموت سواء من حريق قصر ثقافي أو خروج قطار عن مساره .. عندك بقى المختل عقلياً والماس الكهربي وصخور الدويقة.. بقول إيه اسمعوا أحسن

أنا طفل اتعلق بيكى فى نص السكه وتوهتيه

بيني وبينك بكره جاى.. ولسه مش عايز اشوفه

الأربعاء، 31 أكتوبر 2012

خلق القرآن"3" :القتال في سبيل الله "1"

القتال في سبيل الله مش فكرة حرب وبس .. بالعكس فكرة الحرب دي فكرة سهلة ويوتوبية أوي لإنك بتبقى عارف إنت عدوك مين ؟ وأنت هتحارب مين ؟ لكن معظم حياتنا بيبقى فيها قتال في سبيل الله مع حد مش عارفه .. عن فكرة غلط بقيت سائدة في المجتمع ..وأنت حتى مش قادر تغيرها ككل لكن بتحارب عشان ميغيروهاش فيك .. عن مثلاً فساد شايفه في شغلك أو كليتك وأنت بتقاتل من أجل الحق ومن أجل ترفع الظلم عن ناس تانية .. دا برضه يعتبر قتال في سبيل الله من وجهة نظري .. عشان كدة هحاول أذكر صفات المقاتلين في سبيل الله  -مما ورد في وصفهم من سورة النساء-


*وَإِنَّ مِنكُمْ لَمَن لَّيُبَطِّئَنَّ فَإِنْ أَصَابَتْكُم مُّصِيبَةٌ قَالَ قَدْ أَنْعَمَ اللّهُ عَلَيَّ إِذْ لَمْ أَكُن مَّعَهُمْ شَهِيداً{72} وَلَئِنْ أَصَابَكُمْ فَضْلٌ مِّنَ الله لَيَقُولَنَّ كَأَن لَّمْ تَكُن بَيْنَكُمْ وَبَيْنَهُ مَوَدَّةٌ يَا لَيتَنِي كُنتُ مَعَهُمْ فَأَفُوزَ فَوْزاً عَظِيماً{73} فَلْيُقَاتِلْ فِي سَبِيلِ اللّهِ الَّذِينَ يَشْرُونَ الْحَيَاةَ الدُّنْيَا بِالآخِرَةِ وَمَن يُقَاتِلْ فِي سَبِيلِ اللّهِ فَيُقْتَلْ أَو يَغْلِبْ فَسَوْفَ نُؤْتِيهِ أَجْراً عَظِيماً{74}النساء
عن إنك مش تلتفت لو قابلت النوعية دي من الناس اللي مش خايفة غير على نفسها وماسكة في الدنيا.. لإن مش بيعرف يقاتل في سبيل الله غير حد بيفضل الأخرة عن الدنيا .. وربنا هنا بيرفع معنوياتهم حتى لو خسروا أو قُتلوا بأنه سيكافئهم بأجر عظيم .. مش مهم يكسبوا المهم إنهم يقاتلوا 


* وَمَا لَكُمْ لاَ تُقَاتِلُونَ فِي سَبِيلِ اللّهِ وَالْمُسْتَضْعَفِينَ مِنَ الرِّجَالِ وَالنِّسَاء وَالْوِلْدَانِ الَّذِينَ يَقُولُونَ رَبَّنَا أَخْرِجْنَا مِنْ هَـذِهِ الْقَرْيَةِ الظَّالِمِ أَهْلُهَا وَاجْعَل لَّنَا مِن لَّدُنكَ وَلِيّاً وَاجْعَل لَّنَا مِن لَّدُنكَ نَصِيراً{75} الَّذِينَ آمَنُواْ يُقَاتِلُونَ فِي سَبِيلِ اللّهِ وَالَّذِينَ كَفَرُواْ يُقَاتِلُونَ فِي سَبِيلِ الطَّاغُوتِ فَقَاتِلُواْ أَوْلِيَاء الشَّيْطَانِ إِنَّ كَيْدَ الشَّيْطَانِ كَانَ ضَعِيفاً{76}النساء
الأيتين دول بيوصفوا بالظبط اللي بيحصل في سوريا وبورما .. لا يملكون إلا الدعاء لله وربنا بيحث باقي المسلمين على نصرتهم وربنا بيرجع يرفع من معنوياتهم تاني .. بتذكيرهم أن مكر الشيطان وكيده ضعيف .. بس للأسف مفيش فايدة وكله مشغول بنفسه

*أَلَمْ تَرَ إِلَى الَّذِينَ قِيلَ لَهُمْ كُفُّواْ أَيْدِيَكُمْ وَأَقِيمُواْ الصَّلاَةَ وَآتُواْ الزَّكَاةَ فَلَمَّا كُتِبَ عَلَيْهِمُ الْقِتَالُ إِذَا فَرِيقٌ مِّنْهُمْ يَخْشَوْنَ النَّاسَ كَخَشْيَةِ اللّهِ أَوْ أَشَدَّ خَشْيَةً وَقَالُواْ رَبَّنَا لِمَ كَتَبْتَ عَلَيْنَا الْقِتَالَ لَوْلا أَخَّرْتَنَا إِلَى أَجَلٍ قَرِيبٍ قُلْ مَتَاعُ الدَّنْيَا قَلِيلٌ وَالآخِرَةُ خَيْرٌ لِّمَنِ اتَّقَى وَلاَ تُظْلَمُونَ فَتِيلاً{77}النساء


*وَيَقُولُونَ طَاعَةٌ فَإِذَا بَرَزُواْ مِنْ عِندِكَ بَيَّتَ طَآئِفَةٌ مِّنْهُمْ غَيْرَ الَّذِي تَقُولُ وَاللّهُ يَكْتُبُ مَا يُبَيِّتُونَ فَأَعْرِضْ عَنْهُمْ وَتَوَكَّلْ عَلَى اللّهِ وَكَفَى بِاللّهِ وَكِيلاً{81}
هنا بقى عن الناس اللي تقولك احنا معاك يا كبير .. بس وقت الجد متلاقيش ولا حد فيهم .. كان ديما الموقف دا بيحصل في الكلية لما نقول هنشتكي فلان .. وتلاقي ايوة ويلا بينا احنا ساكتين ليه .. بس وقت الجد متلاقيش حد وتلاقيك بطولك.. ربنا بيقول .. أعرض عنهم وتوكل على الله.. وكفى بالله وكيلا

وَإِذَا جَاءهُمْ أَمْرٌ مِّنَ الأَمْنِ أَوِ الْخَوْفِ أَذَاعُواْ بِهِ وَلَوْ رَدُّوهُ إِلَى الرَّسُولِ وَإِلَى أُوْلِي الأَمْرِ مِنْهُمْ لَعَلِمَهُ الَّذِينَ يَسْتَنبِطُونَهُ مِنْهُمْ وَلَوْلاَ فَضْلُ اللّهِ عَلَيْكُمْ وَرَحْمَتُهُ لاَتَّبَعْتُمُ الشَّيْطَانَ إِلاَّ قَلِيلاً{83}
عن عدم نشر الأخبار اللي مطمنش لعدم زعزعة الثقة في الله وفي النصر

وفي الأخر وقت المواجهة لازم ديماً نفتكر
*فَقَاتِلْ فِي سَبِيلِ اللّهِ لاَ تُكَلَّفُ إِلاَّ نَفْسَكَ وَحَرِّضِ الْمُؤْمِنِينَ عَسَى اللّهُ أَن يَكُفَّ بَأْسَ الَّذِينَ كَفَرُواْ وَاللّهُ أَشَدُّ بَأْساً وَأَشَدُّ تَنكِيلاً{84}
هنا ربنا كان بيخاطب الرسول .. لإنه كان يحمل عناء الأخرين ومواقفهم .. فربنا بيذكره وبيذكرنا أننا ان نؤاخذ بأفعال الآخرين وأننا مسؤلون فقط عن أنفسنا .. ودورنا الوحيد هو تذكير الآخرين فقط وليس حملهم على الفعل 


الثلاثاء، 30 أكتوبر 2012

ديماً بعمل حساب

ديماً بعمل حساب أن عمري وحلمي ما يتسرقوش مني .. واكتشف في النهاية إن مش هو دا اللي كنت عاوزة أعمله..
 اسمعوا ال 3 أغنيات دول هيفرقوا ويغيروا حاجات فيكم


Those were the days
Mary Hopkin

I dreamed a dream
Susane Boyle

My way
Frank Sinatra

عن الشطرنج وأشياء أخرى



الشطرنج دي مش من اللعب المفضلة عندي .. أصل أنا أخويا الكبير اللي علمهالي وكان بيفلس فلس رهيييييب وبيخترع قوانين تخليه يكسب وحتى لما حاولت أطبقها وألعب بقوانيه مكنتش بتطبق عليا فكنت أقل حاجة بعملها إني أقلب الرقعة وأقوم .. الكلام دا كنا صغيرين أوي بس فضل في حاجز بيني وبينها .. خصوصاً إني من الناس اللي محظوظة في اللعب في أي لعبة كنا بنلعبها كوتشينة بجميع ألعابها .. بنك الحظ بجميع ألعابه .. وطبعاً Hoyle board games اللي ع الكمبيوتر بكل اللعب اللي فيها .. كنت ديما ديما ديما بكسب وبسحق اللي بيلعب قدامي بفرق رهيب .. محظوظة وأساسي عندي قدرة على رسم فخ للي قدامي .. -الله أكبر بقى عشان الحسد :D-
المهم أجي بقى في الشطرنج وأنا شييييش بييييييش خاااااالص .. فبقى نقطة ضعفي اللي مش بحب افتكرها .. دا غير بقى لما الفلسفة دخلت معايا وكرهت فكرة الجنود اللي بتضحي عشان الملك يعيش 

بس بما إني ماشية من أول السنة بسياسة إني لازم أجرب حاجات جديدة وأتصالح مع ذاتي في الحاجات اللي مش بحبها .. بدأت أول السنة بالتصالح مع اللون البنفسجي .. اشتريت قلم STABILOحبر بنفسجي.. واللون كمان زي ما يكون  ما صدق فكان أول حاجة أكتبها بالقلم أو باللون  هو حلمي على سبورة الأحلام .. وبعدين بقيت برسم بيه ايموشن  سمايلي :) على ايد صديقاتي عشان كل مايبوصوا على ايديهم يضحكوا .. وعملت كدة بنية إدخال سرور على قلب مسلم .. دا غير إني بكتب بيه في كراسة الروشتات الكراسة اللي ناوية أطلع بيها من صيدلة بكل النوتس المهمة وهتفرق معايا في شغلي .. يعني من الآخر أكتر لون كنت بكرهه في حياتي -عشان مرة دوقت طباشيرة لونها بنفسجي وأنا صغيرة وكان طعمها وحش وقلبت معدتي فبقى اللون كل ما بشوفه بحس بطعم وحش وبطني بتوجعني - بقى أكتر لون معبر عن الخطوة الجاية في حياتي والابتسام

وعشان كدة قررت أتصالح مع الشطرنج .. وشايفة إنه مش ذنبي إن اللي علمني معلمنيش بذمة - ربنا يسامحك يا إسلام بقى :))-  نزلت كتب عن الشطرنج وقريت عن القوانين والنقلات .. أعجبت بشوية فلسفة فيهم هبقى أكتبها في نوت مستقلة .. النهاردة لعبت أول مباراة ليا .. ومع إني خسرت بس فخورة إني كملت للآخر ومقفلتش البرنامج اللي كنت بلعب عليه وقومت .. مش عارفة هوصل لإيه جايز مابقاش أحسن واحدة بتلعبه بس على الأقل هبقى أحسن من إسراء اللي متعرفش حاجة عنه .. وكفاية بقى أصلاً إني سعيدة جداً بالجزء ال Spirtual اللي بدأت اكتشف فيه :)

الأحد، 28 أكتوبر 2012

عشان نبقى واضحين الموضوع مش بالبساطة دي


إنك تلاقي حد مستكين وصابر وكله سلام داخلي ..وحكم بتطلع منه عن قدرة ربنا وارضا بالقضاء والقدر.. الموضوع مش بالبساطة دي .. دا هو مش بيتولد كدة .. وبيعدي بحاجات وبمواقف ما يعلم بيها إلا اللي خلقه .. لكنه بيختار في كل أزمة أنه يبقى كدة

الأغنية دي اللي مدتها دقيقتين واللي الكليب بتاعها تحس يا سلام هي دي العيشة ولابلاش .. التنفيذ مش بيبقى بالبساطة دي .. دي مرحلة عشان توصلها لازم تمر بمرمطة وبهدلة .. 


وحتى التدوينة اللي بتقراها .. أي تدوينة .. اللي كتبها مكانش قاعد مع نفسه فقرر إن الدنيا ماشية كدة.. الكلام اللي طلع منه سواء نصيحة أو نتيجة أو نظرية .. دا بياخد منه أيام طويلة أووممكن كمان عمر كامل.. كانت تجربة بدأت بدهشة وحيرة وقلق وعدم قدرة على اتخاذ القرار استشارة وبحث .. ثم حل .. والأهم من الحل الرضا بيه

كل حاجة بتلمس قلوبكم أومشاعركم .. كل حاجة قريتوها أوفكرتوا اللي كتبها دا عارف منين .. أو كتب الكلام دا إزاي؟؟ ..أو رسم الرسمة دي منين .. أو حتى سؤال جاه على بالكم مالهوش إجابة زي إيه اللي خلى فيليكس ينط النطة دي؟.. أو عمر سمرة إزاي قدر يتسلق قمة ايفرست من غير ما يستسلم؟ أدا بيبقى خلاصة لعصير من المعاناة .. والكاتب و الفنان و الشخص اللي قدر يعمل حاجة متعملتش قبل كدة  .. مالهوش أي ميزة عن أي حد بيمر بأي معاناة في الدنيا مهما كان نوعها .. غير طريقة تفاعله معاها واختياره هو هيفضل إيه من الكويس فيه مش هيسيبه يضيع أثناء مروره بالتجربة.. الحاجات الكويسة اللي بتفضل .. والحاجات الكويسة اللي بتظهر فيه لأول مرة هي اللي بتخليه ينجح كدة 


أنا مش عارفة حد فاهم كلامي ولا مش فاهمه.. ومش عارفة إذا كان في حد مهتم يقرالي أصلاً.. أنا كنت عاوزة أقول أي حاجة بتحصل في الدنيا مش بالبساطة اللي أنتم بتتخيلوها بيها .. .. متخلوش حاجة تعدي عليكم من غير ما تدوروا ع القصة وتعيشوا في التفاصيل

ملحوظة: أنا مستمرة في الكتابة في المدونة رغم إن جملة ليست هناك تعليقات كل ما بشوفها بتحبطني .. بكتب بس عشان مؤمنة إن شخصِ ما في زمنِ ما هيقرا كلامي وهيفرق معاه أوي

الجمعة، 26 أكتوبر 2012

نصائح هامة قبل الإرتباط للدكتور مصطفى محمود


  • You like this.

  • Israa Youssef الشئ الوحيد اللي بيثبت العلاقة .. إن العقل يكون مقتنع

  • Israa Youssef فلازم يبقى فيه عنصر تاني .. عنصر تفهم وعنصر تعقل وعنصر احتياج حقيقي متبادل مبني على أشياء

  • Israa Youssef عنصر تالت في العلاقة الزوجية .. عنصر أخلاقي صرف.. يعني استعداد الإنسان إنه يتنازل عن أنانيته في مقابل الآخر .. في تنازلات متبادلة ..دي مسألة أخلاقية متلاقيهاش غير في النفوس الخيرة المعطاءة