الأحد، 11 مارس 2012

صباح الأماني المؤجلة

يمكن النهاردة كان أحلى صباح في حياتي
 أمنينين بتمناهم من سنتين اتحققوا النهاردة


أول أمنية هي إني أجيب جيد جداً الحمد لله جيبت 80.19 %  

بعد ما كنت بجيب 74 و 72 % السنتين اللي فاتوا .. فرّق رهيب طبعاً مجاش بالساهل ضحيت عشان اجيبه بحاجات كتيرة كان النشاط من ضمنها .. بس إحساس جميل جداااااااا خصوصا إني لما ذاكرت بجد حبيت صيدلة وحبيت المنهج بغض النظر يعني عن الشلل .. دلوقتي حتى بفكّر أكمل كلينيكال إن شاء الله ودا محتاج إن التقدير النهائي يكون جيد جداً وكل ما كان مرتفع يعني في التمنينات كل ما كانت فرصتي أحسن.. بس بحاول مندمش ع الدرجات السنين اللي فاتوا لأني فيهم اكتسبت حاجات ومهارات بجد مفيدة جدا ومحتاجاها برضه .. المهم أركز في ال 3 ترمات اللي فاضلين دول في الدراسة وربنا يقدّم اللي فيه الخير


الأمنية التانية هي Pharma BUZZ

دي مجلة كنت عملاها للأسرة من سنتين برضه بس مكنش الظروف مساعدة إنها تتطبع والحمد لله النهاردة اتطبعت .. فاضلة بس على موافقة الوكيل وإن شاء الله تتوزع


الحمد لله بجد .. أصحى الساعة 9 الصبح ع النتيجة أنزل أروح الكلية ألاقي المجلة.. شكراً ياربي معدتش أقلق على أي أمنية طلبتها منك سواء كنت بصلّي وببكي عشان تحققهالي.. وشكراً على كل حاجة كنت هموت ومش اتحققت وطلعت إنها أكبر خير إنها ماتتحققش
 أوأصغر أمنية جت في بالي ومركزتش فيها بس إنت ياربي عملتها لي


زي بالظبط أول امبارح لما كنت بقول لماما أنا نفسي في الكنافة .. بعدها بساعتين بالظبط لاقيت ضيوف مش متوقعين جوم وجابوا معاهم صنية كنافة بالقشطة .. :))

عن مستر دارسي وآخرين

من ساعة ما قريت
  Pride and Prejudice 

وأنا  مجنونة بالشخصية دي شخصية مستر دارسي مع إنه كان قليل الذوق وقال على
 إليزابيث إنها قبيحة .. أو جايز إنه كان فاهم الليلة وإنه معزوم في الحفلة عشان بس عريس لقطة  .. وإن التحفظ اللي في شخصيته دا نتيجة الغرور .. 
بس أنا مش شايفة كدة أنا شايفة إنه من الناس اللي بتبقى حساسة جداً وجميلة أوي من جوّا -ودا اللي بيظهر من أول ما هيحب إليزابيث- .. بس بتحب تعمل لنفسها قوقعة خارجية من الصلابة والتحفظ عشان تبعد عنها اللي قدامها وماتحسسهوش بالضعف والاحتياج ليه ..

بحب أوي فكرة الحب الصامت من طرف واحد .. إن الواحد ممكن يموت من غير ما يقول للي قدامه إنه بيحبه لاعتبارات كتيرة منها الكرامة زي إلينور داشوود في 


  sense and sensibility


فكرة أن الواحد بيكون بيتقطع من جوّا بس بيظهر بمظهر إنه عادي أو بارد أو إن الموضوع مش فارق .. مش فكرة  أنهم أقوياء جداً عشان يفضلوا كاتمين كل المشاعر دي جوّاهم زي هيلجا في


Hey arnold!


لكن عشان هما في الواقع بيبقوا هشّين أوي ومفتقدين الثقة في الناس .. والحب بالنسبة لهم بالظبط زي الطبطبة اللي مع إنها خفيفة أوي بس ممكن تكسرهم
مش عارفة ليه أنا بحب الناس دي أوووووووووووووووووي .. جايز عشان أنا -إلى حدِ ما - منهم أو جايز إني بسمع عمر خيرت كتير :D

الخميس، 8 مارس 2012

The last 2 days

امبارح كان عيد ميلاد ابتهال كملت 21 .. كان يوم جميل أوي ومفرح ووشه حلو عليا ..حصل فيه 3 أخبار مفرحة دا بغض النظر عن الحفلة الصغننة جدا اللي احتفالنالها بيه في الكلية 
النهاردة بقى كان يوم تحفة حضرت محاضرة الفارما .. صليت الضهر وروحت على تجارة عشان الانترفيو بتاع MOIC اسراء كانت معايا وسجلت اسمها وقتها .. وعملت هي كمان انترفيو وفي انتظار النتايج يارب نتقبل سوا .. ثم روحنا صلينا العصر في القائد ابراهيم .. بعدين رجعنا البلوفر بتاع خطيب أختها وبدلته بواحد تاني من محطة الرمل.. بعدين جيبنا ساندوتشات جبنة مقلية من عند جاد ومشينا لحد المنشية عشان نركب باكوس .. وفي باكوس على صفر روحنا مكتبة روايات الشباب استعرت كتاب البستان للمخزنجي وكتاب محارب الضوء لباولو كويلو وبس روحت يوم تحححححححححححفة
واتشجعت على اني استني عيد ميلادي ال 21 كدة ومكتأبش منه :) :)

الاثنين، 5 مارس 2012

Night&Day: pleasant sleep & Quiet wakeup

عندي برد .. أو أعراض البرد ..أصلي كدة كدة برشح وبعطس طبيعي .. اللي زاد عليا تكسير جسمي والنوووووووووووووووووم والإرهاق والدوخة.. بس مع كدة أنا بحب يجي لي البرد .. أكيد مش بحب أتعب .. بس وأنا بردانة ومهدودة بحس  بسكينة وسلام نفسي غريب جداً مش بحس بيه في أي وقت تاني
بحس إن مفيش حاجة في الدنيا تستاهل قلق .. أو جايز تعب جسمي بيشغلني عن تعب روحي .. صوتي وهو بيطلع بالعافية .. بيطلع بهدوء وراحة ..بحاول أختصر في الكلام على قد ما قدر فبكون أكثر حكمة  مع اني لما سألت صحابي قولي لي مفيش فرق .. بس أنا الوحيدة اللي حاسة بكدة ..

يمكن بتنفس بشكل أفضل وأنا مزكمة باخد نفس من مناخيري براااااااااااااااحة وبطلعه من بوقي برااااااااااااااااااااااااااااحة برضه فالأوكسجين بيوصل أفضل للمخ
بابا لما بيعشني بنفسه برضه دي حاجة بتفرحني
 .. المشكلة إني بفصل أكتر من فاصلة خلقة يعني النهاردة كان المفروض أني نازلة الكلية مخصوص عشان بحث السيوتكس .. نزلت وروحت الأوفيس جيبت عصير وبسكوت أكلتهم وروحت !! ومعملتش حاجة عشان البحث
يمكن إني بتخيل بعد كدة لما اتجوز  وجوزي وهو بيغطيني وبيجيب لي الماج اللي بحبه وهو مليان نعناع من غير ما اطلبه.. وادلع وماشتغلش حاجة في البيت خالص وافضل نايمة طول اليوم دا برضه بيفرح 
يمكن دا خليط المسكنات اللي عمالة ابلبع فيها وفي الاخر مش باخدها بانتظام ولا كأني صيدلانية أصلا
بقالي 3 أيام باخد night&day .. باخد حباية النايت في الداي وحباية الداي في النايت أصل هما حبايتين واحدة صفرة ومدورة شبه الشمس يبقى اللوجيك بيقول إني آخدها بالنهار والتانية بيضا زي القمر يبقى اخدها بالليل بس طلع العكس هي الشركة اللي  مش عندهم أي لوجيك 
 يمكن كمان التدوينة دي بتسجل حقيقة تفكيري وأنا بردانة بيبقى ملخبط إزاي ومشوش أو دا نتيجة  ال
Sedation action of diphenhydramine HCl*
اللي كنت باخده بالنهار

 ربنا يشفيني بجد
أياً كان مبسوطة من الراحة النفسية

*

Adverse Reactions
 Sedation and dizziness may occur after the intake of the yellow (night) tablet. In this case it is not advisable for patients who drive or operate machinery at night. Therefore the yellow tablet is recommended at bedtime.