عشان نبقى واضحين الموضوع مش بالبساطة دي

إنك تلاقي حد مستكين وصابر وكله سلام داخلي ..وحكم بتطلع منه عن قدرة ربنا وارضا بالقضاء والقدر.. الموضوع مش بالبساطة دي .. دا هو مش بيتولد كدة .. وبيعدي بحاجات وبمواقف ما يعلم بيها إلا اللي خلقه .. لكنه بيختار في كل أزمة أنه يبقى كدة

الأغنية دي اللي مدتها دقيقتين واللي الكليب بتاعها تحس يا سلام هي دي العيشة ولابلاش .. التنفيذ مش بيبقى بالبساطة دي .. دي مرحلة عشان توصلها لازم تمر بمرمطة وبهدلة .. 

وحتى التدوينة اللي بتقراها .. أي تدوينة .. اللي كتبها مكانش قاعد مع نفسه فقرر إن الدنيا ماشية كدة.. الكلام اللي طلع منه سواء نصيحة أو نتيجة أو نظرية .. دا بياخد منه أيام طويلة أووممكن كمان عمر كامل.. كانت تجربة بدأت بدهشة وحيرة وقلق وعدم قدرة على اتخاذ القرار استشارة وبحث .. ثم حل .. والأهم من الحل الرضا بيه

كل حاجة بتلمس قلوبكم أومشاعركم .. كل حاجة قريتوها أوفكرتوا اللي كتبها دا عارف منين .. أو كتب الكلام دا إزاي؟؟ ..أو رسم الرسمة دي منين .. أو حتى سؤال جاه على بالكم مالهوش إجابة زي إيه اللي خلى فيليكس ينط النطة دي؟.. أو عمر سمرة إزاي قدر يتسلق قمة ايفرست من غير ما يستسلم؟ أدا بيبقى خلاصة لعصير من المعاناة .. والكاتب و الفنان و الشخص اللي قدر يعمل حاجة متعملتش قبل كدة  .. مالهوش أي ميزة عن أي حد بيمر بأي معاناة في الدنيا مهما كان نوعها .. غير طريقة تفاعله معاها واختياره هو هيفضل إيه من الكويس فيه مش هيسيبه يضيع أثناء مروره بالتجربة.. الحاجات الكويسة اللي بتفضل .. والحاجات الكويسة اللي بتظهر فيه لأول مرة هي اللي بتخليه ينجح كدة 

أنا مش عارفة حد فاهم كلامي ولا مش فاهمه.. ومش عارفة إذا كان في حد مهتم يقرالي أصلاً.. أنا كنت عاوزة أقول أي حاجة بتحصل في الدنيا مش بالبساطة اللي أنتم بتتخيلوها بيها .. .. متخلوش حاجة تعدي عليكم من غير ما تدوروا ع القصة وتعيشوا في التفاصيل

ملحوظة: أنا مستمرة في الكتابة في المدونة رغم إن جملة ليست هناك تعليقات كل ما بشوفها بتحبطني .. بكتب بس عشان مؤمنة إن شخصِ ما في زمنِ ما هيقرا كلامي وهيفرق معاه أوي