خُلق القرآن ..(1)

حكايتي في حفظ القرآن .. طويلة أوي .. وكان فيها مشاكل وتوقف وعقد وكلاكيع نفسية .. مش من القرآن طبعاً .. لكن من اللي كانوا بيحفّظوني - ربنا يسامح بقى- المهم إني رجعت بعد رمضان أحفظ تاني الحمد لله بعد توقف ست سنين.. كنت مترددة إني أتكلم عن موضوع زي دا في المدونة .. كنت حابة إنه يفضل بيني وبين ربنا .. بس ليه أنا بدخل هنا أقعد أهرتل بكلام في الآخر لا هيودي ولا يجيب ومش بقول هخليه بيني وبين ربنا ..ولما أفكر في إني أتكلم عن حاجة كويسة ممكن حد يتعلم منها بجد .. بقعد أقول لا خليها بيني وبين ربنا .. المهم بقى قررت إن دا غلط .. فأنا - إن شاء الله- هكتب شوية خواطر بتجيلي بفكر فيها أو بحاول أتعلمها وأطبقها من القرآن .. نيتي كل مرة هجددها وأخلصها لله .. قال رسول الله صلى الله عليه وسلم : "بلـّغوا عني ولو آية"

(1)

النهاردة كان عندي تسميع .. حفظت كويس الحمد لله ولبست .. وأنا نازلة .. اتخانقت مع ماما على حاجة تافهة أوي زعقنا جامد في بعض وأنا قعدت أعيط .. نزلت بس مش روحت الدار عشان أسمع .. 

أصل أول آية في التسميع كانت بتقول 

التفسير الميسر:

واعبدوا الله وانقادوا له وحده, ولا تجعلوا له شريكًا في الربوبية والعبادة, وأحسنوا إلى الوالدين, وأدُّوا حقوقهما, وحقوق الأقربين, واليتامى والمحتاجين, والجار القريب منكم والبعيد, والرفيق في السفر وفي الحضر, والمسافر المحتاج, والمماليك من فتيانكم وفتياتكم. إن الله تعالى لا يحب المتكبرين من عباده, المفتخرين على الناس.

طب إزاي يعني .. إيه الإزدواجية دي .. منين أروح اسمّع الآيات دي وأنا أمي زعلانة مني .. وصاحبتي كنت أعرف إن عندها ظروف ومسألتش عنها .. حسيت إني صغيرة أوي .. وإني حافظة ومش فاهمة .. طب إيه فايدة إني أحفظ أصلاً قرآن وأتعب نفسي .. وأنا في الآخر مش بعمل بيه
افتكرت أكتر الآية اللي بتقول {كَبُرَ مَقْتاً عِندَ اللَّهِ أَن تَقُولُوا مَا لَا تَفْعَلُونَ }الصف3 

كلمت أمي أصالحها في التليفون .. وإن شاء الله النهاردة هسأل على صاحبتي بس عارفين أغرب حاجة لما كنت بدور على الآيات اللي ربنا بيوصينا بيها على أمنا وأبونا لاقيت حاجة غريبة أوي بصوا كدة

هنلاقي إن ديما إن تاني أمر بيجي بعد الأمر بعبادة الله والنهي عن الشرك .. هو الإحسان للوالدين وحسن معاملتهم ودا دليل على إنه في في مكانة مهمة ومينفعش نعديه كدة

واهم حاجة اتعلمتها النهاردة غير أني أحسن لوالديّ .. هو إن خلقي لازم يكون من خلق القرآن .. مش شرط تكون بتحفظ على فكرة عشان تبقى أخلاقك كدة .. تكفي القراءة فقط والتطبيق.. هو الحفظ أفضل طبعاً في المكانة بس خليك فاكر أوي إن مش شرط لو تبقى حافظ للقرأن فتبقى منزلتك عالية يوم القيامة ... بالعكس أبسولوتلي :D

ما ممكن أوي إن ربنا مايتقبلهوش منك أصلاً