مات.. يموت.. موتاً

احم احم .. طيب بما إني مش عارفة ابدأ منين فأنا هبتدي من الأول خالص

.
.
. 

 أول مرة سمعت فيها عن الموت ..

.كنت أصغر من إني اعرف عندي كام سنة.. كانت خالتي اتوفت .. فطبيعي مش فاكرة غير إننا كنا وقتها في بيت جدتي .. ماما صحيتني بالليل .. وكانت بتعيط والمفروض إنها هتروّحنا لبابا في البيت بتاعنا .. مش فاكرة غير طريق طويل ضلمة كان لسة متسفلت وسخن وشبشب لابساه في رجلي بلاستيك ساح من السخونية واتقطع.. مش عارفة امشي الأرض سخنة أوي والشبشب بيلزق ومقطوع ومش قادرة وعاوزة أنام بعيط عشان ماما تشيلني .. ومش فاكرة اللي حصل بعد كدة .. غير إننا بعدها بأيام كان بابا بيزعق لنا لما نفتح التليفزيون .. وعرفت إن الموت دا حاجة وحشة أوي

أول مرة استوعبت مفهوم الموت ..

كنت في الحضانة.. كنّا مربيين أرانب فوق السطوح .. طلعنا أنا وأخواتي نلعب بيهم .. كنا ببساطة بنمسك الأرانب من ودانها ونرميها لفووووق ونسيبها تقع على الأرض .. احنا كنا بنلعب بجد وبنضحك وكمان بنحمّي الأرانب بالمياه عشان اتوسخت من اللعب .. ونزلنا عادي .. بعدها بشوية .. بابا دبحهم كلهم عشان طلع لاقاهم بيموتوا وروحهم بتطلع 

أول مرة خوفت من الموت..

كنت بحفظ قرآن في دار تبع الدعوة السلفية كنت في ابتدائي .. لمّا المحفظات ربنا يسامحهم ويهديهم .. كانوا بيكلمونا عن الموت وطلوع الروح وعذاب القبر والنار .. وسوء الخاتمة!!

أنا لما بعدي  من قدام الدار دا دلوقتي وبسمعهم بيحفظوا قرآن .. قلبي بينقبض وبختفي من الشارع

أول مرة اتمنيت فيها الموت.. 

كنت مكتئبة ..اكتئاب حقيقي بس بما إني الحمد لله مؤمنة ولا أزكي نفسي على الله.. فدا كان تحوير لل Suicidal thoughts اللي بتصاحب الاكتئاب

عارفين أنا عمري ماشوفت الموت على إنه دافع أحسن عشانه حياتي .. الفكرة كلها مبهمة ..مبهمة زي فكرة بالظبط احنا كنا عبارة عن إيه قبل ما نتولد .. زي ما محدش يعرف هو كان إيه قبل ما يتولد .. محدش يعرف برضه إيه اللي بيحصل لما بيموت غير الناس اللي بتموت نفسها ..

أنا لو بحسن حياتي لو برضي ربنا .. لو بنهي نفسي عن المنكرات فدا عشان ارتقي بنفسي .. ارتقي بروحي انتصر بالنور اللي جوايا على الطين ..عشان أعيش حياتي صح

 الدين موجود في حياتنا عشان ينظّم العلاقة بين الطين والنور..ميطغاش حد على حد..الطين اللي اتشكلنا منه وبنرجع له في الآخر ..والنور نفخة من روح الله .. واللي بتطلع برضه لربنا في الآخر ..  .. عشان كدة أنا مش زاهدة في الحياة .. بالعكس أنا بحبها جداً .. وفي نفس الوقت مش ناسية إنها مزرعة للأخرة .. الصراع بين النور والطين مش سهل أبداً .. واللي يقولك هو عارف نفسه أنهي واحد اللي غالب فيهم.. يبقى مش فاهم حاجة.. سيدنا أبو بكر كان بيقول فيما معناه .. إن لو حتى رجل في الجنة والرجل التانية لسة مدخلتش .. مش هيبقى متطمن ولا آمن إنه كدة خلاص ..

 طول ما أنت عايش الصراع بين الطين والنور بيفضل مستمر .. لحد ما في حاجة هتغلب في الآخر .. مفيش معادلة معينة أو حاجة تعملها تضمن لك إن النور اللي هينتصر .. مع إنك ممكن تكون بتعمل كل حاجة صح من وجهة نظرك بس ربنا مش متقبل .. حاجة من اللي بتعملها ..

ممكن تكون بتجاهد في سبيل الله من وجهة نظرك برضه.. بس جواك في نية تانية للي بتعمله .. ساعتها بيجي الموت .. أو بمعنى آخر كلمة النهاية بتنزل على الفيلم اللي كان من بطولتك في اللحظة اللي بتنكشف فيها نيتك الحقيقية.. وساعتها بنفهم يعني إيه..

{وَإِذْ قَتَلْتُمْ نَفْساً فَادَّارَأْتُمْ فِيهَا وَاللّهُ مُخْرِجٌ مَّا كُنتُمْ تَكْتُمُونَ }البقرة72

والله مخرج ما كنتم تكتمون .. مافيش نوايا هتستخبي ساعتها .. حقيقتتنا بس اللي بتظهر 

طب احنا ليه لما بنفكر في زمايلنا اللي اتوفوا وهما في سننا.. ما بنفكرش في إن ربنا اختارهم إنهم ميكملوش أكتر من كدة ..لكن في نفس الوقت ربنا اختارنا نكمّل زيادة عنهم "بقدرِ غير معلوم".. فليه منفكرش في إن ليهم نصيب من عمرنا دا .. وعشان كدة نقاسمهم في كل حاجة بنعملها لربنا .. لو صدقة .. لو دعاء لو ذكر .. وحتى لو مجهود بدني عملناه.. ماشينا بيه في الخير .. 

ديماً نفكر في  إن:

"يا رب في  ناس قدنا  قبضت روحها وهما عندك دلوقتي .. متساويين بالتراب..نفسهم يرجعوا يعملوا عمل صالحا واحنا لسة عايشين وبصحتنا.. فيارب خلينا احنا عملهم الصالح ..يارب احنا عباد غصب عننا هننساهم وهنكمل .. ممكن ننسى نتصدق أو ننسى ندعي لهم  أو ننسى ننوي مجهودنا وعملنا يبقى  صدقة ليهم .. لكن يارب أنت ما بتنساش حد فلا تقطع نظرك عنهم يا أرحم الراحمين.."

لو  كل واحد عمل كدة في الدايرة بس بتاعته اللي فارق فيها ناس صدقوني الموضوع هيفرق كتير .. معانا ومعاهم إن شاء الله

متعة البداية

مفيش أجمل من البدايات الجديدة.. في كل حاجة في الحياة

:)

عزيزي سكشن 1B

إنتم سكشن أسطوري ..                                                  

                                        

 مفيش بنات في الكلية كلها ممكن تفهم إ يعني إيه سكشن 1B غيرنا احنا .. اللي عاشروه 5 سنين .. مفيش حد ممكن يفهم إحساس 7 بنات  إسراء ..بيتعاملوا مع أكتر من 50 ولد أحمد.. أنا بجد عن نفسي مش قادرة اتخيل كمية الإثارة والأكشن اللي كانت هتفوتني لو ماكنتش معاكم في السكشن .. وقد إيه كانوا هيبقوا 5 سنين مملين .. 

أنا بجد مش ممكن انسى أحمد اللي على طول حران وعمره مالبس البالطو من يوم مادخلنا الكلية .. إنت بجد إزاي كدة ..؟ إنت بجد جبار 

.. وعمري ما هنسى أحمد اللي كان بيخلع البالطو .. بذمة أوي وضمير .. فوشي لبس في دراعه ودوخت وكنت هقع من الخبطة .. ونضارتي طارت :D :D.. وهو عمال يعتذر وأنا عمالة أضحك مش مصدقة وبقوله استنى كدة يمكن مقعش

وعمري ما هنسى أحمد اللي أخد الورق بتاعي اللي كنت بذاكر فيه قبل الكويز وقعد يشرح لصحابه منه وأنا مكسوفة اقوله إني عايزة الورق .. وفضلت مستنياه لما خلص شرح لصحابه بس هو مرجعش الورق وخده ومشى :D واتسحلت وراه جري لأخر السكشن بنده عليه ..

 عمري برضه ما هنسى أحمد اللي سلم علينا في الشروق .. وهو بيقولنا إزيكم يا بنات؟ وأنا ماتنحتش من فكرة إنه سلم علينا .. قد ما تنحت من كلمة يا بنات :D :D أنا اتصدمت من الكلمة أوي .. أنا طول عمري حاسة إني جعفر من يوم ما دخلت السكشن دا

وعمري ما هنسى أحمد اللي في فاينال عملي البابليك .. لما بناخد رقم عشوائي ونوقف عليه .. وهو كان عاوز يوقف مكاني عشان يظبط مع صحابه .. راح بكل براءة اخد الرقم مني وعطاني رقمه وأنا متنحة ومذبهلة .. ومش عارفة إزاي عمل كدة .. وإزاي أنا سكت كدة وروحت وقفت على رقمه.. وأنا بهري وبنكت في نفسي

وكله كوم وأحمدات اللي اشتغلت معاهم في البرزينتيشن كوم تاني وكمية سؤ التفاهم اللي حصل .. وخناقاتنا على اللبس .. وفي الآخر احنا كبنات اللي ملتزمناش باللي اتفقنا عليه :D.. بس بجد نسينا كل اللي كان مضايقنا يوم ما عملنا وظبطنا أحسن برزينتيشن في السكشن كله

وكمان فيه أحمدات كانوا بياخدوا مننا أدوات العملي  .. من غير ما يستأذنوا واحنا نلف ندور عليها

أما بقى البنات .. فهما إخواتي وصحابي وحبيايبي وشركائي في الكفاح وبجد بحب كل إسراءات في الله حتى كمان اللي كانوا معانا فترة واتنقلوا سكشن 2

أنا مش عاوزة حد يفكر إني متضايقة أو بتريق على حد .. أنا بس والله بهذر وحقيقي مش بتخيل نفسي وأنا في سكشن بنات بس والمعيدة تكمل شرح كدة عادي من غير ما نتزهق ولا نتهدد ولا ننقص درجات.. وعارفة إننا كبنات أكيد شلناكم برضه

وبجد أنا بعتبركم كلكم زي أخواتي .. .. ولو حد من سكشني كلامي ضايقه يقول وهمسح البوست على طول .. بس بكرر كلامي إني بعزكم كلكم وكاتبة المواقف دي هزار وضحك مش أكتر :D

وحقيقي اللي محضرش مع سكشن 1 يبقى ولا كإنه دخل صيدلة أصلا

ربنا يوفقنا كلنا في اللي جاي من حياتنا
:)

أن تنساب روحي

د.هشام الششتاوي امباررح في ندوته كيف تكون سعيداً؟

كان بتكلم عشان نبقى سعداء لازم نكتشف مواهبنا ونطوّرها .. وكان بيقول إنك تعرف إنك موهوب في حاجة .. ممكن من خلال حالة اسمها الانسياب.. يعني وإنت بتعمل الحاجة اللي موهوب فيها .. تنسى روحك وتنسى الوقت ومتحسش بأي حاجة غير اللي بتعمله .. الحالة دي مش بدخل فيها غير في حاجتين بس .. أولاً: الكتابة .. وأنا بكتب بنسى كل حاجة في الكون .. وممكن اقعد على البورد لمدة 6 ساعات متواصلة من غير ما اقوم خااالص ولا اشرب ولا أكل ولا أي حاجة .. صدقوني إحساس مش ممكن يتوصف أو يتخيله غير اللي مر بيه ..

 تاني حاجة بقى هي القراءة .. بجد لن أنسى يوم ما قريت لا تطفئ الشمس الجزء التاني.. إني اقرا 700 صفحة في 8 ساعات من الساعة 6 المغرب لحد الساعة 2 بالليل مقومتش غير فقط عشان أصلي المغرب والعشا حاجة مش طبيعية ومتعة ماتتوصفش

وبعدين بقى كنت قبلها بتكلم مع جهاد وقالت لي كلام حلو أوووووي زي:

إن المفروض مثقش في الناس بالسهولة اللي بثق بيهم .. عشان أي حد لازم يتجمّل دي طبيعة بشرية.. وأي حد مهما كان نازل من جهنم حالاً دلوقتي.. مش هيتكلم غير عن قد إيه الجنة جميلة.. وإني كمان مينفعش اتعامل بتلقائية وبصراحة مع كل الناس.. متعاملش كدة غير مع اللي يقدرهم ويفهمهم صح.. مش كل الناس تستحق التلقائية دي .. 

وبس بقى كل دا خلاني ارجع اكتب تاني  وانبسط عشان كتبت .. بعد توقف مريب .. عن الكتابة والانبساط.. صحيح لسة في حاجز بيني وبين الكتابة ومش في مستوايا ..وصحيح مش معنى إني مش مبسوطة ابقى متنكدة .. لكن أنا في حالة من الرضا والصبر وتقبل الأمر الواقع..

 أنا بس كانت أول مرة اكتشف إن الكتابة والسعادة -في نظري- وجهان لعملة واحدة

وإن الكتابة ليست سوى ناتج طبيعي لانسياب روحي فمش ممكن اعرف اكتب وأنا روحي مقبوضة وخايفة ومش متطمنة..