إلى أولادي (2) .. تعليقاً على نتائج الاتخابات

(1)

أنا انتخبت حمدين .. ليه مش عارفة.. فضلت استبعدهم واحد واحد ومفضلش غيره صورته نضيفة .. كنت منتخباه وأنا مش حاطة أي أمل .. بس لغاية ما بدأ ينافس شفيق ع المركز التاني .. حسيت لأول مرة إني انتخبت صح وإنه فعلا زي ما قالوا ..كان واحد مننا بقى أملنا كلنا

(1/)

إسكندرية كلها انتخبت حمدين هي والقاهرة وبورسعيد.. ال 3 مدن دول العصب الحقيقي للثورة.. بس للأسف مفيش انتشار فكرهم في باقي المدن .. صحيح اسكندرية من بعد خالد سعيد وسيد بلاب كانوا تمهيد .. كانوا كل جمعة يلبسوا إسود ويوقفوا بطول الكورنيش .. لا رافعين يافطة ولا بيتكلموا .. والموضوع وصل لكورنيش النيل .. للأسف مكانش ممكن اقف معاهم =(

(2)

الإعادة بين مرسي وشفيق .. لسة الكلام مش نهائي .. ولسة الناس حاطة أمل إنه يتقبل الطعون والبلاغات اللي على شفيق .. ويتم استبعاده .. بالمناسبة عليه 30 بلاغ في قضايا رشوة وفساد .. دا غير موقعة الجمل نفسها .. بس كلهم اتحولوا للقضاء العسكري ..ربنا ينتقم من النائب العام ومن اللي عينه.. صحيح حاولنا نقيله .. بس منفعش .. عشان منصبه محصّن من العزل .. يعني شيلنا مبارك ومش عارفين نشيله

(3)

مبارك كان أهون مشاكلنا .. طلع إن في ناس أتقل منه كانوا بيحركوه ويحركونا بمزاجهم.. هما مين مش عارفين لحد دلوقتي ..

(4)

بقى عندي يقين إننا عمرنا ما هنشوف نتيجة لثورتنا .. بس احنا هنفضل نعافر .. رفعنا راسنا مرة ودوقنا الموت .. عمرنا ما هننحني تاني .. ممكن أنتم اللي تشوفوا النتيجة .. بعد ما نربيكم صح وعلى نضافة..مش زي اللي اتعمل فينا.. احنا جيل متمرد بالكامل ومش جايبنا ورا غير جيل أهالينا بالكامل .. ناس بتقولي إنهم معذورين ودا مش ذنبهم.. بس أنا مش قادرة أسامحهم

(5)

دلوقتي لو شفيق كسب .. بفكر جدياُ بالهجرة .. مش هروب .. غير إني يا هتكيف يا هموت .. وانا اخترت أعيش .. عهيش وأربيكم وترجعوا تكملوا اللي احنا بدأناه

(6)

العسكر كلهم حرامية.. لو نجحتوا في ثورتكم .. متسلملهومش تاني .. كمان الإعلام لزم تنفوا كل إعلاميين اللي اتحسبوا ع النظام

(7)

افتكروا الشهدا اللي ماتت .. ديما وما تعتبروهمش رقم في كشف,, واوعوا تنسو اللي اتدبحوا في بورسعيد.. اعرفوا إن لو حق الشهدا ما جاش البلد دي عمرها ما هتقوم لها قومة تاني..

(8)

الثورة مش ميدان وبس .. الثورة فكرة .. وكما قال V

ideas are bulletproof

دعوة للتصالح مع الذات تاني مرّة

أول مرّة تصالحت فيها مع نفسي  

قولت كلام حلو أوي بس نسيت أهم حاجة

 {فَإِنَّ مَعَ الْعُسْرِ يُسْراً }5 {إِنَّ مَعَ الْعُسْرِ يُسْراً }6 الشرح

أن للتوكيد .. دا غير إن يسرا نكرة مرتين ومعناه أن كل مرة فيهم بيسر جديد .. على عكس العسر المعرفة

دا معناه إنه عسر واحد قصاده يسر مرتين 

طيب دلوقتي بقالي فترة مرتبكة ومحتارة وبراجع نفسي في حاجات مهمة وبما إن بجد حقيقي دا مش وقته فأنا هأجل الموضوع دا لحد ما أخلص امتحانات ولحد الفترة دي هفضل افتكر في الحاجات اللي بتخليني أتصالح مع ذاتي 

راضية الحمد لله

هو بغض النظر عن التقلبات وضغط الامتحانات بس الترم دا كان مرضي .. الحمد لله بقيت بعمل أكتر ما بتكلم ودا شئ جميل جداُ وتطور في شخصيتي .. أنا بقيت بتكلم عن النتيجة النهائية للفعل فقط عشان أسجلها في دفتر الذكريات وعشان برضه مش بحب الناس اللي محدش بيحس بيها ومش بتلهم حد .. لكني بطلت أتكلم عن حاجة عاوزة أعملها .. عشان في الغالب بتكلم بس وما بعملهاش.. أياُ كان الحمد لله

قبل أن أنام : تدوينة رقم (3)

تحتضن كوب النعناع.. تحاول أن تسترخي وتستسمع لـِ الليلة يا سمرا .. هي ليست سمرا وليست بيضاء هي قمحية.. لون مرتبك ومركب كشخصيتها .. .. لت تجيد الحديث بقدر ما تجيد الكتابة.. لكنها لا تجيد الكتابة بقدر ما يجيدها المازني .. ولم تعد تعتني بنباتاتها البائسة هي أيضاً لا تجيد الاعتناء بنفسها أو مظهرها .. ولا تجيد الاعتناء بأحد ولا تعرف شكل نبات التمر حنة مثلما كانت تعرف حبيبة المازني .. لكنها تعرف أنه نبات شارد منطوي .. على الأقل هذا ما فهمته من أغنية فايزة يا تمر حنة..

 "البنت قالت فستاني .. منشور على الشط التاني.. خدني المراكبي وعدّاني"

كل يوم تسأل نفسها قبل أن تنام .. لماذا لم يعديها المراكبي مع البنت.؟؟!

قبل أن أنام: تدوينة رقم (2)

قبل أن أنام .. تطوى ورقة النتيجة لتطيرعبر الصالة.. يطوي أطرافها ويطير بها Stick man أسود يشبه الذي يأتي في إعلان Stripsls ليسقط عن الورقة الطائرة ..فيتكور على نفسه حتى يصل إلى خلفية الموبايل فيحتجز بداخلها على شكل دائرة ثنائية الأبعاد.... تمتلأ الخلفية بالدوائر ولكنها لا تتحرّك لأسفل فتفسح مجال آخر لدوائر جديدة.. حتى تفيض  على الموبايل فتقع على البلاط وتتناثر وتقفز كعقد انفرطت حباته يكسر رنين الصمت حتى أنام 

عودة.. كل يوم تدوينة

طبعاُ يعني بقالي فترة ايديا منحّسة من قلة الكتابة.. بالرغم من إ"ن بيبقى عندي أفكار  بس أول ما اجي اطلعها تروح مني ومعرفش...... ودا بيبقى احساس غبي جداً شبه إنك كنت خلاص هتعطس وعلى آخر لحظة العطسة ماطلعتش :))

فأنا إن شاء الله قررت أكتب كل يوم تدوينة عن ايه موش عارف .. إن شالله عن بيض السوبيط بس لازم أكتب :D

النهاردة بقى هتكلم عن التوكيدات في الموقع دا
http://www.h-alhashash.com/affi/
 حلو جدااااااااااااا وبيدي كدة تفاؤل وأمل كل يوم افتحوه
كمان فيه مقالات جميلة جدا عن التنمية البشرية مختصرة ومش مملة
http://www.h-alhashash.com/?p=1310
وبيجيبو الخلاصة على صورة ممكن تجمعوا الصو دي وتحطوها خلفية للديسكتوب بتفرررررررق

يلا سلام بقى وبكرة نشوف تدوينة جديدة ان كان لينا عمر :)