الثلاثاء، 31 يناير 2012

كانت ككًل الأشياء

كانت ككًل الأشياء الجميلة
التي لا تراها إلا في أحلامك

الأشياء الجميلة..البراقة اللامعة
التي لو أطلت النظر إليها
فلم تُفقِدُك بصرك..لأنها ستُفقِدُك عقلك

كانت ككل الأشياء الجميلة
كقوس قزح
نتنتظره طويلاً في الصباحات الممطرة
كلحن سعيد
يعيد عزف نفسه في داخلك بدون توقف
فتدور في الهواء بدون دوار إلى ما لا نهاية
كعطر خفيف 
يذوب بسرعة فيتلاشى معه
 كل العفن والصدأ من روحك

كانت ككل الأشياء الجميلة التي مصيرها الموت 
في زحمة أن نعيش نحن
 مسوخ بدونها
!
كانت فهي دوماً كانت
فعل ماضي لا يحضر أبداً

السبت، 28 يناير 2012

كنت فين من زمان



أول مرّة اعملها نزلت امبارح المظاهرة من ورا أبويا وأمي .. كنت خايفة الصراحة
 ومستحقرة الخوف دا بس الحمد لله اتخلصت منه مع أول هتاف
.. 

الساعتين اللي مشيت فيهم من الشاطبي لسموحة مش ممكن أنساهم .. أحلى
حاجة إني بقيت بحس بالميدان أكتر كل ما بفتح التليفزيون وأشوفهم بيهتفوا بفتكر
كل حاجة بفتكر إحساسي وأنا بهتف زيهم .. إحساس مش ممكن يموت .. وفهمت أوي يعني إيه واحد جنبي ماشي استشهد فجأة .. فهمت الرابط اللي بيني وبينه وإنه هو أنا .. وأنا هو وكلنا بنحب مصر
ملحوظة:
----------
1-الأغنية اللي فوق دي بتصفه بمنتهي الدقة.

2-البوست دا مش ليّا دا لولادي إن شاء الله.

الخميس، 26 يناير 2012

يسقط يسقط حكم العسكر



جاءت الجلسة الأولى لمجلس الشعب مخيبة للآمال .. آمالي أنا على الأقل عندما انتهت بإجماع الأخوان على بعث برقية شكر للمجلس العسكري ..ثم احتفالهم المشين بالأمس في ذكرى الثورة الأولى.. خيالي الخصب لا يساعدني على تخيل أو حتى تذكر أي شئ قدمه المجلس للثورة .. ادعاءه الباطل بأنه من حمى الثورة .. بينما الثورة هي ما زالت تحميه حتى الآن من المساس والمساءلة ..
ثم شكراً على أي شئ .. على المحاكمات العسكرية .. سحل وتعرية الفتيات .. شهداء مسرح البالون وماسبيرو وأحداث محمد محمود .. فزّاعة الطرف الثالث إهانة أهالي شهداء 25 يناير كل يوم أمام المحكمة.. تباطؤ العدالة ..معاملة المخلوع معاملة فندقية 5 نجوم بينما الجحيم كل الجحيم للشهداء والمصابين ..تصريح الأمس بتوقع الثورة قبلها  ب 3 أشهر .. ربما سيخرجوا علينا غداً بأنها انقلاب عسكري ساندها الشعب !! .... ناهيك عن أن شيئاً لم يتغير ..أحوال التعليم والصحة والمرتبات والفقر مازالت كما هي
 ثم لا أستطيع تصور كيف احتفل الإخوان في النهاية فوق دماء الشهداء التي لم يقتص لها بعد .. التي لولا دمائهم ما كانوا ليضعوا قدمهم في البرلمان

كلمة أخيرة:

للإخوان
---------

لاتنسوا ماذا حدث للذين من قبلكم .. عندما ابتعدوا عن إراداة الشعب .. فالشعب الذي أدخلكم البرلمان أغلبية .. قادر على إخراجكم منه 


للمجلس العسكري
----------------

وَمِنَ النَّاسِ مَنْ يُعْجِبُكَ قَوْلُهُ فِي الْحَيَاةِ الدُّنْيَا وَيُشْهِدُ اللَّهَ عَلَى مَا فِي قَلْبِهِ وَهُوَ أَلَدُّ الْخِصَامِ (204) وَإِذَا تَوَلَّى سَعَى فِي الْأَرْضِ لِيُفْسِدَ فِيهَا وَيُهْلِكَ الْحَرْثَ وَالنَّسْلَ وَاللَّهُ لَا يُحِبُّ الْفَسَادَ (205) وَإِذَا قِيلَ لَهُ اتَّقِ اللَّهَ أَخَذَتْهُ الْعِزَّةُ بِالْإِثْمِ فَحَسْبُهُ جَهَنَّمُ وَلَبِئْسَ الْمِهَادُ (206)


عاشت مصر حرّة مستقلة

الاثنين، 23 يناير 2012

منيريات (1)



من أول لمسة غيّرلي سنيني ..نسّيني رسّيني على أول مرسى
ما عنديش لبس أحمر شتوي .. ومش قادرة اخاطر بلبس صيفي أحمر .. في الجو دا .. مفتقدة الأحمر أوي .. مفتقدة ثقته بنفسه وسيطرته وهيمنته.. مفتقدة فرض وجوده على كل حاجة حواليه..مش قادرة أخاطر بفقد حبي ليه مع أول رعشة ليا جوّاه وأنا ماشية ع البحر

تصادفني كتير وشوش قلوب زي البيوت ..طريق ما بعرفهوش يوماتي عليه بفوت
الشتا مش بارد والصيف مش حر.. وصفنا للطقس دا وصف لأحساسنا .. وصف للصورة اللي مش عاوزين نشوف غيرها.. للجو اللي مش ممكن يحسسنا بحاجة غير اللي حاسين بيها أصلاً

ولو في يوم راح تنكسر لازم تقوم واقف كما النخل باصص للسما
كعب عالي كان غير كل الكعوب العالية اللي تحس إنها اتعملت مخصوص عشان تتعب رجلِك.. كعب عالي واقف بكبرياء في الفاترينة .. عشان يسند ضهرِك الطري اللي تعب من الوقفة لوحده من غير سند.. كعب عالي مش فارق معاه إن في 100 كعب واقف جنبه .. لأن مفيش منه هو تاني

مانيش أخر حبيب يدخل مدينتك ..ولا هتكوني يوم أخر حبيبة
لو كانت ليك قصة حب وفشلت ولاقيت اللي بتحبه دخل في قصة حب جديدة مع حد عكسك تماما .. دا دليل على إنه مش قادر ينساك..بدليل إنه اختار حد عكس كل صفاته بتفكره بيك

كُل الحاجات إلا عيونك ممكن أنسى..كُل الحاجات من حواليا عارفة وحاسة
قبلك كنت معتقدة إن الحب زي الشوكولاتة.. الحياة حلوة بيه بس ممكن نعيش من غيره..وبعدك فضلت معتقدة إن الحب زي الشوكولاتة..لحظة حلوة بتدوب بسرعة.. ومش بيعوّض فقدانها غير لحظة تانية حلوة تدوب بسرعة