الخميس، 27 أكتوبر 2011

وجع

منذ أن افترقنا
أصيحت كل الأشياء مُوجِعة
الحروف كالوجع
الأغاني كالوجع
نقرات المطر على ..النافذة كالوجع
سخونة الشوكولا الذائبة كالوجع
الأفلام الرومانسية كالوجع
أفلام الرعب كالوجع
صوت مُنير كالوجع
التفاتة العاشق في مفترق الطريق
بعد الوداع كالوجع
ضحكات أطفالنا الذين لم ولن يولدوا كالوجع


كدت أن أنسى يا سيدي

بأن أُخبِرك
أن الأحلام هي أكبر وجع

27/10/2011
8:57
م

الثلاثاء، 25 أكتوبر 2011

قهوة وشيكولاتة

الشتا راجع بكل حاجة بحبها
القهوة والشوكولاتة اللي مش ممكن حد يستحملهم مع بعض
غير في جو الشتا
أغنية بتمون لِـ إليسا و Hamburg لِـ Keane
النهار اللي بمشي رافعة فيه راسي للسما
من غير ماخبي وشي من الشمس أو ألبس نضارة الشمس
واخلع نضارة النظر اللي مش بشوف من غيرها
الدعوات اللي مش بتطلع للسما غير والمطر نازل
نص الليل في البلكونة وانا مدلدلة راسي وفاتحة بوقي على آخره
عشان أدوق طعم المطرة
مين قال إن الشتا ساقع
الشتا مشاعره دافية

25/10/2011

الجمعة، 14 أكتوبر 2011

اللبانة التي أضحكتني

 مش بحب اللبان
عمري ما فهمت الفكرة من إني أدوق حاجة
حلاوتها بتروح كل ما حبيتها أكتر
ومش بيفضل غير طعم وحش بيفكرك بس
بقد ايه فايتك من الحلو

مش فاكرة أول مرة دوقتها امتى؟
بس فاكرة إني فضلت أمضغ فيها ولما زهقت بلعتها
بعد كدة عرفت إن الفكرة إني أفضل أمضغ على طول

المهم بقى أطعم لبان دوقته في حياتي
كان من مصنع كدة صغير جدا يادوبك اوضتين
في طريق المدرسة وأنا في 2 ابتدائي
كنا واحنا مروحين العمال بيدونا ببلاش
حتت كبيرة لونها أبيــــض وسخنة بطعم البرتقال
مهما كان عددنا ومهما خدنا من عدد مرات
عمرهم ما كسفونا ولا زغقوا فينا ولا حتى قالونا لأ
الفرحة اللي كنا بنبقى حاسين بيها
زي ما يكون كل واحد لقى كنز بالظبط
خايف عليه أو بيتباهى بحجمه
ضحكنا وجرينا في الشارع باللبان بمنتهى البراءة والطفولة
تحس إنه مشهد من يوتوبيا كدة

بس فجأة وفي ظروف غامضة
المصنع قفل والضحك راح
وكرهت اللبان
عمري ما فهمت الفكرة من إني أدوق حاجة
حلاوتها بتروح كل ما حبيتها أكتر
ومش بيفضل غير طعم وحش بيفكرك بس
بقد إيه فايتك من الحلو
14/10/2011
6:17
ص

السبت، 8 أكتوبر 2011

غباء

لسة كلمات هبة مخبطة فيّا
يا إسراء احنا الاتنين طموحنا مالهوش حدود
بس الفرق بيني وبينك
إنك بتطمحي في اللي بعيد أوي عنك
وأنا بطمح باللي في ايدي
8/10/2011
6:25 م

الثلاثاء، 4 أكتوبر 2011

أتاري أولِك آخر


  • فاكرة لما كنتي بترقصي تحت المطر
    إزاي بتفردي جناحاتك وتبصي للسما وتفتحي شفايفك تدوق طعمه 
    زي ما بكون سامعِك بتغنّي
    من غير كسوف..
    وبتتمايلي مع الأغنية زي ما أنجلينا جولي في فيلم مستر & مسز سميث 

    وإنتِ فاكرة إن مفيش حد شايفِك ..
    مكنتش متأكد وقتها من إنك بتغنّي الأغنية دي

    كنت بحب أوي أتفرج عليكِ كانت ضحكتك بتغطي على صوت الرعد
    .. وكل ما بتمطر أكتر ..كان كل ما بتضحكي أكتر..

    بس من ساعة ما أنا بقيت معاكِ الوضع أختلف

    الضحكة اللي بتنطفي لما عيونك بتيجي عليّا
    الزحمة اللي عمرها ما خنقتِك غير وإنتِ معايا

    دا غير
    لما دوقت المطرة آخر مرة ..
    عرفت طعم دموعك إيه..

    وقتها إتأكدت أوي
    إتأكدت من إن
    .
    .
    أتاري أولِك آخر

    4/10/2011
    9:28
    AM

السبت، 1 أكتوبر 2011

عهد جديد

بكرة أول يوم في الدراسة
كنت في حالة قلق وإكتئاب رهيبة
أصل كلمة دراسة دي بالنسبة لي أكتر من شوية كتب وإمتحانات
بتفكرني بكل إحباطات اللي شوفتها في ال 3 سنين
وبكل الناس اللي اتصدمت فيها
وبكل الناس اللي بحبها بس اتخرجت
وبالتقدير اللي مش عارفة أغيره
وزحمة الشفوي والمرمطة

بس أنا هفتح بكرة صفحة جديدة
هعتبره أول يوم ليا في اللكلية بجد
هكون الشخص اللي أنا عاوزة أبقاه
ومش هلتزم بأي شخصية أو أي دور
أو تقدير مش عاجبني
اتفرض عليا لمجرد إني مكنتش أعرف غيره

هروح بكرة بصفحة جديدة بيضا
مش هسمح لأي حد أو أي حاجة
تكتب فيها كلام مش عاوزة أشوفه فيها
هروح بكرة ببداية جديدة
مش هاخد معايا من الماضي
غير الدروس اللي اتعلمتها من أخطائي

تعالوا نُقسم القسم دا سوا
أقسم بالله العلي العظيم
أنا أحافظ على السنة التي منحها الله لي
ولم يقتصها من عمري -بعد-
وأن أستغلها إستغلالاً واسعاً
في التقرب من الله وأهدافي وخدمة المسلمين
وألا اضيعها في إكتئاب أو حزن أو هم
و أن يُسهل الله لي بها طريقاُ إلى الجنة
 وإن كانت هي آخر سنة كتبها الله لي 
قستكون الأفضل على الإطلاق
والله الموفق

اللهم إني أعوذ بك من علمٍ لا ينفع

وافتكروا ديماً:-
عندما يرحل أحدهم.. فإن آخر على وشك الوصول
-باولو كويلو

شكراً هبة عادل أسعد الله جميع أيامك :)
1/10/2011
9:15
PM